ايماقتار • 15 قازان، 2020

قاراعاندى وبلىسىندا Saryarka ونلاين-سپارتاكياداسى باستالدى

97 رەت كورسەتىلدى

قاراعاندى وبلىسىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان Saryarka ونلاين-سپارتاكياداسى باستالدى، دەپ حابارلايدى Egemen.kz

ونلاين-رەجىمدە وتكەن سالتاناتتى اشىلۋ راسىمىندە وبلىس اكىمىنىڭ ورىنباسارى ابزال نۇكەنوۆ جارىسقا قاتىسۋشىلارعا ساتتىلىك تىلەدى.

– مەملەكەت باسشىسى بيىلعى جولداۋىندا بۇقارالىق سپورتتى دامىتۋعا ايرىقشا كوڭىل ءبولدى. سوندىقتان، ءبىزدىڭ ونلاين-سپارتاكيادا وڭىردەگى بۇقارالىق سپورتتى دامىتۋعا، سالاماتتى ءومىر سالتىن ناسيحاتتاۋعا يگى ىقپالىن تيگىزەدى دەپ ۇمىتتەنەمىز. سپارتاكياداعا قاتىسۋشىلارعا جاسىنا قاراي شەكتەۋلەر قويىلمايدى. جارىسقا تىلەك بىلدىرگەندەردىڭ ءبارى  باق سىناي الادى. قاتىسۋشىلاردىڭ بارلىعىنا ساتتىلىك تىلەيمىن، مىقتىلاردىڭ مەرەيى ۇستەم بولسىن! – دەدى ول.

قاراعاندى وبلىستىق دەنە شىنىقتىرۋ جانە سپورت باسقارماسى ۇيىمداستىرعان بۇل وبلىستىق سپارتاكيادا 14-18 قازان ارالىعىندا سپورتتىڭ توعىز ءتۇرى بويىنشا وتەدى.

وبلىس سپورتىنىڭ باسشىسى تەمىرحان ابىلاەۆ بيىلعى دودانىڭ ءوڭىردىڭ اۋداندارى مەن قالالارى اراسىندا وتەتىنىن ايتتى.

1

– ءار اۋدان جانە قالا جارىستى وزىندە وتكىزەدى. سپارتاكيادانى وتكىزگەننەن كەيىن ۇيىمداستىرۋشىلار بارلىق سپورت تۇرلەرى بويىنشا باس تورەشىلەرگە تولىققاندى اقپارات بەرەدى. سونىڭ قورىتىندىسى بويىنشا جەڭىمپازدار مەن جۇلدەگەرلەر انىقتالادى. اۋداندار مەن قالالاردىڭ كوماندالارىن ماراپاتتاۋ بولەك وتكىزىلەدى، – دەدى وبلىستىق دەنە شىنىقتىرۋ جانە سپورت باسقارماسىنىڭ باسشىسى.

سپارتاكيادا جارىستارى شاحمات، دويبى، بەس اسىق، توعىزقۇمالاق، جەڭىل اتلەتيكا (جۇگىرۋ، ورنىنان سەكىرۋ)، كۇش گيمناستيكاسى، پاۋەرليفتينگ (جاتىپ سىعىمداپ كوتەرۋ)، فۋتبول (دوپپەن جونگلەرلىك ەتۋ) جانە كىر تاسىن كوتەرۋ  سياقتى سپورت تۇرلەرى بويىنشا وتكىزىلىپ، دودادا 2 مىڭعا جۋىق ادام باق سىناماقشى.

ايتا كەتەتىن ءبىر جايت، شاحمات پەن دويبىدان وتەتىن جارىستا قاتىسۋشىلاردىڭ جاسىنا شەكتەۋ قويىلمايدى. بەس اسىق سىنىندا وبلىس تۇرعىندارى 14 جاستان، توعىزقۇمالاقتا 10 جاستان باستاپ قاتىسۋ مۇمكىندىگىنە يە. جەڭىل اتلەتيكا جارىستارىندا بالالار مەن ەرەسەكتەر جاس مولشەرلەرىنە قاراي قاتىسادى. كۇشتىك گيمناستيكادا 12 جاستان باستاپ زەينەتكەرلىك جاسىنداعىلارعا دەيىن كۇشتەرىن سىناي الادى. ال دوپپەن جونگلەرلىك ەتۋ دوداسىنا  قاتىسۋشىلار سەگىز جاستان باستاپ ونەر كورسەتەدى.

وبلىستىق Saryarka ونلاين-سپارتاكياداسىنىڭ جەڭىمپازدارى مەن جۇلدەگەرلەرى ارنايى مەدالدارمەن، ديپلومدارمەن جانە كۋبوكتارمەن ماراپاتتالادى.

سوڭعى جاڭالىقتار

ءالتىنساريننىڭ ادامي بولمىسى

رۋحانيات • بۇگىن، 00:01

ۋاقىت جاراتقان ۇلى جىر

ادەبيەت • كەشە

ۇقساس جاڭالىقتار