قازىرگى تاڭدا وبلىستىڭ اگرارلىق سالاسى شارۋا قوجالىقتاردىڭ ۇساقتىعى مەن تەحنيكالاردىڭ توزۋى سەكىلدى ەكى نەگىزگى پروبلەمانى باستان وتكەرۋدە. ايتالىق, بۇگىندە وڭىردەگى 18 مىڭ بىرلىك تەحنيكانىڭ 15 مىڭنان استامىنىڭ نەمەسە 80 پايىزىنىڭ پايدالانۋ ۋاقىتى 10 جىلدان اسقان.
جوعارىدا ايتىلعان ۇساق شارۋاشىلىقتار ماسەلەسىن شەشۋ جولىندا وبلىس اكىمىنىڭ باستاماسىمەن ءار اۋداندا ءىرى اۋىلشارۋاشىلىق حولدينگتەرى قۇرىلۋدا. ال, ەكىنشى ماسەلەنى شەشۋ ءۇشىن جەتەكشى قازاقستاندىق ءوندىرۋشى كومپانيا – «اگروماشحولدينگ KZ» اق-مەن تىعىز ىنتىماقتاستىق ورناتىلعان. بۇگىندە قوستانايلىق كاسىپورىن بۇكىل رەسپۋبليكا بويىنشا وزىندىك سەرۆيسىن جولعا قويىپ, ەلىمىزدىڭ اۋىلشارۋاشىلىق تەحنيكاسى نارىعىنىڭ جارتىسىنا جۋىعىن قامتىپ وتىر. كومپانيانىڭ ءونىمى ESSIL كومبايندارى, LOVOL, KIROVETS تراكتورلارىمەن جانە بارلىق قوسىمشا اۋىلشارۋاشىلىق تەحنيكالارىمەن كەڭىنەن قولدانىستا دەسەك ارتىق ايتپامىز.
Trade-in جوباسى اعىمداعى جىلدىڭ شىلدە ايىنىڭ ورتاسىندا «تاراز» اكك, «اگروماشحولدينگ KZ» اق جانە وڭىرلىك كاسىپكەرلەر پالاتاسى اراسىندا جاسالعان مەموراندۋمنىڭ ارقىلى جۇزەگە اسىپ وتىر. ىنتىماقتاستىقتىڭ ناتيجەسىمەن 49% الەۋمەتتىك-كاسىپكەرلىك كورپوراتسياعا جانە 51% «اگروماشحولدينگكە» تيەسىلى «تارازرەمسەرۆيس» بىرلەسكەن كاسىپورنىن قۇرۋ كوزدەلگەن. بۇل كاسىپورىن شارۋالاردان ەسكى تەحنيكانى قابىلداپ, ونىڭ ورنىنا شارۋالارعا وتە قولايلى شارتتارمەن جاڭا تراكتور بەرەدى, ال ەسكى تەحنيكا العاشقى جارنا رەتىندە پايدالانىلادى. سونداي-اق, كەم دەگەندە 50 تۇراقتى جۇمىس ورنى قۇرىلادى. بۇگىنگى كۇنگى الدىن الا مالىمەتتەر بويىنشا, متز شامامەن ەكى ميلليون تەڭگەگە باعالانۋدا. قازىردىڭ وزىندە مۇنداي ون ەكى تەحنيكا جوندەۋگە جىبەرىلۋدە. ولاردىڭ بىرقاتارىنىڭ پايدالانۋ مەرزىمى ءتىپتى 40 جىلعا جەتكەن. جاستار اللەياسىنداعى الاڭعا قويىلعان ەسكى تەحنيكالاردىڭ قاسىندا قۇنى 10,3 ميلليون تەڭگەنى قۇرايتىن جاڭا LOVOL تراكتورلارى راسىندا كوز سۇيسىنتەدى.
سونىمەن قاتار, "اگروبيزنەس" باعدارلاماسى اياسىندا شارۋالار جاڭا تەحنيكا قۇنىنىڭ 25% مولشەرىندە سۋبسيديا الادى. وسىلايشا, سول LOVOL تراكتورىن ساتىپ الا وتىرىپ, تەك 4,5 ميلليون تەڭگە عانا تولەيدى, ال قالعان سوما جىلدىق بەس پايىزبەن بەس جىلعا ليزينگكە رەسىمدەلەدى. ءوندىرۋشى ەكى جىل كەپىلدىك بەرەدى نەمەسە قوزعالتقىشتىڭ 1600 ساعات جۇمىس ىستەۋىن قامتاماسىز ەتەدى, ال "اگروماشحولدينگ KZ" اق ماماندارى "تارازرەمسەرۆيس" جشس بازاسىندا سەرۆيستىك قىزمەت كورسەتەتىن بولادى. Trade-in باعدارلاماسىنىڭ تاعى ءبىر ارتىقشىلىعى رەتىندە تولەمدەر بويىنشا ءبىر جىلدىق كانيكۋلدى ايتۋعا بولادى. ال ودان ءارى تولەمدەردى التى ايدا ءبىر رەت جۇرگىزە الادى.
- بۇل تاماشا مۇمكىندىك. سوندىقتان مەن تەك جاڭا تراكتورمەن شەكتەلىپ قالماي, سونداي-اق جالپى 18,5 ملن. تەڭگەگە جاڭبىرلاتىپ سۋارۋ قوندىرعىسىن, تىڭايتقىش سەپكىش, سوقا ساتىپ الۋدى جوسپارلاپ وتىرمىن. مەملەكەتتىڭ مۇنداي قولداۋىن ءتيىمدى پايدالانۋ ماڭىزدى, - دەيدى جاس كاسىپكەر, جۋالىلىق «مەرسەيت »شارۋا قوجالىعىنىڭ جەتەكشىسى ولجاس سلامباي.
ەگەر بىرەۋ ءوزىنىڭ ەسكى تەحنيكاسىن جاڭارتقىسى كەلسە, وندا وعان زاۋىت ماماندارى زاماناۋي جابدىقتاردى قولدانا وتىرىپ قالپىنا كەلتىرۋگە كومەكتەسەدى. جاڭاسىنان ەشبىر كەم تۇسپەيتىن ول تەحنيكانى شارۋا ءتيىستى كەپىلدىكپەن تومەن باعاعا ساتىپ الادى.
ايماق باسشىسى ەسكى تراكتورلاردى دا, جاڭا تراكتورلاردى دا باعالاپ, شارۋالاردى اڭگىمەگە تارتتى. ول 1980 جىلعى ەسكى متز تەحنيكاسىن بايقاپ, جاڭا LOVOL تراكتورىن جۇرگىزىپ, سىناپ كوردى. جاڭا تراكتور كونديتسيونەر جانە جىلىتۋ پەشىمەن جابدىقتالعان, سىرت كورىنىسى تارتىمدى ءارى جولدا ىڭعايلى جۇرەدى.
- ءبىزدىڭ سوۆحوزدا جۇمىس ىستەگەن جاس كەزىمىزدە مۇنداي زاماناۋي تراكتورلار بولعان جوق. كەڭەستىك تەحنيكانى جۇرگىزدىك. كەز كەلگەن مەملەكەتتىڭ مىندەتى – ازىق-ت ۇلىك قاۋىپسىزدىگىن قامتاماسىز ەتۋ, سوندىقتان مەملەكەت باسشىسى قاسىم-جومارت توقاەۆ اگرارلىق سەكتوردى دامىتۋعا ايرىقشا نازار اۋدارۋدا. ءتۇرلى مەملەكەتتىك قولداۋ باعدارلامالارى جۇزەگە اسىپ, سۋبسيديالار بولىنۋدە. ونىڭ ىشىندە جاڭا اۋىلشارۋاشىلىق تەحنيكالارىن ساتىپ الۋعا سالىقتىق جەڭىلدىكتەر قاراستىرىلعان. ەڭ باستىسى – ەرىنبەي جۇمىس ىستەۋ كەرەك. بۇل جاعدايدا توپىراقتىڭ قۇنارلىلىعىن باعامداپ, جاڭا تەحنولوگيالاردى ەنگىزۋ, تەك جوعارى ساپالى تۇقىمداردى پايدالانۋ, مينەرالدى تىڭايتقىشتاردى ۋاقىتىندا قولدانۋ جانە اۋىسپالى ەگىستىك تاسىلىنە دەن قويۋ اسا ماڭىزدى.
جامبىل وبلىسى ەلىمىز بويىنشا العاش رەت اۋىل شارۋاشىلىعى تەحنيكاسىن جاڭارتۋ ءۇشىن trade-in ءادىسىن قولدانا باستادى. جىل سوڭىنا دەيىن ءبىز 100 بىرلىك ەسكى تەحنيكانى قابىلداپ, شارۋالارعا سونشا جاڭا تەحنيكانى ۇسىنباقپىز. بولاشاقتا ءوز ءوندىرىسىمىزدى قۇرۋىمىز قاجەت, - دەدى بەردىبەك ساپارباەۆ.
«اگروماشحولدينگ كز» اق ۆيتسە-پرەزيدەنتى مەيرامبەك ساندىبەكوۆ ايماق باسشىسىنا سەنىم ارتقانى ءۇشىن العىس ءبىلدىرىپ, جوبانى ءارى قاراي دامىتا تۇسۋگە نيەتتى ەكەندىگىن جەتكىزدى.
- ءبىزدىڭ تەحنيكالار سەنىمدى ءارى وزدەرىن جاقسى جاعىنان دالەلدەپ كەلەدى. وبلىس اكىمدىگىمەن بىرلەسە وتىرىپ, جەرگىلىكتى اگرارلىق سەكتورعا جاڭا تەحنولوگيالاردى ەنگىزەتىن بولامىز, - دەپ تۇيىندەدى زاۋىت وكىلى. شارۋالار اتىنان ءسوز العان بايزاقتىق «باينازاروۆ» شارۋا قوجالىعىنىڭ جەتەكشىسى حاميدۋللا باينازاروۆ تالاپ ەتىلەتىن قۇجاتتار سانى ەداۋىر قىسقارعانىن, جالپى العاندا جاڭا قوندىرعىلار ساتىپ الۋ شارۋالار ءۇشىن قول جەتىمدى بولا باستاعانىن اتاپ ءوتتى.
قوردايلىق «اۋحاتتىلىق» اگروقۇرىلىمىنىڭ باسشىسى قۋانىشبەك ابدىقالىقوۆ قولداي ءتۇستى. ول بىردەن ەكى ەسكى متز-82 تراكتورىن تاپسىرىپتى. جاڭا تەحنيكالار ارقىلى ول 1200 گەكتار ەگىس القاپتارىن ارتاراپتاندىرۋعا كۇش سالماق. كەلەر جىلى اگروقۇرىلىم باسشىسى مايلى داقىلداردى, اتاپ ايتقاندا ماقسارى ءوسىرۋدى جوسپارلاۋدا.
ايتا كەتۋ كەرەك, سوڭعى ءۇش جىلدا وبلىسىمىزدا اۋىلشارۋاشىلىق تەحنيكالارىن جاڭارتۋ قارقىنى ەكى ەسەدەن استامعا, ياعني 4-تەن 10 پايىزعا دەيىن ارتقان.
