كوپتوعاي اۋىلىندا نۇرالى ايمۇحانوۆ دەگەن ازامات بار. سول نۇرالى سوڭعى ەكى جىلدان بەرى ەكى جۇزگە تارتا قويىن جاز جايلاۋعا شىعىپ باعىپ وتىر. دانىشپان ابايعا جۇگىنسەك, «ەرتە بارسام, جەرىمدى جەپ قويام دەپ, ىقتىرمامەن وتىرار كۇزەۋدە باي!» دەيدى.
شارۋامەن كوزى اشىلعان نۇرالى توڭىرەگى توزىپ بارا جاتقان اۋىلىن ويلاپ, اۋىلداستارىن قاسىنا شاقىرادى. بىراق بيىل دا ونىڭ باستاماسىن ەشكىم قولداعان جوق.
وسى جازدا شارۋامەن ءجۇرىپ, كوپتوعاي اۋىلىنان ءبىراز ۇزاپ شىققان كەيىن قاراشا قوستىڭ قاسىنان وتتىك. ءۇيدىڭ قاسىندا ەكى ءجۇزدىڭ ۇستىندە قوي جايىلىپ ءجۇر. ءمىنىس اتى تۇساۋلى تۇر. قاراشا قوستان ءجۇزىن كۇن قاقتاعان جىگىت شىقتى. بۇرىننان دا ازداپ تانىستىعىمىز بار ەدى. توقتاپ سالەم بەردىك. اڭگىمە اۋانى شارۋاعا اۋىستى. «ەكى ءجۇز قويعا بولا وتىرسىڭ با؟» دەپ سۇراسام, قاسىنا ەشكىم ەرمەي تۇرعانىن ايتادى. اڭگىمە بارىسىندا وسى جايلاۋدى جاز بويى وتىرۋعا بەرگەن اۋىل ازاماتى تالعات بەردەمباەۆقا العىسىن ايتادى. مالى قۇدىقتان سۋ ىشەدى. ناۋرىزدا كوشىپ بارىپتى. ىنىلەرىمەن بىرىگىپ باعادى. مالى قوڭدى.
جاسىنان شارۋامەن ءبۇيىرى شىققان, ەڭبەك جولىن كومسومول جاستار بريگاداسىندا باستاعان جىگىت اۋىلدىڭ توڭىرەگىندەگى توزىپ بارا جاتقان «تۇيە سۇيرەگەندەي» ءورىستى ايتقاندا, ويلانىپ قالدىق. شىندىعىندا كەز كەلگەن اۋىلدىڭ اينالاسى اق تاقىرعا اينالدى. بيىلعىداي قۋاڭشىلىق جىلى ءتىپتى كەشكىسىن مال تۇياعىنان كوتەرىلگەن شاڭنان اۋىل كورىنبەيدى. كەشكىسىن الا شاڭنان ادام تۇگىلى مالىڭدى دا كورە المايسىڭ؟ قازىر كەيبىر اۋىلداردا الدى 200-300 قوي, 50-60 ءىرى قارا ۇستاپ وتىرعاندار بار. ارينە, اۋىلدا تۇرىپ مال باققان ازاماتتارعا قۋانامىز! بىراق؟ قاتتى ايتساق, «مالمەن مال بولىپ» وتىرۋعا بولا ما؟ «اۋىلىنا قاراپ, ازاماتىن تانى!», دەگەن ءسوز بار. «كەلگەنشە قوناق ۇيالادى, كەلگەن سوڭ, قوناق يەسى ۇيالادى!». قوناقتان ۇيالماس ءۇشىن اۋىلدىڭ اجارى ازاماتتىڭ بارىنە ورتاق. سوندىقتان نۇرالىنىڭ باستاماسىن بارلىق اۋىلدارداعى ازاماتتار قولداۋى كەرەك!
س.قويباعاروۆ
اقتوبە وبلىسى,
ويىل اۋدانى
