ءمينيستردىڭ ايتۋىنشا, ۆەدومستۆو ەكولوگيالىق اعارتۋدى جۇيەلى تۇردە دامىتۋ ءۇشىن ەكولوگيالىق ءبىلىم بەرۋ ستاندارتىنىڭ جوباسىن ازىرلەۋ ۇستىندە. قۇجاتتىڭ نەگىزگى ماقساتى – ەكولوگيا تاقىرىبىن ءبىلىم مازمۇنىنا ءۇستىرت قوسىمشا رەتىندە ەمەس, تاربيەلىك ءارى دۇنيەتانىمدىق وزەك رەتىندە ورنىقتى ەنگىزۋ.
«وقۋ-اعارتۋ مينيسترلىگى «تازا قازاقستان» جالپىۇلتتىق جوباسى اياسىندا كەشەندى ءارى جۇيەلى جۇمىستى جۇزەگە اسىرۋدا. وسى باعىتتاردىڭ ءبىرى – ەكولوگيالىق ءبىلىم بەرۋ ستاندارتى. ونىڭ باستى مىندەتى – ەكولوگيا ماسەلەسىن ءبىلىم مازمۇنىندا تەرەڭ ءارى تۇراقتى تۇردە قامتۋ. كونستيتۋتسيالىق رەفورمالار اياسىندا جاڭا كونستيتۋتسيا جوباسىندا تابيعاتتى قورعاۋ نورمالارى ناقتى بەكىتىلدى. بۇل ازامات پەن مەملەكەت اراسىنداعى ەكولوگيالىق جاۋاپكەرشىلىكتى كۇشەيتەتىن ماڭىزدى قۇقىقتىق نەگىز», دەدى مينيستر.
س.پونومەرەۆ: «تازا قازاقستان» – كونستيتۋتسياداعى جاڭا جاۋاپكەرشىلىك ولشەمى
سونداي-اق جۇلدىز سۇلەيمەنوۆانىڭ مالىمدەۋىنشە, بۇگىندە «ادال ازامات» ءبىرتۇتاس تاربيە باعدارلاماسى ءۇش نەگىزگى يدەياعا سۇيەنىپ جۇزەگە اسىرىلىپ وتىر. ولار – ەڭبەك ادامى, «زاڭ مەن ءتارتىپ» قاعيداتى جانە «تازا قازاقستان» جالپىۇلتتىق باستاماسى. وسىلار ارقىلى وقۋشىلار مەن جاسوسپىرىمدەردىڭ بويىندا ەكولوگيالىق سانانى قالىپتاستىرۋ كوزدەلگەن.
مينيستر ەكولوگيانى تەك پاندىك ءبىلىم شەڭبەرىندە عانا ەمەس, ءومىر سالتى مەن قۇندىلىقتىق باعدار رەتىندە ورنىقتىرۋ ماڭىزدى ەكەنىن اتاپ ءوتتى. تابيعاتقا جاۋاپكەرشىلىكپەن قاراۋ – جاس ۇرپاقتىڭ ازاماتتىق بولمىسىنىڭ اجىراماس بولىگىنە اينالۋى ءتيىس. وسى تۇرعىدان العاندا, ەكولوگيالىق اعارتۋ جاڭا كونستيتۋتسيا جوباسىنداعى قاعيداتتارمەن ساباقتاسىپ, ۇزاقمەرزىمدى قوعامدىق دامۋدىڭ ىرگەتاسىن قالىپتاستىرادى.
