كورەيا رەسپۋبليكاسىنىڭ قازاقستانداعى ەلشىلىگى قر دسم تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ "ۇلتتىق ساراپتاما ورتالىعى" شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنا COVID-19 پاندەمياسىمەن كۇرەس ءۇشىن گۋمانيتارلىق كومەك تابىستادى.
قازاقستانعا كورەيادان شىعارىلعان 38 800 پتر-تەست جيىنتىعىن گۋمانيتارلىق كومەك رەتىندە جەتكىزىلدى. ولار ۇلتتىق ساراپتاما ورتالىعىنىڭ نۇر-سۇلتان, الماتى قالاسى, تۇركىستان, جامبىل, الماتى, شىعىس قازاقستان وبلىسىنداعى فيليالدارىنا تاراتىلادى.
"قازاقستان ۇكىمەتىنىڭ ۋاقىتىلى قابىلداعان شارالارىنىڭ ارقاسىندا COVID-19 پاندەمياسىنىڭ ءبىرىنشى تولقىنىن ەڭسەردى. قازىر بىرقاتار ەلدە ۆيرۋس جاپپاي تاراپ جاتقاندا قازاقستان پاندەميانىڭ ەكىنشى تولقىنىنا دايىندالىپ جاتىر. مەن كورەيا رەسپۋبليكاسىنىڭ گۋمانيتارلىق كومەگى قازاقستاننىڭ پاندەميانىڭ ەكىنشى تولقىنىمەن كۇرەسىنە ۇلەس قوسادى دەگەن ۇمىتتەمىن", دەدى كورەيا ەلشىسى كۋ حونگ-سوك.
ديپلومات كورەيا ۇكىمەتى قارتتار ءۇيى, بالالار ءۇيى, مەكتەپ جانە باسقا دا مەكەمەلەرگە قايىرىمدىلىق رەتىندە قورعانىس قۇرالدارىن ۇنەمى جەتكىزىپ وتىرعاننان بولەك, ۇكىمەت دەڭگەيىندە ۆيرۋسپەن كۇرەس ءۇشىن ونلاين كەڭەس وتكىزىلىپ جاتقانىن اتاپ ءوتتى.
بۇل – گۋمانيتارلىق كومەكتىڭ ءبىرىنشى پارتياسى. قوسىمشا تاعى FFP2 ستاندارتىنا ساي قورعانىش ماسكالارى (75 000 دوللار), سونداي-اق ددۇ جاھاندىق جەتكىزۋ كانالى (WHO Global supply chain) ارقىلى الىنعان, قۇنى 300 000 دوللار مەديتسينالىق جابدىقتار جەتكىزىلەدى.
"كورەيا رەسپۋبليكاسىمەن ءتۇرلى باعىت بويىنشا, ونىڭ ىشىندە دەنساۋلىق سالاسىندا دوستىق, ارىپتەستىك قاتىناسىمىز بايلانىستىرادى. مۇنداي قيىن كەزدە كورەيا ەلىنىڭ كومەگىن ەرەكشە باعالايمىز جانە وڭتۇستىك كورەيا بيلىگىنە العىس ايتامىز", دەدى دەنساۋلىق ساقتاۋ ۆيتسە-ءمينيسترى مارات شورانوۆ.
