مەديتسينالىق نىسان 180 ستاتسيونارلىق توسەككە ەسەپتەلگەن. بۇعان قوسا 20 كەرۋەتتىك رەانيماتسيالىق ءبولىم مەن قارقىندى تەراپيا بولادى. قۇرىلىستى «نورت كاسپيان وپەرەيتينگ كومپاني ن.ۆ.» كومپانياسىنىڭ تاپسىرىسىمەن توو «BI Industrial» BI كومپانياسى جۇرگىزىپ جاتىر.
جوبالاۋشىلاردىڭ مالىمەنىنە سۇيەنسەك, ينفەكتسيالىق اۋرۋحانالار ستاندارتىمەن سالىنىپ جاتقان اۋرۋحانا عيماراتى جىلدام قۇراستىرىلاتىن قۇرىلىس تەحنولوگياسىنا سايكەس, ءمودۋلدى بلوكتاردان تۇرعىزىلۋدا. مەديتسينا قىزمەتكەرلەرى مەن ەم الۋشىلاردىڭ قاۋىپسىزدىگىن قامتاماسىز ەتەتىن زاماناۋي قۇرالدارمەن جابدىقتالادى. اۋرۋحانا اكىمشىلىك بولىگى بار مەديتسينالىق بلوكتان, قابىلداۋ-دياگنوستيكالىق بولىمنەن, وپەراتسيالىق بلوگى بار جانساقتاۋ بولىمىنەن, سونداي-اق گالەرەيا تۇرىندەگى دالىزبەن بايلانىسقان بەس بولىمنەن تۇرادى. نىسان جوباسى مەديتسينالىق لوگيستيكا مەن ينفەكتسيالىق باقىلاۋدى ساقتاي وتىرىپ, ءبىر-بىرىمەن ىڭعايلى بايلانىسقان بلوكتارمەن جاساقتالىپتى. كارانتيندىك جانە قارقىندى تەراپيا بولەك ورنالاسادى. سانيتارلىق باقىلاۋ بولمەلەرى, ناۋقاستاردىڭ مەن قىزمەتكەرلەردىڭ ءجۇرىس باعىتى بەلگىلەنگەن.
مۇندا 56 ەكى, 16 ءۇش ورىندىق پالاتا, 6 ءبىر ورىندىق, كوشەگە جەكە شىعاتىن ەسىگى بار 7 ەكى ورىندىق بوكس, قارقىندى تەراپيا بولىمىنە 20 كەرۋەتتى ورىن, قابىلداۋ-دياگنوستيكالىق بولىمىنە 5 بوكس قاراستىرىلىپ وتىر. پەرسونالعا ارنالعان سانيتارلىق باقىلاۋ بولمەلەرى بارلىق قۇرىلىمدىق بولىمشەدە تازا جانە ينفەكتسيالىق ايماققا بولىنگەن. ادامداردىڭ قوزعالىسى ءبىر-بىرىنە كەدەرگى كەلتىرمەيتىندەي سانيتارلىق-گيگيەنالىق جانە ەپيدەميولوگيالىق تالاپتار قاراستىرىلىپتى.
جاڭا اۋرۋحانانىڭ قۇرىلىسىنىڭ بارىسىمەن تانىسقان ايماق اكىمى ماحامبەت دوسمۇحامبەتوۆ وبلىستىق دەنساۋلىق ساقتاۋ جانە قۇرىلىس باسقارمالارىنا نىساننىڭ ءتيىستى تالاپتارعا ساي بولۋىن قاداعالاۋدى تاپسىردى.
