ساۋدا جانە ينتەگراتسيا ءمينيسترى ايىپ وتكەندەي, ەۋرازيالىق ەكونوميكالىق وداق جانە ورتالىق ازيا ءوڭىرى ەلدەرىنىڭ بالامالى جۇيەلەرىن ينتەگراتسيالاي وتىرىپ, ۇلتتىق تاۋار وتكىزۋ جۇيەسىن قۇرۋ – مەملەكەت باسشىسىنىڭ ماڭىزدى تاپسىرماسى بولىپ تابىلادى.
"قازاقستاندا ۇتج 24 كوتەرمە-تاراتۋ ورتالىعىنتان تۇراتىن بولادى, ولار فەرمەرلىك ءونىمدى ساقتاۋ جانە قايتا تاراتۋ بويىنشا كورسەتىلەتىن قىزمەتتەردىڭ تولىق كەشەنىن كورسەتۋگە باعىتتالادى. مۇنداي ورتالىقتاردى قۇرۋ شيكىزاتتى ساتىپ الۋ, ءونىمدى ءوندىرۋ جانە وتكىزۋ كەزىندە جەكە قوسالقى شارۋاشىلىقتاردى قوسا العاندا, كوپتەگەن شارۋاشىلىقتاردىڭ كۇش-جىگەرىن شوعىرلاندىرۋعا مۇمكىندىك بەرەدى. ءبىر مەزگىلدە بارلىق اۋىل شارۋاشىلىق وندىرۋشىلەرىن كەپىلدى تاۋار وتكىزىلىمىمەن جانە كىرىس وسىمىمەن قامتاماسىز ەتەدى. جوبا پراكتيكا جۇزىندە ىسكە اسىرۋ ساتىسىنا شىعۋدا. قازاننىڭ باسىندا العاشقى 7 كوتەرمە-تاراتۋ ورتالىعىنىڭ قۇرىلىسىنا مۇددەلى بيزنەس-كونسورتسيۋم كومپانيالار جەكە قارجى باستاماسىمەن مينيسترلىككە ءوتىنىش ءبىلدىردى. قازىر ولارمەن جۇمىستار جۇرگىزىلۋدە", - دەدى باقىت سۇلتانوۆ.
سپيكەر اتاپ وتكەندەي, اتالعان 7 وبەكتى پاۆلودار وبلىسىنىڭ ميچۋرينو اۋىلى مەن اقسۋ قالاسىندا, الماتى وبلىسىنىڭ قاپشاعاي قالاسىندا, جامبىل وبلىسىنىڭ شۋ قالاسىندا, سونداي-اق نۇر-سۇلتان, شىمكەنت جانە الماتى قالالارىندا ورنالاساتىن بولادى.
"تاۋار وتكىزۋ جۇيەسىنىڭ فۋنكتسيونالدىق مۇمكىندىگى قازاقستاندىقتىڭ "تسيفرلىق الەۋمەتتىك ءاميانى" بولادى. ونى ەنگىزۋدى پىسىقتاۋ بيىلعى جولداۋدا تاپسىرىلدى. بۇل ءبىر جاعىنان, ازاماتتارعا الەۋمەتتىك كومەككە بولىنەتىن بيۋدجەتتىك رەسۋرستاردىڭ نىسانالى پايدالانىلۋىن جانە ەكىنشى جاعىنان, وتاندىق تاۋار وندىرۋشىلەرگە جاسىرىن قولداۋ تۇرىندە ولاردى "قايتارۋدى" قاداعالاۋ ءۇشىن جاسالادى. ياعني, تسيفرلىق ءاميان ءبىزدىڭ بيزنەس جۇزەگە اسىراتىن الەۋمەتتىك ماڭىزدى تاۋارلار, جۇمىستار نەمەسە كورسەتىلەتىن قىزمەتتەر ءۇشىن تولەم تولەۋگە ارنالعان», - دەدى مينيستر ولاردىڭ ءوزارا بايلانىسىنا مىسال كەلتىرە وتىرىپ.
"ۇلتتىق تاۋار وتكىزۋ جۇيەسىنىڭ مەحانيزمى – ءونىمدى ساتىپ الۋشىعا ءتيىمدى جانە تەز جەتكىزۋ, بىلايشا ايتقاندا, "القاپتان سورەگە دەيىن", سونىمەن قاتار, ونى ساقتاۋ. بۇل جاعدايدا تۇتىنۋشى الاتىن اسەر – قوسىمشا جارناماسىز جانە ەڭ جاقسى ساپاداعى ءونىم. ال الەۋمەتتىك كومەك الاتىن ازاماتتار قولما-قول اقشاسىز ەسەپ ايىرىسۋدىڭ ارنايى جۇيەسى ارقىلى وسى وتاندىق تاۋارلاردى ساتىپ الىپ, اقشانى فەرمەرلەرگە تىكەلەي جىبەرە الادى. وسىلايشا, ءوندىرۋشى مەن تۇتىنۋشىنىڭ ءبىر-بىرىنە دەگەن ءوزارا ءتيىمدى قىزىعۋشىلىقتارىن بىرىكتىرە وتىرىپ, ءبىز ۇتج ارقىلى تاۋار-اقشا اينالىمىنىڭ وزىندىك ءبىر ءتۇرىن جابامىز", - دەدى باقىت سۇلتانوۆ.
مينيستر جۇمىستاردى ۇيلەستىرۋ ءۇشىن ەڭبەك, تسيفرلىق دامۋ جانە قارجى مينيسترلىكتەرىمەن, ۇلتتىق بانكپەن جانە قارجى سەكتورىنداعى قوعامدىق ۇيىمدارمەن بىرلەسكەن جۇمىس توبى قۇرىلعانىن اتاپ ءوتتى.
