اتالعان ىسكە قاتىستى سوتتالۋشىلار قاتارىندا – 7 ادام, تاعى 2 ادام – نۇر-سۇلتان قالاسى اكىمىنىڭ بۇرىنعى ورىنباسارى سۇلتانبەكوۆ پەن استانا LRT باسشىسى تالعات اردان قازىر حالىقارالىق ىزدەۋدە. ولاردىڭ بارلىعىنا جەڭىل رەلستى كولىك جوباسىن جۇزەگە اسىرۋ كەزىندە 5,8 ميلليارد تەڭگە جىمقىردى دەگەن ايىپ تاعىلىپ وتىر. پروكۋرور جانگەلدى ەسەباەۆ ءىستىڭ ەگجەي-تەگجەيىن شامامەن ەكى ساعات بويى وقىدى.
"امانجولوۆ اكىمشىلىك, قىلمىستىق جانە ازاماتتىق زاڭنامادا بەلگىلەنگەن شەكتە قۇقىق بۇزۋشىلىق جاساعانى ءۇشىن جەكە جاۋاپتى بولدى, سونداي-اق بيۋدجەت قاراجاتىنىڭ ماقساتتى پايدالانىلۋىنا باقىلاۋدى جۇزەگە اسىردى. ءوز كەزەگىندە قانات سۇلتانبەكوۆ 2008 جىلدىڭ مامىر ايىنان 2009 جىلدىڭ قازان ايىنا دەيىن استانا قالاسىنىڭ جولاۋشىلار كولىگى باسقارماسىن باسقاردى. ول حاتتامالار مەن وزگە دە قۇجاتتارعا قول قويۋعا, "استانا LRT" جشس جەرگىلىكتى اتقارۋشى ورگاننىڭ وكىلدىگىمەن بايلانىستى قاجەتتى ءىس-ارەكەتتەردى جاساۋعا قۇقىلى بولدى. اكىمدىكتىڭ 2011 جىلعى 18 مامىرداعى قاۋلىسىمەن تالعات اردان بەس جىل مەرزىمگە "استانا LRT" باسقارما توراعاسى بولىپ تاعايىندالدى. بۇعان دەيىن ول استانا قالاسىنىڭ كولىك باسقارماسى باستىعىنىڭ ورىنباسارى قىزمەتىن اتقارعان. سۇلتانبەكوۆ وزىنە جۇكتەلگەن وكىلەتتىكتەرگە بايلانىستى جوبانىڭ ىسكە اسىرىلۋ بارىسى مەن ناتيجەلەرىن جەكە ءوزى باقىلاپ وتىردى", دەدى قالالىق پروكۋروردىڭ كومەكشىسى جانگەلدى ەسەباەۆ.
ايتا كەتەيىك, تالعات اردانعا قاتىستى تەرگەۋ لاۋازىمدىق وكىلەتتىكتەرىن اسىرا پايدالاندى دەگەن كۇدىكپەن 2018 جىلدىڭ جازىندا باستالدى. سول كەزدە سىبايلاس جەمقورلىققا قارسى قىزمەتتىڭ تەرگەۋشىلەرى "استانا LRT" بيۋدجەت قاراجاتىنان قولدانىستاعى ليميتتەن 125 ملن اسىپ, مەردىگەرلىك ۇيىمداردىڭ ءبىرىنىڭ شوتىنا 300 ملن تەڭگەدەن استام قاراجات اۋدارعانىن انىقتاعان.
