بۇۇ قۇرىلىمدارىنا قوسىلعان جاستار تۇراقتى دامۋ سالاسىندا ءوز بىلىكتىلىكتەرىن ارتتىرىپ, بىلىمدەرىن شىڭداي تۇسەدى. وعان قوسا ءوز تاجىريبەسىمەن ءبولىسىپ, ۆولونتەرلىكتىڭ دامۋىنا ۇلەس قوسا الادى. جاستاردىڭ بارلىق شىعىنى مەملەكەت تاراپىنان وتەلەدى.
بۇۇ ۆولونتەرلەردىڭ ەۋروپا جانە ورتالىق ازياداعى ايماقتىق مەنەدجەرى دميتري فريشين جاستاردىڭ الەمدىك الاڭدا تاجىريبە الماسۋىنا قازاقستاننىڭ اقپارات جانە قوعامدىق دامۋ مينيسترلىگىنىڭ قولداۋ بىلدىرگەنىن مالىمدەدى. «قازاقستاندىق جاستار بۇۇ قۇرىلىمدارىندا جۇمىسىن باستادى. تالانتتى ورەندەر تۇراقتى دامۋ جولىندا يننوۆاتسيالىق يدەيالارىمەن ءبولىسىپ, توتەنشە جاعدايلاردى شەشۋ سياقتى مىندەتتەر اتقارادى. كونكۋرس نەگىزىندە ىرىكتەلىپ الىنعان ۆولونتەرلەر ءوز ەلدەرىنىڭ تاجىريبەسىن حالىقارالىق ارەناعا جەتكىزۋمەن قوسا, قازاقستان مەن باسقا ەلدەر اراسىندا بايلانىس ورناتۋعا مۇمكىندىك الادى. سونىمەن بىرگە الەمدە بەيبىتشىلىك پەن دامۋدى قامتاماسىز ەتۋ ماقساتىندا حالىقارالىق ۆولونتەرلىكتى قولداۋمەن اينالىسادى», دەيدى مامان.
كونكۋرس تالاپتارى بويىنشا بۇۇ ۆولونتەرلەر قاتارىنا 18 بەن 29 جاس ارالىعىنداعى ازاماتتار تاڭدالدى. بۇعان دەيىن ۆولونتەرلىكپەن اينالىسقان, وزگە ەلدىڭ مادەنيەتى مەن ءتىلىن سىيلايتىن, حالىقارالىق قاتىناس, دامۋ سالاسىندا ءبىلىمى بار, بۇۇ جۇيەسىمەن تانىس جاستارعا باسىمدىق بەرىلدى.
حالىقارالىق ۇيىمعا تاجىريبە جيناۋعا كەتكەن مەرۋەرت سىزدىقبەكوۆا بۇگىندە بۇۇ-نىڭ «بۇۇ ايەلدەر» ايماقتىق ءوفيسىنىڭ قورشاعان ورتا جانە كليماتتىڭ وزگەرۋى بويىنشا مامانى بولىپ قىزمەت اتقارادى. «مەن بۇۇ-نىڭ ۆولونتەرى بولۋ تۇلعالىق دامۋىم ءۇشىن دە, كاسىبي تۇرعىدا دامۋىم ءۇشىن دە پايدالى دەپ بىلەمىن. مول تاجىريبە جيناپ, ءوز سالامدا پايدالى بايلانىس ورناتۋعا مۇمكىندىك تۋىپ تۇر. وعان قوسا بۇل – شەتەلدىكتەردەن ولاردىڭ مادەنيەتى تۋرالى تانىمىمدى كەڭەيتىپ, الەم ەلدەرىن ارالاۋعا قولايلى ءسات. ۋنيۆەرسيتەت قابىرعاسىندا ستۋدەنتتەرمەن «بۇۇ مودەلىن» ۇيىمداستىرىپ, وقۋ ورنىندا بۇۇ باس اسسامبلەياسى مەن قاۋىپسىزدىك كەڭەسىنىڭ جۇمىسىن قايتالاعانداي بولاتىنبىز. سول كەزدە كەلەشەكتە شىنىمەن بۇۇ سىندى ماڭىزدى حالىقارالىق ۇيىمنىڭ مۇشەسى بولاتىنىم ويىما كەلمەيتىن دە. بۇل باعدارلاما اياسىندا تۇراقتى دامۋ سالاسىنداعى وزىق تاجىريبەلەردى ۇيرەنىپ, تۋعان ەلىمە, بارلىق الەمگە پايدالى بولاتىن ەڭبەك سىڭىرەمىن دەگەن سەنىمىم بار», دەيدى.
بۇۇ-داعى قازاقستاننىڭ تۇراقتى وكىلى قايرات وماروۆ جاستار بۇل سالاداعى تاجىريبەلى مامانداردان ۇيرەنىپ, ەلدەگى ۆولونتەرلىكتى دامىتۋعا ۇلكەن ۇلەس قوسادى دەگەن سەنىمىن جەتكىزدى. «نەگىزىنەن, قازاقستانداعى ۆولونتەرلىكتىڭ تامىرى تەرەڭدە. قازاقستان بۇۇ-مەن بىرلەسىپ بەيبىتشىلىك پەن مەيىرىمدى دارىپتەۋگە كۇش سالىپ كەلەدى. 2019 جىلى قازاقستان ۇكىمەتىنىڭ بۇۇ ۆولونتەرلەر باعدارلاماسىمەن كەلىسىمشارت جاساۋى بۇعان جاقسى دالەل. بۇل باستاما ناتيجەسىندە 7 قازاقستاندىق حالىقارالىق ۆولونتەرلىكپەن اينالىسىپ, الەمدىك تاجىريبەنى ەلگە الىپ كەلۋ مۇمكىندىگىنە يە بولىپ وتىر», دەدى ق.وماروۆ.
زامانداستارىنان وق بويى وزىپ شىعىپ, حالىقارالىق ۆولونتەرلىككە قازاقستان اتىنان ۇلەس قوساتىندارعا توقتالساق. يوردانيا استاناسى اممانعا اتتانعان وتانداسىمىز اينۇر كانافينا دۇنيەجۇزى دەنساۋلىق ساقتاۋ ۇيىمىندا ساياسات ماسەلەلەرى بويىنشا كەڭەسشى بولىپ قىزمەت ەتەدى. بانگكوكقا كەتكەن فاريزا مۇقانوۆا حالىقارالىق ميگراتسيا ۇيىمىنىڭ ەڭبەك ميگراتسياسىن قولداۋ بولىمىندە قىزمەت اتقارادى. مەرۋەرت سىزدىقبەكوۆا – «بۇۇ ايەلدەر» قورىندا قورشاعان ورتا مەن كليماتتىڭ وزگەرۋى بويىنشا مامان. ول قازىر تۇركيانىڭ ىستانبۇل قالاسىندا تۇرادى. يۋنيسەف ۇيىمىنا ەكى بىردەي وتانداسىمىز اتتاندى. ۇيىمنىڭ نايروبيدەگى (كەنيا) بولىمىندە جۇمىسقا كىرىسكەن گۇلميرا تۇسىپبەكوۆا مەكتەپكە دەيىنگى ءبىلىم بەرۋ بولىمىندە بىلىكتىلىگىن شىڭدايدى. ال ديلشات ءجۇسىپوۆا يۋنيسەف-ءتىڭ بانگكوكتاعى بولىمشەسىنە كوممۋنيكاتسيا مامانى بولىپ جۇمىسقا تۇردى. بۇۇ-نىڭ دامۋ جونىندەگى باعدارلاماسى دا ەكى قازاقستاندىقپەن تولىقتى. دينا اقىلبەكوۆا مەن ديانا دۇيسەمباەۆا ىستانبۇلدا سەرىكتەستىكتى قولداۋ بويىنشا تاجىريبەدەن وتپەك. الداعى ۋاقىتتا حالىقارالىق ۇيىمداردا ءبىلىمىن سىناپ, تاجىريبەدەن ءوتىپ جاتقان وتانداستارىمىزبەن سۇحبات ۇسىنۋ ويىمىزدا بار.
