اعىمداعى جىلدىڭ 25 قازانىندا نۇر-سۇلتان قالاسىنىڭ اۋەجايىنداعى جەلىلىك پوليتسيا بولىمىنە "نۇرسۇلتان نازارباەۆ حالىقارالىق اۋەجايى" اق تەكسەرۋ قىزمەتىنىڭ ينسپەكتورى ەكى جولاۋشىعا قاتىستى شارا قابىلداۋ تۋرالى وتىنىشپەن كەلدى.
ونىڭ ايتۋىنشا, ولار بالاعات سوزدەر ايتىپ, وزدەرىن دورەكى ۇستاعان, ءسويتىپ "FlyArystan" اۋەكومپانياسىنىڭ "نۇر-سۇلتان – الماتى" باعىتىنداعى اۋەرەيسىنە وتىرعىزۋ تالونىنسىز وتۋگە تىرىسقان.
وقيعا ورنىندا نۇر-سۇلتان قالاسىنىڭ اۋەجايىنداعى جپب-ءنىڭ قىزمەتكەرلەرى قۇقىقبۇزۋشىلاردى تىنىشتاندىرۋعا تىرىسقاندارىمەن, ولار ءتارتىپ ساقشىلارىنىڭ ەسكەرتۋلەرىنە قۇلاق اسپاي, باعىنباۋشىلىق تانىتقان.
تەكسەرۋ بارىسىندا كولىك پوليتسەيلەرى ولاردىڭ 1985 جانە 1986 جىلى تۋعان الماتى قالاسىنىڭ تۇرعىندارى ەكەنىن انىقتادى. مەديتسينالىق كۋالاندىرۋ قورىتىندىسىنا سايكەس اتالعان ازاماتتار جەڭىل دارەجەدەگى الكوگولدى ماساڭ كۇيدە بولعان.
وسى فاكتى بويىنشا پوليتسەيلەر قر اقبتك-ءنىڭ 440-بابىنىڭ 1-بولىگى, ياعني الكوگولدىك ىشىمدىكتەر ءىشۋ نەمەسە قوعامدىق ورىندارعا ماساڭ كۇيدە كەلۋ, قر اقبتك-ءنىڭ 667-بابىنىڭ 1-بولىگى, ياعني قۇقىق قورعاۋ ورگانى قىزمەتكەرىنىڭ زاڭدى تالابىنا باعىنباۋ جانە قر اقبتك-ءنىڭ 434-بابىنىڭ 1-بولىگى ياعني ۇساق بۇزاقىلىق بويىنشا بىردەن ءۇش اكىمشىلىك حاتتاما تولتىردى.
قوعامدىق ورىنداردا ماساڭ كۇيدە بولۋ فاكتىسى بويىنشا ولارعا 5 اەك مولشەرىندە ايىپپۇل سالىندى, سونداي-اق اكىمشىلىك قۇقىق بۇزۋشىلىق تۋرالى زاڭنامانىڭ جوعارىدا كورسەتىلگەن ەكى بابى بويىنشا ماتەريالدار پروتسەسسۋالدىق شەشىم قابىلداۋ ءۇشىن الماتى قالاسىنىڭ مامانداندىرىلعان اۋدانارالىق اكىمشىلىك سوتىنا جولداندى.
