فوتو: سۋ رەسۋرستارى جانە يرريگاتسيا مينيسترلىگى
مينيسترلىك ازىرلەگەن مەملەكەتتىك قولداۋ تەتىكتەرى سۋ ۇنەمدەۋ تەحنولوگيالارى قولدانىلاتىن القاپتاردىڭ جىل سايىنعى ءوسىمىن 150 مىڭ گەكتارعا دەيىن جەتكىزۋگە مۇمكىندىك بەردى. بۇل كورسەتكىش مەملەكەت باسشىسىنىڭ تاپسىرمالارىنا سايكەس جۇزەگە اسىپ وتىر. ال 2024 جىلعا دەيىن ەلىمىزدە زاماناۋي سۋارۋ جۇيەلەرىن ەنگىزۋ قارقىنى جىلىنا ورتا ەسەپپەن 30 مىڭ گەكتاردى عانا قۇراعان ەدى. دەمەك, قازىرگى قارقىن 5 ەسە ارتقان.
بۇگىندە رەسپۋبليكا بويىنشا سۋ ۇنەمدەۋ تەحنولوگيالارى قولدانىلاتىن جالپى اۋماق 543,5 مىڭ گەكتارعا جەتتى. بۇل اۋىل شارۋاشىلىعى سالاسىندا رەسۋرستى ۇنەمدەۋگە جانە ونىمدىلىكتى ارتتىرۋعا باعىتتالعان ماڭىزدى قادامداردىڭ ءبىرى سانالادى.
سۋ ۇنەمدەۋ جۇيەلەرىن ەنگىزۋدى ىنتالاندىرۋ ءۇشىن مەملەكەت تاراپىنان ناقتى قولداۋ شارالارى قاراستىرىلعان. اتاپ ايتقاندا, ۇڭعىما بۇرعىلاۋ, ينفراقۇرىلىم جۇرگىزۋ جانە جابدىق ساتىپ الۋ شىعىندارىن وتەۋ ۇلەسى 50%-دان 80%-عا دەيىن ۇلعايتىلدى. سونىمەن قاتار سۋارمالى سۋعا سارالانعان تاريف ەنگىزىلدى. الداعى ءۇش جىلدا سۋ ۇنەمدەۋ تەحنولوگيالارىن پايدالاناتىن شارۋالار ءۇشىن سۋارمالى سۋدىڭ قۇنىن سۋبسيديالاۋ كولەمى 50%-دان 85%-عا دەيىن ارتتى.
بۇدان بولەك, 2026-2028 جىلدارعا ارنالعان كەزەڭدە سۋ ۇنەمدەۋ تەحنولوگيالارىن ەنگىزۋدى سۋبسيديالاۋعا بولىنەتىن قاراجات كولەمى الدىڭعى ءۇش جىلمەن سالىستىرعاندا 4 ەسە كوبەيتىلدى. بۇل مەملەكەت تاراپىنان اگرارلىق سەكتورداعى ءتيىمدى سۋ پايدالانۋعا باسىمدىق بەرىلىپ وتىرعانىن كورسەتەدى.
مينيستر نۇرجان نۇرجىگىتوۆتىڭ ايتۋىنشا, الداعى جوسپارلار اۋقىمدى.
«2030 جىلعا قاراي سۋ ۇنەمدەۋ جۇيەلەرى قولدانىلاتىن سۋارمالى القاپ كولەمىن 1,3 ملن گەكتارعا جەتكىزۋ جوسپارلانىپ وتىر. بۇل تەحنولوگيالار سۋارۋ سۋىن 30%-عا دەيىن ۇنەمدەۋگە مۇمكىندىك بەرەدى. سونىمەن قاتار سۋ رەسۋرستارى جانە يرريگاتسيا مينيسترلىگى سۋ قورىن قورعاۋ جانە پايدالانۋ سالاسىنداعى ەڭ ۇزدىك قولجەتىمدى تەحنولوگيالار ءتىزىمىن ازىرلەدى. وعان وزىق سۋارۋ جۇيەلەرى دە ەنگىزىلگەن», دەدى مينيستر.
وسىلايشا, قازاقستاندا سۋ رەسۋرستارىن ءتيىمدى باسقارۋ باعىتىندا جۇيەلى جۇمىس جۇرگىزىلىپ, زاماناۋي تەحنولوگيالاردى كەڭىنەن ەنگىزۋ ارقىلى اۋىل شارۋاشىلىعىنىڭ تۇراقتى دامۋىنا جول اشىلىپ وتىر.
سۋ تاسقىنى: قازاقستاننىڭ بىرنەشە وڭىرىندە تاسجولداردى سۋ باستى
