پرەزيدەنتتىك مادەنيەت ورتالىعىندا قازاقتىڭ ءبىرتۋار پەرزەنتى, الاشتىڭ ارداقتى ازاماتى, قوعام قايراتكەرى, اقىن, جازۋشى, كوسەمسوزشى مىرجاقىپ دۋلاتوۆتىڭ 125 جىلدىق تويىنا ارنالعان سالتاناتتى كەش بولىپ ءوتتى. كەشتى مادەنيەت ءمينيسترى مۇحتار قۇل-مۇحاممەد ءسوز سويلەپ اشتى.
مىرجاقىپ دۋلات ۇلىنىڭ ءومىرى مەن شىعارماشىلىعى جايىندا ارنايى تۇسىرىلگەن “ۇرپاققا امانات” اتتى بەينەفيلم كورەرمەندەرگە ۇسىنىلعاننان كەيىن ورتاعا شىققان مينيستر: ء“ار قازاقتىڭ جۇرەگىنەن ورىن العان, حالقىنا “ويان, قازاق!” دەپ ۇران تاستاعان مىرجاقىپ مۇرالارى حالقىمەن بىرگە جاساي بەرمەك. اياۋلى تۇلعانىڭ مەرەيتويىنىڭ پرەزيدەنتتىك مادەنيەت ورتالىعىنان باستالعانى ۇلكەن تويدىڭ باستاۋى بولادى دەپ سەنەمىن”, – دەدى. مۇنان كەيىن كەش تىزگىنىن جۇرگىزۋدى پرەزيدەنتتىك مادەنيەت ورتالىعىنىڭ ديرەكتورى, پروفەسسور مىرزاتاي جولداسبەكوۆ الدى. عالىم مىرجاقىپ مۇرالارىنا ءبىرشاما توقتالا كەلە, وتكەن جىلى گۇلنار مىرجاقىپقىزىنىڭ اتالمىش ورتالىقتىڭ مۇراجايىنا اكەسىنىڭ ۇدايى ۇستىنەن تاستاماعان شەكپەنىن تاپسىرعانىن جانە سول شەكپەندى كورەرمەن نازارىنا ۇسىناتىندىعىن ايتتى. حح عاسىردىڭ باسىنداعى قازاقتىڭ اعارتۋشىلىق, دەموكراتتىق باعىتتاعى وقىعان ازاماتتاردىڭ ءبىرى, تالانتتى قالامگەر, قوعام قايراتكەرى مىرجاقىپ دۋلاتوۆ ەدى. الاش ازاماتتارىنىڭ اۋمالى-توكپەلى زاماندا ەلدىڭ بولاشاعى ءۇشىن اتقارعان كۇرەسكە تولى قوعامدىق-ساياسي قىزمەتى, اعارتۋشىلىق-شىعارماشىلىق مول مۇراسى – قازاق ءۇشىن باعا جەتپەس قىمبات قازىنا. ال ونىڭ ەسىمى حالقى ءۇشىن اياۋلى, ەلىنە قۇرمەتتى بولىپ ماڭگىلىك جاساي بەرەدى. مىرجاقىپ قوعامدا دا, ادەبيەتتە دە حالقىنىڭ تاۋەلسىزدىگىن ءبىرىنشى كەزەككە قويعان جان. ول ءوز شىعارمالارىندا تۋعان ەلىن وياتۋعا ۇمتىلدى. “الاش” قوزعالىسىنىڭ بەلسەندى قايراتكەرى بولدى. كەڭەس زامانىندا م.دۋلاتوۆتىڭ ەسىمى مەن ادەبي مۇراسى تۋرالى ايتۋعا دا, جازۋعا دا تىيىم سالىندى. ەلىمىز ءوز تاۋەلسىزدىگىن العان تۇستا عانا مىرجاقىپ حالقىنا قايتىپ ورالدى. ەسىمى دە, شىعارماشىلىق مۇراسى دا تولىق اقتالىپ, ول بۇگىنگى ۇرپاقتىڭ قولىنا جەتىپ وتىر. كەش بارىسىندا بەكبولات تىلەۋحان, سەكەن تۇرىسبەكوۆ, عازيزا جۇمەكەنوۆا باستاعان ونەر شەبەرلەرى جانە استانا قالاسىنىڭ مەملەكەتتىك فيلارمونياسىنىڭ كامەرالىق حورى ءوز ونەرلەرىن ورتاعا سالدى. ءابدىراحمان قىدىربەك.
