«ورتالىق ازيا – ءوسۋ جانە وركەندەۋ» تاقىرىبىمەن وتەتىن بيىلعى فورۋم COVID-19 ىندەتىنەن كەيىنگى ەكونوميكانى قالپىنا كەلتىرۋ كەزىندەگى ورتالىق ازياداعى نارىقتىڭ جاڭا ۇردىستەرى مەن رەاكتسيالارىن زەرتتەۋگە ارنالادى. بەس كۇندىك ءىس-شارا جاھاندىق جانە جەرگىلىكتى ساراپشىلار مەن يننوۆاتورلاردىڭ باسىن بىرىكتىرىپ, بىرنەشە ونلاين پلاتفورمالاردا, سونىڭ ىشىندە Zoom, Facebook Live جانە YouTube ارقىلى وتكىزىلەدى.
فورۋم قاتىسۋشىلارى ونلاين-سەسسيالارعا, نەگىزگى باياندامالار مەن سەمينارلارعا قوسىلىپ, COVID-19 ىندەتىنىڭ ايماقتىق جەتكىزۋ تىزبەگىنە اسەرى جايلى, ورتالىق ازياداعى ءتۋريزمدى قالپىنا كەلتىرۋ, ايماقتىق ەنەرگەتيكا نارىعىن دامىتۋ, ايماقتىق ماسەلەلەر مەن ەلەكتروندى ساۋدا مۇمكىندىكتەرى جايلى, مەملەكەتتىك جانە جەكە سەكتورلار اراسىندا بايلانىس قۇرۋ, ايماقتاعى كاسىپكەر ايەلدەردىڭ تاجىريبەسى جانە تاعى باسقا وزەكتى تاقىرىپتار بويىنشا پىكىرتالاستارعا قاتىسا الادى.
سونىمەن قاتار, فورۋم كەزىندە قازاقستاننىڭ, قىرعىز رەسپۋبليكاسىنىڭ, تاجىكستاننىڭ, تۇرىكمەنستاننىڭ جانە وزبەكستاننىڭ 20-دان استام كوكونىس پەن جەمىس ونىمدەرىن ءوندىرۋشى كومپانيالار ايماقتاعى جانە ودان تىس جەرلەردەگى سەرىكتەستەرمەن «مير تورگوۆلي» (World of Trade) ۆيرتۋالدى ريتەيل فورۋم شەڭبەرىندە ىسكەرلىك كەلىسسوزدەر جۇرگىزەدى [www.eximexpo.kz].
سوڭعى ونجىلدىقتا ورتالىق ازيا ساۋدا فورۋمى الەمنىڭ 30 ەلىنەن كەلگەن 5000-عا جۋىق مەملەكەتتىك جانە جەكە مەنشىك سەكتور وكىلدەرىن بىرىكتىرۋ ارقىلى جاڭا ۇردىستەرمەن تانىسۋ, يدەيالارمەن الماسۋ, بايلانىستاردى دامىتۋ جانە بيزنەس جۇرگىزۋ مۇمكىندىكتەرىن ىڭعايتتى. ماسەلەن, سوڭعى ونجىلدىقتا ورتالىق ازيا ەلدەرى اراسىنداعى تاۋار اينالىمى ەكى ەسە ۇلعايدى جانە جىلىنا شامامەن 6 ميلليارد اقش دوللارىن قۇرادى
