فوتو:
كورمە «تاڭبالى» مەملەكەتتىك تاريحي-مادەني جانە تابيعي مۋزەي-قورىعى مەن فوتوسۋرەتشى ۆلاديسلاۆ كيمنىڭ بىرلەسكەن جوباسى رەتىندە ۇسىنىلىپ وتىر. ەكسپوزيتسيا تاڭبالى پەتروگليفتەردى زاماناۋي ونەر مەن تسيفرلىق تەحنولوگيالار ارقىلى جاڭا قىرىنان تانىستىرۋدى كوزدەيدى. نەگىزگى قاعيدا – اۋتەنتتىلىك پەن تاريحي تۇپنۇسقانى ساقتاۋ.
كورمە مازمۇنى تەرەڭ سيمۆولدىق مانگە يە. ەجەلگى پەتروگليفتەر «بابالار كودى» رەتىندە قاراستىرىلىپ, ولار ارقىلى كونە دۇنيەتانىم, ميفولوگيا, تابيعات پەن عارىش تۋرالى ءبىلىمنىڭ كورىنىسى ۇسىنىلادى. يممەرسيۆتى مۋلتيمەديالىق شەشىمدەر كەلۋشىلەرگە كيەلى كەڭىستىكتىڭ اتموسفەراسىن سەزىنۋگە مۇمكىندىك بەرەدى.
كورمەنىڭ باستى ماقساتى – تاڭبالى پەتروگليفتەرىن ءتىرى مادەني مۇرا رەتىندە كەڭىنەن ناسيحاتتاۋ جانە ولاردى زاماناۋي ونەر قۇرالدارى ارقىلى كەڭ اۋديتورياعا قولجەتىمدى ەتۋ. وسى ارقىلى تاريحي-مادەني قۇندىلىقتاردى ساقتاۋ مەن دارىپتەۋ ءىسى جاڭا دەڭگەيگە كوتەرىلمەك.
ەكسپوزيتسيادا جارتاس سۋرەتتەرىنىڭ فوتوكارتينالارى, پەتروگليفتەر نەگىزىندە جاسالعان ارت-وبەكتىلەر جانە جاساندى ينتەللەكت (جي) قولدانىلعان مۋلتيمەديالىق تەحنولوگيالار ۇسىنىلادى. سونىمەن قاتار كەلۋشىلەرگە كورمە كاتالوگى مەن پەتروگليفتەر نەگىزىندە ازىرلەنگەن اۆتورلىق سۋۆەنيرلەر قولجەتىمدى بولادى.
الماتىدا بولات مۇحامەديەۆ شىعارماشىلىعىنا ارنالعان كورمە اشىلدى
كورمە قوناقتارىنىڭ قاتارىندا الماتىداعى يۋنەسكو ايماقتىق وكىلدەرى, شەتەلدىك جارتاس ونەرى بويىنشا جەتەكشى ماماندار, بۇكىلالەمدىك مۇرا وبەكتىلەرىنىڭ باسشىلارى, سونداي-اق وتاندىق ارحەولوگتار, تاريحشىلار, ەتنولوگتار مەن مادەنيەتتانۋشىلار بار. بۇدان بولەك, مۋزەي سالاسىنىڭ ماماندارى, ءبىلىم بەرۋ ۇيىمدارىنىڭ وكىلدەرى جانە بيزنەس قاۋىمداستىعى دا قاتىسادى.
كورمە اياسىندا «جارتاس سۋرەتتەرىن ۆيتريناسىز ۇسىنۋ: جارتاس ونەرىن تانىستىرۋ جانە ونى كەڭىنەن ناسيحاتتاۋدىڭ زاماناۋي تاسىلدەرى» اتتى حالىقارالىق عىلىمي-تاجىريبەلىك كونفەرەنتسيا وتەدى. بۇل الاڭدا ماماندار مادەني مۇرانى ساقتاۋ مەن تانىستىرۋدىڭ جاڭا ادىستەرىن تالقىلايدى.
اتالعان كورمە مەن كونفەرەنتسيا «تاڭبالى» مۋزەي-قورىعىن جارتاس ونەرىن زەرتتەۋ جانە ناسيحاتتاۋ جونىندەگى الەمدىك دەڭگەيدەگى ورتالىق رەتىندە نىعايتۋعا ىقپال ەتەدى. سونىمەن قاتار مادەني مۇرانى ساقتاۋ بويىنشا تۇراقتى تاجىريبەلەردى قالىپتاستىرۋعا جول اشادى.
