مەملەكەت باسشىسى رەسەي پرەزيدەنتىن تۋعان كۇنىمەن قۇتتىقتادى. قاسىم-جومارت توقاەۆ رەسەي فەدەراتسياسى ۆلاديمير ءپۋتيننىڭ باسشىلىعىمەن الەۋمەتتىك-ەكونوميكالىق دامۋ بويىنشا ايتارلىقتاي تابىسقا جەتكەنىن, بەدەلدى مەملەكەت مارتەبەسىنە يە بولعانىن, سونداي-اق, الەمدىك جانە وڭىرلىك ماسەلەلەردى رەسەيسىز شەشۋ مۇمكىن ەمەستىگىن اتاپ ءوتتى.
قاسىم-جومارت توقاەۆ قازاقستان مەن رەسەي اراسىنداعى ىنتىماقتاستىقتى نىعايتۋعا جانە ءوزارا تۇسىنىستىكتى كۇشەيتۋگە زور ۇلەس قوسقانى ءۇشىن رەسەيلىك ارىپتەسىنە ريزاشىلىعىن ءبىلدىردى.
اڭگىمەلەسۋ بارىسىندا ەكى مەملەكەتتىڭ كوروناۆيرۋس پاندەمياسىمەن كۇرەستەگى ءىس-قيمىلدارىن ۇيلەستىرۋدىڭ ماڭىزدى ەكەنى ءسوز بولدى.
تاراپتار تاۋلى قاراباق توڭىرەگىندەگى اسكەري قاقتىعىستارعا قاتىستى احۋالدى تالقىلادى. سونىمەن قاتار قىرعىزستانداعى وقيعا جونىندە پىكىر الماستى. مەملەكەتتەر باسشىلارى باۋىرلاس ەلدەردەگى قوعامدىق-ساياسي جاعدايدىڭ تەزىرەك تۇراقتاناتىنىنا ۇمىتتەنەتىنىن ايتتى.
اڭگىمەلەسۋ سوڭىندا قاسىم-جومارت توقاەۆ ۆلاديمير پۋتينگە زور دەنساۋلىق جانە رەسەيدىڭ يگىلىگى جولىنداعى قىزمەتىنە جاڭا تابىس تىلەدى.
