بايقاۋ ۇيىمداستىرۋشىلارى – نۇرسۇلتان نازارباەۆ قورى مەن مەملەكەتتىك ءتىلدى دامىتۋ قورى قازاقستاننىڭ ءار وڭىرىنەن كەلىپ تۇسكەن 100-دەن استام عىلىمي جۇمىستى ىرىكتەپ الدى.
نۇرسۇلتان نازارباەۆ قورىنىڭ اتقارۋشى ديرەكتورىنىڭ ورىنباسارى الكەي مارعۇلان: "بايقاۋدى ۇيىمداستىرۋ ارقىلى قازاقتىڭ ۇلى ويشىلى ابايدىڭ مۇراسىن ناسيحاتتاۋعا, دارىندى جاس عالىمداردى انىقتاۋعا جانە قولداۋعا, ولاردىڭ جۇمىسىن ناسيحاتتاۋعا كومەك كورسەتەمىز. وسىلايشا, ءبىز قوعامدا حالىق داستۇرلەرىن, ادامگەرشىلىك قۇندىلىقتارىن, ۇلىلاردىڭ بىرەگەي شىعارماشىلىعىن تانىتۋعا ىقپال ەتەمىز", دەپ اتاپ ءوتتى.
قۇرامىنا بەلگىلى قوعام قايراتكەرلەرى, ابايتانۋشى عالىمدار ەنگەن قازىلار القاسىنىڭ مۇشەلەرىنە بايقاۋ جەڭىمپازدارىن انىقتاۋ وڭاي بولعان جوق. قاتىسۋشىلاردىڭ جۇمىستارى يدەيالاردىڭ ەرەكشەلىگىمەن, دايەكتىلىگىمەن ناقتىلىعىمەن ەرەكشەلەندى.
قازىلار القاسىنىڭ قۇرامىندا فيلولوگيا عىلىمدارىنىڭ كانديداتى, اباي اتىنداعى قازۇپۋ جانىنداعى "ابايتانۋ عىلىمي-زەرتتەۋ ورتالىعىنىڭ" ديرەكتورى جابال شويىنبەت, جازۋشى, قازاقستان جازۋشىلار وداعىنىڭ مۇشەسى, قر ۇلتتىق كىتاپحاناسىنىڭ عىلىمي حاتشىسى بولات جۇنىسبەكوۆ, اقىن, قازاقستان جازۋشىلار وداعىنىڭ مۇشەسى, "Abaialemi.kz" ونلاين ەنتسيكلوپەدياسىنىڭ شەف-رەداكتورى قايسار قاۋىمبەك سىندى بەلگىلى قوعام قايراتكەرلەرى, ابايتانۋشى عالىمدار بار.
ستۋدەنتتەر اراسىندا بايقاۋ جەڭىمپازى, ارنايى ديپلوم مەن 300 000 تەڭگە كولەمىندەگى سىيلىقتىڭ يەگەرى ءال-فارابي اتىنداعى قازۇۋ-دىڭ ءىى كۋرس ستۋدەنتى ازىمبەك قويلىباي بولدى. ەكىنشى ورىن ءۇشىن ارنايى ديپلوم مەن 200 000 تەڭگەلىك سىياقى ەۋرازيا گۋمانيتارلىق ينستيتۋتىنىڭ IV كۋرس ستۋدەنتى اتاباي قۋانىشوۆ پەن ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ءىى كۋرس ستۋدەنتى عازيزوۆ نۇرايعا بەرىلدى. ءۇشىنشى ورىنعا ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ IV كۋرس ستۋدەنتى نازگۋل ايسەنوۆا, ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ءىىى كۋرس ستۋدەنتى گۇلسىماي سايرامبەك, نازارباەۆ ۋنيۆەرسيتەتىنىڭ ءىى كۋرس ستۋدەنتى ءمولدىر بيجانوۆا يە بولدى.
ماگيسترانتتار اراسىندا ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ ءى كۋرس ماگيسترى مۋستافا شوحاەۆ جەڭىمپاز اتانىپ, 400 000 تگ جۇلدەگە يە بولدى. ءال-فارابي اتىنداعى قازۇۋ-دىڭ ءىى كۋرس ماگيسترى اباي مىرزاعالي مەن قۇرمانعازى اتىنداعى قازاق ۇلتتىق كونسەرۆاتورياسىنىڭ ءىى كۋرس ماگيسترانتى شەرحان مۋحامبەتجانوۆ ەكىنشى ورىندى يەلەنىپ, ارقايسىسى 300 000 تەڭگەدەن سىياقى الدى. ءۇشىنشى ورىن يەگەرلەرى "تۇران-استانا" ۋنيۆەرسيتەتىنىڭ ءى كۋرس ماگيسترى كالياكبار ۇسەمحانعا, ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ءىى كۋرس ماگيسترى اقبوتا قاجىبەكوۆا مەن ءى كۋرس ماگيسترى زەينەگۋل جۋمابەكوۆاعا 200 000 تەڭگەدەن بەرىلدى.
ۇزدىك عىلىمي جۇمىستار "Abaialemi.kz" پورتالىندا جاريالانادى.
