مەديتسينا • 26 قازان، 2020

ينفەكتسيالىق گوسپيتال پايدالانۋعا بەرىلدى

30 رەت كورسەتىلدى

وڭىردە كوروناۆيرۋستىڭ ەكىنشى تولقىنى بولعان جاعدايدا ىندەتتىڭ الدىن الۋ ءۇشىن جۇمىستار جۇرگىزىلۋدە. قازىرگى تاڭدا 3 900 ورىن دايىندالىپ، وكپەنى جاساندى تىنىستاندىراتىن 20 اپپارات بارلىق اۋرۋحاناعا تاراتىلدى. سونداي-اق 2 وتتەگى ستانساسى جۇمىس ىستەپ تۇر، الداعى ايلاردا تاعى 7-ەۋى ورتالىق اۋرۋحانالارعا ورناتىلادى.

سۋرەتتى تۇسىرگەن ۆالەري بۋگاەۆ

وبلىس اكىمدىگىنىڭ مالىمەتىنشە، قازىرگى ۋاقىتتا وبلىستىق جەدەل جاردەم ستانساسى ءۇشىن جاڭا 109 رەانوموبيل ساتىپ الىندى. وتتەگى نۇكتەلەرىنىڭ سانىن جىل باسىنداعى جاعدايمەن سالىس­تىرعاندا التى ەسەگە كوبەيتۋ كوزدە­لىپ وتىر. وكپەنى جاساندى تىنىستاندىرۋ اپپا­رات­تارىنىڭ سانى ەكى ەسە وسسە، ەندى قاراشا ايىنىڭ ورتاسىنا دەيىن ءۇش ەسەگە ارتادى. وڭىردە قوسىمشا ەكى پتر-زەرتحانا ىسكە قوسىلدى، جوسپار بويىنشا تاعى ەكى زەرتحانا اشۋ كوزدەلگەن. سونىمەن قاتار 580 مەديتسينا قىزمەتكەرىنەن تۇراتىن كادرلىق قور قۇرىلدى. وبلىس كۇزدەگى تولقىنعا تولىعىمەن دايىن بولسا، ماماندار تۇرعىنداردى بوساڭسىپ كەتپەۋگە شاقىردى. ءوز يممۋنيتەتتەرىن كوتەرىپ، تۇماۋ مەن جرۆي-گە قارسى ەكپە سالۋدى ۇسىندى، قازىر 80 مىڭعا جۋىق تۇرعىن تۇماۋعا قارسى ۆاكتسينا الدى. وڭىرلىك تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپار­تا­مەنتىنىڭ مالىمەتىنشە، كۆي جۇق­تىر­عان 4 115 ادامنىڭ راستالعان جاع­دا­يى تىركەلگەن.

الداعى ۋاقىتتا بولۋى مۇمكىن كۆي-ءدىڭ ەكىنشى تولقىنىنا دايىندىق اياسىندا وبلىستا مەديتسينالىق ۇيىمداردىڭ رەسۋرستىق قامتىلۋى، دارىگەرلەردى قايتا دايارلاۋ مەن تۇرعىنداردى تۇماۋدان ەرتە ۆاكتسينالاۋ شارالارى قولعا الىنۋدا. وبلىستىڭ 212 ءدارىحاناسىنا 2،8 ملن قىزۋدى تومەندەتەتىن جانە ۆيرۋسقا قارسى پرەپاراتتار جەتكىزىلدى. بۇل حالىقتىڭ وسى دارىلەرگە دەگەن ءۇش ايلىق قاجەتتىلىگىن وتەۋگە جەتەتىن مولشەر.

ال جۋىردا وبلىس ورتالىعىنىڭ شەت­كى اۋماعىندا جاز ايىندا قۇرىلىسى باس­تالعان ءمودۋلدى ينفەكتسيالىق اۋرۋ­حا­نا پايدالانۋعا بەرىلدى. اۋرۋحانا باسشىسى ارمان مۇسابەكوۆتىڭ ايتۋىنشا، ەمدەۋ ورنى وتە قىسقا مەرزىمدە زامان تالابىنا ساي سالىندى. بارلىق زاماناۋي تەحنيكامەن جابدىقتالدى. مۇندا ساپالى مەديتسينالىق كومەك كورسەتۋ ءۇشىن بارلىق جاعداي جاسالعان.

– وكىنىشكە قاراي ىندەتتىڭ تارالۋى جاڭا ينفەكتسيالىق اۋرۋحانا سالۋعا ءماجبۇر ەتتى. جاڭا گوسپيتالدىڭ سالىنۋى – كەز كەلگەن جاعدايعا دايىن بولۋىمىز كەرەك دەگەن ءسوز. ەكىنشىدەن، تاۋلىك بويى بىرنەشە اۋىسىمدا جۇمىس ىستەگەن قۇرىلىسشىلارعا العىس ايتامىز، – دەدى وبلىس اكىمى ابىلقايىر سقاقوۆ اۋرۋحانانىڭ اشىلۋ ساتىندە.

وبلىستىق، رەسپۋبليكالىق بيۋدجەتتەن قارجىلاندىرىلعان بۇل جوبانىڭ قۇنى – 7،3 ملرد تەڭگە. اۋرۋحانا 200 ادامعا ارنالعان، جانساقتاۋ ءبولىمى، كىشى وتا جاساۋ ءبولىمى، پتر-تەستىلەۋ زەرتحاناسى، ەكسپرەسس-زەرتحانا، كومپيۋ­تەر­لىك توموگرافيا، رەنتگەنوگرافيا، ۋزي، ەلەكتروكارديوگرافيا مەن برونحوسكوپيا بولىمدەرىنەن تۇرادى. مودۋلدىك بلوكتاردا جەكە سانيتارلىق توراپتى ەكى ورىندىق پالاتالار دا بار. قاجەتتى تەحنيكا جانە جيھازبەن تولىق جابدىقتالدى. گوسپيتالدا وكپەنى جاساندى تىنىستاندىراتىن 24 اپپارات جانە ءاربىر ادامعا ارنالعان وتتەگىمەن قامتۋ جۇيەلەرى جاسالعان. جاڭا اۋرۋحانا وبلىس ورتالىعىنداعى ع.سۇلتانوۆ اتىنداعى وبلىستىق اۋرۋحانانىڭ بولىمشەسى رەتىندە قىزمەت اتقارادى. ورتالىقتا تاجىريبەلى 88 دارىگەر، 240 ورتا جانە كىشى ساناتتاعى مەديتسينالىق قىزمەتكەر ەڭبەك ەتۋدە. ىندەت تارالۋى ازايعان سوڭ ورتالىق وبلىستىق اۋرۋحانانىڭ پۋلمانولوگيا بولىمشەسى بولادى.

– ينفەكتسيالىق اۋرۋحانا مەدي­تسي­نا­­لىق كومەك كورسەتۋ ءۇشىن جاڭا جاب­دىق­تارمەن، ونىڭ ىشىندە كومپيۋ­تەر­لىك تو­موگرافپەن، تسيفرلىق رەنتگەن-اپپا­راتپەن، بارلىق پالاتالارعا ورتا­لىقتان­دىرىلعان وتتەگى جەتكىزۋ جۇيە­سىمەن جانە وكپەنى جاساندى تىنىستاندىراتىن 24 اپپاراتپەن جابدىقتالعان، – دەيدى ارمان مۇسابەكوۆ.

 

پاۆلودار وبلىسى

 

سوڭعى جاڭالىقتار

ۇقساس جاڭالىقتار