پرەزيدەنت • 26 قازان، 2020

مەملەكەت باسشىسى اسقار ءماميندى قابىلدادى

155 رەت كورسەتىلدى

پرەزيدەنتكە سانيتارلىق-ەپيدەميالىق جاعدايدى تۇراقتاندىرۋ ءۇشىن قابىلدانىپ جاتقان شارالار جانە ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى تۋرالى باياندالدى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

اسقار مامين پرەزيدەنتكە ەلىمىزدەگى سانيتارلىق-ەپيدەميالىق جاعدايدىڭ باقىلاۋدا ەكەنىن جەتكىزدى. سونداي-اق كوروناۆيرۋس ىندەتىنىڭ جاڭا تولقىنىنا دايىندىق جۇمىستارى اياسىندا جۇزەگە اسىرىلىپ جاتقان شارالار تۋرالى مالىمەت بەرىلدى. اتاپ ايتقاندا مەديتسينالىق ۇيىمدار مەن حالىقتى ءدارى-دارمەكپەن قامتاماسىز ەتۋ، ەمدەۋ نىساندارىنا جاساندى تىنىس بەرۋ اپپاراتتارى مەن وتتەگى كونتسەنتراتتارىن جەتكىزۋ، ايماقتاردى جىلجىمالى دياگنوستيكالىق كەشەندەرمەن، تسيفرلىق رەنتگەن-اپپاراتتارمەن، ءموبيلدى توپتارمەن جانە جەدەل مەديتسينالىق كومەك كورسەتۋ كولىكتەرىمەن جابدىقتاۋ جۇمىستارى جۇرگىزىلۋدە. قازىرگى ۋاقىتتا 13 ايماقتىڭ 10-ىندا مودۋلدىك جۇقپالى اۋرۋحانالاردىڭ قۇرىلىسى اياقتالعان، قالعان 3 نىسان وسى جىلدىڭ قاراشا ايىنىڭ سوڭىنا دەيىن پايدالانۋعا بەرىلەدى.

مەملەكەت باسشىسىنا رەسپۋبليكالىق جانە ايماقتىق تۇراقتاندىرۋ قورلارىنىڭ قۇرىلعانى جانە دەنساۋلىق ساقتاۋ جۇيەسىنە ارنالعان 91 ءتۇرلى ءدارى-دارمەك پەن جەكە قورعانىش قۇرالدارىنىڭ ەكى ايلىق قورى جاساقتالعانى تۋرالى ايتىلدى. ءدارى-دارمەكتەردىڭ تاپشىلىعىن بولدىرماۋ ءۇشىن ءدارىحانالاردىڭ بولشەك ساۋدا جۇيەسىندە سۇرانىسقا يە 33-تەن استام پرەپارات قورى قوسىمشا جاساقتالۋدا. 

اسقار مامين قاسىم-جومارت توقاەۆقا پتر تەست سىنامالارىن الۋ كولەمىن ارتتىرۋ جۇمىستارى تۋرالى دا مالىمەت بەردى. ونىڭ ايتۋىنشا، زەرتحانالار سانى 124-كە دەيىن كوبەيىپ، تەستىلەۋ قۋاتى تاۋلىگىنە 66 مىڭعا دەيىن جەتتى. بۇل رەتتە، تۇرعىنداردى تەست سىنامالارىمەن قامتۋ 2،5 ەسە ۇلعايتىلىپ، پتر تەست سىنامالارىن الۋ قۇنى تومەندەتىلدى.

بۇدان بولەك، اسقار مامين پرەزيدەنتكە شەكارالىق وتكىزۋ بەكەتتەرىندە، سونداي-اق كولىكتىڭ بارلىق تۇرلەرى مەن ينفراقۇرىلىمدارىندا سانيتارلىق-ەپيدەميالىق باقىلاۋدىڭ كۇشەيتىلگەنى تۋرالى باياندادى. سونىمەن قاتار وڭىرلەردەگى بيزنەس سۋبەكتىلەرىنىڭ جۇمىسى بىرتىندەپ قايتا قالپىنا كەلتىرىلۋدە. وسى رەتتە، ايماقتا ۆيرۋس جۇقتىرۋ ءوسىمىنىڭ تىركەلمەۋى، تۇراقتى ەپيدەميالىق احۋالدىڭ "جاسىل" دەڭگەيدە بولۋى ەسكەرىلەدى.

پرەمەر-مينيستر مەملەكەت باسشىسىنا كاسىپكەرلەردى قولداۋ، شەتەلدەن ينۆەستيتسيا تارتۋ، جۇمىسپەن قامتۋ ءىسىن دامىتۋ جانە ەلىمىزدى الەۋمەتتىك-ەكونوميكالىق تۇرعىدان وركەندەتۋدىڭ باسقا دا وزەكتى ماسەلەلەرى جونىندە قابىلدانعان شارالار تۋرالى باياندادى.

پرەزيدەنت كوروناۆيرۋس پاندەمياسىنىڭ الداعى ايلارداعى تارالۋىنا قاتىستى دۇنيەجۇزىلىك دەنساۋلىق ساقتاۋ ۇيىمىنىڭ پەسسيميستىك بولجامدارىن ەسكەرىپ، ۇكىمەت بەلگىلەگەن جوسپاردىڭ مۇلتىكسىز ورىندالۋىنىڭ ماڭىزدى ەكەنىن اتاپ ءوتتى. كارانتيندى كۇشەيتۋ جونىندەگى قاتاڭ شارالاردى كاسىپكەرلەردىڭ مۇددەلەرىن جانە جالپى ەلىمىزدىڭ ەكونوميكالىق دامۋىن ەسكەرە وتىرىپ قابىلداعان ءجون.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار