قايعىلارىنا ورتاقتاستى

كەشە پارلامەنت سەناتىنىڭ توراعاسى قاسىم-جومارت توقاەۆ باستاعان ءبىر توپ پالاتا دەپۋتاتتارى پولشا رەسپۋبلي­كاسىنىڭ قازاقستانداعى ەلشىلىگىندە بولدى, دەپ حابارلادى وسى پالاتانىڭ ءباسپاسوز قىزمەتى. توراعا پولشانىڭ ءبىزدىڭ ەلى­مىزدەگى ديپلوماتيالىق ميسسياسى­نىڭ وكىلدەرى مەن بۇكىل پولياك حال­قىنا پولشا رەسپۋبليكاسىنىڭ پرە­زيدەنتى لەح كاچينسكيدىڭ, ونىڭ زايىبى ماريا كاچينسكا­نىڭ, سەنات جانە سەيم دەپۋتات­تا­رى­نىڭ, سونداي-اق پولشانىڭ جوعارى لاۋازىمدى ادامدارىنىڭ قايعىلى جاعدايدا قازا بولۋىنا وراي كوڭىل ايتتى. “سىزدەردىڭ قايعىلارىڭىزدى بولىسە وتىرىپ, سمولەنسك ماڭىن­دا بولعان اۋە اپاتىنان قازا بول­عان­دار­دىڭ وتباسى­لارىنا, تۋىس­تا­رى مەن جاقىندارىنا كوڭىل ايتا­مىز”, – دەدى ق.توقاەۆ. ودان باسقا توراعا ءوزىنىڭ پول­­شا­لىق ارىپتەسى – پولشا سەناتى­نىڭ باسشىسى بوگدان بورۋسەۆيچكە كوڭىل ايتۋ جەدەل­حا­تىن جولدادى. “قازاقستان رەسپۋبليكاسى پار­­لامەنتى سەناتىنىڭ دەپۋتات­تارى 2007 جىلعى استاناعا رەسمي ساپارى با­رىسىندا پرەزي­دەنت كاچينسكي­مەن كەزدەسۋىن جىلى شىرايمەن ەس­كە الادى. پولشا باسشىسى ءبىزدىڭ جادىمىزدا ءوز ءومىرىن وتانىنا جانە پولشا حالقىنا قىزمەت ەتۋگە ارناعان كورنەكتى ساياسي قايراتكەر جانە پاتريوت بولىپ قالادى”, دەلىنگەن جەدەلحاتتا. *  *  * پرەمەر-مينيستر كارىم ءماسىموۆ 12 ساۋىردە پولشانىڭ قازاقستانداعى ەلشى­لىگىندە بولدى. ۇكىمەت باسشىسى اۆياتسيا اپاتىندا پولشا پرەزيدەنتى لەح كاچينسكي­دىڭ, ونىڭ زايىبىنىڭ, ەلدىڭ كور­نەكتى ساياسي, ازاماتتىق, ءدىني باسشى­لىعى وكىلدەرىنىڭ, سونداي-اق ولارمەن بىرگە بول­عانداردىڭ قايعىلى جاعدايدا قازا تابۋىنا بايلانىستى مارقۇمداردىڭ تۋىسقان-تۋ­عان­دارىنا, بۇكىل پولياك حالقىنا كوڭىل ايتتى. – ءبىزدىڭ مەملەكەت باسشىسىنىڭ جانە قازاقستان ۇكىمەتىنىڭ اتىنان قاتتى قايعىرىپ كوڭىل ايتامىز جانە پولياك حالقى وسى قاسىرەتتى ەڭسەرىپ, پولشا بۇرىن بەلگىلەنگەن جولمەن ودان ءارى دامۋى ءۇشىن ءوز بويىنان كۇش-جىگەر جانە باتىلدىق تابادى دەپ سانايمىز, – دەدى پرەمەر-مينيستر قازاقستانداعى پولشانىڭ ديپلوماتيالىق ميسسياسى وكىلدەرىنە. *  *  * ەقىۇ-نىڭ ءىس ۇستىندەگى توراعاسى, قر مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ پولشا حالقىنا جانە رەسەيدىڭ سمولەنسك قالاسى ماڭىنداعى اۆياتسيا اپاتىنان قازا تاپقانداردىڭ وتباستارىنا كوڭىل ايتتى. “مەن پولشا حالقىنا جانە اۆياتسيا اپاتىندا قازا تاپقانداردىڭ وتباستارىنا قاتتى قايعىرىپ كوڭىل ايتامىن. وسىناۋ قيىن ساتتەردە ءبىز سىزدەرمەن بىرگە قايعىرامىز”, – دەلىنگەن كوڭىل ايتۋ ماتىنىندە. *  *  * سمولەنسك وبلىسىنداعى كاتىن زيراتىنا بارىپ, وسى جەردە جا­زىق­سىز وپات بولعان وتانداستارىنا تاع­زىم ەتۋدى ماقسات ەتكەن پولشا رەس­پۋبليكاسىنىڭ پرەزيدەنتى لەح كاچينسكي مەن جۇبايى, كوپتەگەن دەلەگاتسيا مۇشەلەرى مىنگەن ۇشاق­تىڭ اۋە اپاتىنا ۇشىراپ, بارلىعى­نىڭ قازا بولعانى تۋرالى حابار قا­زاق­ستاندىقتاردى قاتتى كۇيزەلتتى. وسى اسا اۋىر ساتتە “نۇر وتان” حالىقتىق-دەموكراتيالىق پارتيا­سى­نىڭ اتىنان دوستاس پولشا حالقىنا, قازا بول­عانداردىڭ تۋىس­تارى مەن جاقىن­دارىنا شىن جۇرەكتەن قايعىلارىنا ورتاقتاسىپ, كوڭىل ايتامىز. “نۇر وتان” حالىقتىق-دەمو­كراتيالىق پارتياسىنىڭ ساياسي كەڭەسى.