بەلارۋسيانىڭ ءبىرىنشى راكەتكاسى, الەمدىك رەيتينگتە 83-ساتىدا ورنالاسقان ەگور گەراسيموۆ Astana Open چەمپيوناتىنىڭ ءار-ءبىر ماتچىندا تاماشا ويىن ورنەگىمەن كوزگە تۇسكەن سپورتشى. ونىڭ يردي ۆەسەلدى تىزە بۇكتىرگەن كەزدەسۋدەگى شەبەرلىگىنە تاڭ قالماعان جان جوق. بىراق ونىڭ شيرەك فينالداعى قارسىلاسى, اقش-تان كەلگەن الەمنىڭ 64-راكەتكاسى فرەنسيس تيافو وڭاي بەرىلەتىن سپورتشى ەمەس. قاتەلىككە بوي الدىرمايتىن, ءار ماتچتا قارسىلاسىن تىعىرىققا تىرەۋگە تىرىساتىن شەبەر تەننيسشى.
ءبىرىنشى گەيمنەن ەكى جاق شابۋىلعا تولى ويىن كورسەتتى. گەراسيموۆ دوپتى ويىنعا قوسۋدا الەۋەتىن ارتتىرىپ, ويىن جىلدامدىعىن ارتتىرۋعا تىرىستى. ال تيافو قىسقا قايىرما سوققىلارىمەن قارسىلاسىن قاپى قالدىردى. ەكى تەننيسشى دە دوپتى ويىنعا قوسۋدا قاتەلەسكەن جوق. سوندىقتان پارتيا تاي برەيكپەن جالعاسىپ, قىسقا ەسەپپەن امەريكالىق جەڭىسكە جەتتى.
ءبىرىنشى سەتتە جەڭىلىس تاپقان گەراسيموۆ ەكىنشى پارتيانىڭ باسىندا قوعالىسىن ۇدەتىپ, برەيك يەلەندى. تيافۋ ءوز كەزەگىندە ەسەپ ايىرماسىن قىسقارتقىسى كەلدى. الايدا گەيمدە ۇتىلىس تاۋىپ, بەلارۋس سپورتشىسىنا كەزەكتى پارتيادا جەڭىستى بەرىپ قويدى. ەگور گەراسيموۆتىڭ جۇيكەسى سىر بەردى مە, وسى گەيمنىڭ ءبىرىنشى سەتبولىندا قاتارىنان ەكى قاتەلىك جاساپ, سەتتى تەك ءۇشىنشى ارەكەتىندە الدى.
شەشۋشى ساتتە ەكى ويىنشى دا بابىندا بولدى. فرەنسيس تيافونىڭ سوققىلارى ەگور گەراسيموۆتى ابدەن ساستىردى. بەلارۋس وكىلى ۋاقىت وتە دوپتىڭ باعىتىن ءدال تاۋىپ وتىردى, ءتىپتى دوپتى ويىنعا قوسقان ساتتەن توردىڭ جانىندا وينادى. تيافونىڭ دوپتى ويىنعا قوسۋ ادىستەرى دە ءساتتى شىققانىن ايتۋ كەرەك. دوپ جىلدامدىعى ساعاتىنا 217 كم دەيىن جەتتى. بىراق كەزەكتى دوپتى ويىنعا قوسۋدا ول قاتەلەسىپ, گەيم قارسىلاسىنىڭ ەسەبىنە جازىلدى. الايدا قاتەلىگىنەن ساباق العان اقش وكىلى برەيككە قول جەتكىزىپ, العا ۇمتىلدى. ال گەراسيموۆ تابلوداعى كورسەتكىش 5:6 بولعان ساتتە ءمۇلت كەتىپ, قولدا تۇرعان جەڭىستى ۋىسىنان شىعارىپ الدى. قىسقا ەسەپپەن بۇل ماتچتا فرەنسيس تيافونىڭ باعى جاندى. ەسەپ: 7:6 (7:5), 5:7, 7:5.
ميحايل كۋكۋشكيننىڭ شيرەك فينالداعى بۇگىنگى قارسىلاسى ءبىر كۇن بۇرىن ءۇش سەتتە اۆستراليالىق دجوردان تومپسوننان باسىم بولعان ەميل رۋسۋۆۋوري.
Aلعاش رەت ءوتىپ جاتقان ATP 250 ءتۋرنيرىنىڭ جالپى جۇلدە قورى 275 مىڭ دوللار. كوروناۆيرۋس پاندەمياسىنا بايلانىستى جارىس جانكۇيەرسىز ءوتىپ جاتىر, ماتچتاردىڭ بارلىق ترانسلياتسياسى QAZSPORT ارناسى ارقىلى تاراتىلادى.
