مىسالى, جۋىردا فوتوجۋرناليستيكا باعىتى بويىنشا وتەتىن World Press Photo بايقاۋىنىڭ 2020 جىلعى نومينانتتارى مەن جۇلدەگەرلەرى تۋرالى جازعان نۇركەننىڭ كىشكەنتاي عانا اقپاراتى ونىڭ ەرەكشە ويلاۋ جۇيەسىن, زەردەسىن, جاڭا كوزقاراستارىن اڭعارتتى.
اتالعان بايقاۋدا جاپونيالىق ءفوتوتىلشى ياسۋەسي تيبانىڭ «تۇنىق داۋىس» اتتى سۋرەتى ۇزدىك دەپ تانىلعانىن جازعان نۇركەن سۋرەتتە قولىنا جارىعى قوسىلعان ۇيالى تەلەفون ۇستاعان جاستار مەن الەمدى بەيبىتشىلىككە شاقىرىپ ولەڭ وقىپ تۇرعان سۋداندىق ازامات بەينەسىنە ەرەكشە ۇڭىلەدى.
سۋرەتتەگى اقىن جانىن جەر شارىنىڭ الدەبىر بولىگىندەگى ەكىنشى ءبىر اقىننىڭ قاپىسىز سەزىنۋى ءبىزدى بەيجاي قالدىرمادى. ءبىزدى سونداي-اق نۇركەننىڭ بۇل كىشكەنتاي عانا جازباسى قازاقتىڭ اقيىق اقىنى مۇقاعاليدى ەسىمىزگە ءتۇسىردى.
مۇزارت مۇقاڭ «چيلي – شۋاعىم مەنىڭ» دەگەن ولەڭىندە:
بارلىق اقىن – بالاسى ءبىر انانىڭ,
اقىن كەلسە ومىرگە, قۋانامىن,
اقىن وتسە ومىردەن – جىلاعانىم.
بارلىق اقىن – بالاسى ءبىر انانىڭ.
بارلىق اقىن – باۋىرى ءتىرى ادامنىڭ!
– دەپ جىرلايدى. بۇل ولەڭ جانە ۇلكەن پوەمانىڭ العاشقى شۋماعى. پوەمانى اقىن ماقاتاەۆ پابلو نەرۋداعا ارنايدى.
ءجا, سۋرەتكە ورالايىق.
سۋداندا قارسىلىق اكتسيالارى 2018 جىلدان باستالىپ 2019 جىلعا دەيىن جالعاسقان. جەرگىلىكتى بيلىك بەيبىت شەرۋدى توقتاتۋ ءۇشىن ەلەكتر قۋاتى مەن ينتەرنەت جەلىسىن ءسوندىرىپ قويعان.
«بۇل سۋدانداعى مەن كورگەن حالىق جاپپاي قاتىسقان جالعىز عانا بەيبىت شەرۋ بولدى. سول كۇنى شەرۋگە قاتىسقان حالىقتىڭ قايتپاس قايسارلىعى قايتا تۇتانعان كومىردەي ەكەنىن سەزدىم», دەپتى فوتوگراف.
قازىلار القاسىنىڭ مۇشەسى كريس ماكگرات سۋرەتتەن العان اسەرىمەن بولىسە كەلىپ: «بۇل بۇكىل الەمدە بەيبىتشىلىك ورناۋىن قالايتىن جاندار مەن سول شەرۋگە قاتىسقانداردىڭ ىشكى قارسىلىعىن كورسەتىپ بەرگەن عاجاپ تۋىندى», دەپ تۇيەدى.
الەمدىك فوتوبايقاۋدا جەڭىمپاز بولعان سۋرەتكە قاراپ تۇرىپ ۇيالى تەلەفونداردىڭ جارىعىنان دا جارىق اقىن كوزىندەگى وتتى كورمەۋ مۇمكىن ەمەس. ونى بايقاعان ءبىزدىڭ جاس شايىردىڭ جۇرەگى دە جاپ-جارىق ەكەنىن سەزەسىڭ...
قۋدالانعان, ءجابىر كورگەن, زورلىقتان كوز اشپاعان, تۇنەكتەر مەن قاپاستاردا جاتقان حالىقتاردى وسىنداي وتتى كوزدەردەن تاراعان جارىقتار ەشقاشان اداستىرمايتىنىنا سەنۋىمىز كەرەك.
