سولتۇستىك قازاقستاندا تولىپ كەتكەن بۇل نە دەگەن كوپ گراناتا دەپ تاڭ قالماسقا لاجىڭ جوق. گراناتا بىرنەشە ادامنىڭ ءومىرىن بىردەن جالماي الاتىن وتە قاۋىپتى جاراق. ونىڭ كۇزەتىلۋى مەن قولدانىلۋى بارىنشا قاتاڭ بولۋى كەرەك ەدى. ال ايىرتاۋ اۋدانىندا ول پاكەتتىڭ ىشىندە بوس جاتىپ, ءيتىن قىدىرتىپ جۇرگەن تۇرعىن ابايسىزدا تاۋىپ العان. ەگەر ول بايسالدى كىسىنىڭ ەمەس, بالا-شاعانىڭ نەمەسە جامان ويلى ادامنىڭ قولىنا تۇسسە – ناتيجەسىنىڭ قانداي بولارىن بولجاۋدىڭ ءوزى قيىن.
ال كەشە پەتروپاۆل قالاسىنىڭ 58 جاسار تۇرعىنى مەديتسينا قىزمەتكەرلەرىن ونى كوتەرىپ جانە جارامىن دەپ ايعاي سالىپ, ەمحانانىڭ جۇمىسىن ءبىرشاما ۋاقىتقا توقتاتىپ قويعان. وقيعا ورنىنا شۇعىل تۇردە جەتكەن پوليتسيا قىزمەتكەرلەرى مەديتسينا قىزمەتكەرلەرى مەن ەمحاناعا كەلگەن جۇزدەگەن ادام ەۆاكۋاتسيالانعان. گراناتا كوتەرۋشىنىڭ ءوزى دە قولعا ءتۇستى. "102 ارناسىنا دابىل ساعات 9.10-دا ءتۇستى. وقيعا ورنىنا بارلىق قىزمەتتەر جىبەرىلدى. №4 ەمحانادان مەديتسينا قىزمەتكەرى مەن 100-دەن اسا ەمدەلۋشىلەر شىعارىلدى", - دەدى سقو پوليتسيا دەپارتامەنتى باستىعىنىڭ ورىنباسارى ەڭبەك سەمبين.
جارعىش تەحنيك-ماماندارى وق-ءدارىنى الىپ, قاۋىپتى جارىلعىش زاتتاردى تاسىمالداۋعا ارنالعان كونتەينەرگە ورنالاستىرعان. ونى ۇستاعان ادام ۇستالىپ, پەتروپاۆل قالاسى پب ءبىرىنشى بولىمىنە جەتكىزىلدى. وسى فاكتى بويىنشا قك 287-بابى 3-بولىگىندەگى "قارۋدى, وق-دارىلەردى, جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ, بەرۋ, وتكىزۋ, ساقتاۋ, تاسىمالداۋ نەمەسە الىپ ءجۇرۋ" بابىمەن سوتقا دەيىنگى ءىس قوزعالدى. تەرگەۋ اياسىندا قاجەتتى ساراپتاما تاعايىندالاتىن بولادى. سونىمەن بىرگە ونىڭ بارىسىندا وقيعانىڭ سەبەپتەرى مەن بارلىق ءمان-جايى انىقتالاتىن شىعار.
ۇستالعان ادامنىڭ ايتۋىنشا, ونىڭ وسىنداي ارەكەتكە بارۋىنا مەديتسينا مەكەمەسىنىڭ قىزمەت كورسەتۋ ساپاسىنا دەگەن نارازىلىق يتەرمەلەگەن. شىنىندا دا پەتروپاۆلدا كوپتەگەن مەديتسينا قىزمەتكەرلەرى ادامداردىڭ جۇيكەسىن جۇقارتاتىنى شىندىق. وندايلار سىپايىلىق دەگەندى اتىمەن بىلمەيدى. ويتكەنى, باسشىلارى سونداي بولۋدى تالاپ ەتپەيتىن سياقتى.
ال ۇستالعان ادام اۋعان سوعىسىنا قاتىسىپ, جۇيكەسى جاي دا جۇقارعان جان ەكەندىگى بەلگىلى بولعان. سونىمەن قاتار ونىڭ پاروليمپيادالىق ويىندارعا قاتىسقانى دا انىقتالدى.
سقو پد جارعىش تەحنيك-ماماندارىنىڭ الدىن-الا جۇرگىزگەن تەكسەرىسىنە قاراعاندا ول قولىنا العان ف-1 گراناتاسىندا تۇتاندىرعىش بولماعان. دەمەك, ونىڭ جارىلۋى دا مۇمكىن ەمەس. الايدا كوپ ادامدى قورقىتىپ, جۇرەكتەرىن شايلىقتىرىپ, جاراق كوتەرگەندىكتىڭ ءوزى سوتتا ونىڭ جاۋاپكەرشىلىگىن تومەندەتپەيتىنى حاق.
پەتروپاۆل
