ءىس-شاراعا بۇۇ باس حاتشىسى انتونيۋ گۋتەرريش, سىرتقى ىستەر ءمينيسترى مۇحتار تىلەۋبەردى, سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى اقمارال ارىستانبەكوۆا جانە باسقا دا كوپتەگەن ديپلوماتيالىق كورپۋستىڭ, ازاماتتىق جانە ىسكەر قوعامداستىقتاردىڭ, باق پەن مادەنيەت وكىلدەرى قاتىستى.
بۇۇ ءوزىنىڭ 75 جىلدىق مەرەيتويىن اۋىر ەكونوميكالىق جانە الەۋمەتتىك زارداپتارى بار, بۇرىن-سوڭدى بولىپ كورمەگەن جاھاندىق كۇيزەلىس كەزىندە اتاپ وتۋدە. بۇۇ كۇنى ۇيىم قىزمەتى مەن جەتىستىكتەرىن بەلگىلى ءبىر تۇردە قورىتىندىلاۋ جانە الەم نازارىن ۇيىمنىڭ جوعارى ميسسياسىنا اۋدارۋ ماقساتىندا دۇنيەجۇزىندە كەزدەسۋلەر, دوڭگەلەك ۇستەلدەر مەن كورمەلەر وتكىزىلەدى.
قازاقستان UN75 جاھاندىق ساۋالناماسىنىڭ ەڭ بەلسەندى قاتىسۋشىلارىنىڭ بىرىنە اينالدى. ساۋالناماعا 35 مىڭنان استام قازاقستاندىق قاتىسىپ, رەسپوندەنتتەردىڭ كوپشىلىگى حالىقارالىق ىنتىماقتاستىقتى نىعايتۋ, دەنساۋلىق ساقتاۋ سالاسى, كوشى-قون جانە كليماتتىڭ وزگەرۋىنە نازار اۋدارۋ كەرەكتىگىن اتاپ ءوتتى.
بۇۇ-نىڭ قازاقستانداعى تۇراقتى ۇيلەستىرۋشىسىنىڭ مىندەتىن اتقارۋشى ياكۋپ بەريش ۇيىمنىڭ ەلىمىزدەگى جۇمىسىنا توقتالدى.
"بۇۇ-نىڭ قازاقستانداعى وكىلدىگى جۇمىس ىستەي باستاعاننان بەرى ۇيىمنىڭ ەلدىك توبى تۇراقتى دامۋ ماقساتتارىنا جەتۋ ءۇشىن قازاقستان حالقى مەن ۇكىمەتىنە ايتارلىقتاي قولداۋ كورسەتىپ كەلەدى. وسىعان بايلانىستى ءبىز بۇۇ-نىڭ تۇراقتى دامۋ جونىندەگى ىنتىماقتاستىقتىڭ جاڭا شەڭبەرلىك باعدارلاماسىنا ۇلتتىق سەرىكتەستىكتەردىڭ باسىم كۇشتەرىن شوعىرلاندىرۋ جانە رەسۋرستاردى جۇمىلدىرۋ ارقىلى, سونىڭ ىشىندە, ۇكىمەت, ازاماتتىق قوعام, عىلىمي قاۋىمداستىقتار, جەكە سەكتور, بۇقارالىق اقپارات قۇرالدارى, حالىقارالىق قوعامداستىق جانە ۇيىمنىڭ ءوزى قاتىساتىن 2030 جىلعى كۇن ءتارتىبىن ىسكە اسىرۋ مىندەتىن ءارى قاراي جۇزەگە اسىرۋدىڭ تەتىگى رەتىندە قاراستىرامىز", دەپ اتاپ ءوتتى ياكۋپ بەريش.
تىكەلەي ەفير كەزىندە ءىس-شارا قاتىسۋشىلارى بۇۇ-نىڭ 75 جىلدىعىنا ارنالعان بەينەكليپتىڭ تۇساۋكەسەرىن تاماشالادى. بەلگىلى مۋزىكانت, نۇر-سۇلتان قالاسى فيلارمونياسىنىڭ سيمفونيالىق وركەسترىنىڭ ديريجەرى ەرنار نۇرتازين "نازقوڭىر" جانە "بالبىراۋىن" شىعارمالارىن ورىندادى.
سونىمەن قاتار UN75 جاھاندىق ناۋقانىنىڭ اياسىندا الەم بويىنشا 200-دەن استام عيمارات, باعدارلار مەن كوپىرلەر كوك تۇسكە بويالادى. حالىقارالىق ناۋقانعا قازاقستان دا قوسىلدى. 23-24 قازان ارالىعىندا نۇر-سۇلتان, الماتى قالالارى تۇرعىندارى مەن قوناقتارى "بايتەرەك" مونۋمەنتى, "قازاقستان تەمىر جولى" عيماراتى جانە "قازاقستان" قوناق ءۇيى سەكىلدى كورىكتى جەرلەردىڭ بۇۇ-نىڭ كوك تۇسىنە بويالعانىن تاماشالادى.
