يران مەملەكەتتىك تەلەكانالى يزرايلدىكتەردىڭ ۇرەيىن الاتىن بەس مينۋتتىق فيلم كورسەتتى. كولەمى وتە شاعىن بۇل فيلمدە الداعى ۋاقىتتا بولۋى مۇمكىن ىقتيمال سوعىستا يران ءوز زىمىراندارىمەن ءيزرايلدى قالاي اتقىلايتىنى تۋرالى كورسەتىلگەن. بۇل تۋرالى «لەنتا.رۋ» سايتى حابارلادى.
شاعىن عانا كورسەتىلىمدى ءتۇسىرۋ كومپيۋتەرلىك باعدارلاما ارقىلى جۇزەگە اسقان. فيلمدە يران جاعى بالليستيكالىق زىمىراندارىن يزرايلگە باعىتتاعانى, تۇسكەن جەرىن تالقانداعانى, سونىمەن قاتار, ولاردىڭ بىرنەشەۋىن قارسىلاس جاق تا قاراپ قالماي, جويىپ جىبەرگەنى كورسەتىلگەن. اتالمىش لەنتا يراننىڭ يزرايلگە جاساۋى ىقتيمال شابۋىلىنىڭ جوسپار-جوباسى ءتارىزدى. ويتكەنى, فيلمدە يران «شابۋىلداۋشىلارى» يزرايل قورعانىس مينيسترلىگىنىڭ باس عيماراتىن, اسكەري بازانى, ديمون قالاسىنداعى يادرولىق ورتالىقتى, تەل-ءاۆيۆتىڭ اۋەجايىن نىساناعا العان.
ءفيلمنىڭ سوڭىندا 2006 جىلى ليۆانداعى سوعىستا ولگەن يزرايلدىكتەردىڭ مۇردەسى كورسەتىلگەن.
ەستەرىڭىزدە بولسا, 8 قاراشادان بەرى يراننىڭ يادرولىق باعدارلاماسىنا قاتىستى جەنەۆادا «التىلىقتىڭ» باسقوسۋى ءوتىپ جاتىر. ءدال وسى قارساڭدا اتالعان ءفيلمنىڭ جاريالانۋى تالايدى ويلانتىپ تاستادى.
جەنەۆا كەلىسىمى يران ءۇشىن ساتىمەن اياقتالسا, وندا بۇل مەملەكەت ءوزىن قۇرساۋلاعان حالىقارالىق سانكتسيادان قۇتىلادى. ال بۇعان يزرايل ءۇزىلدى-كەسىلدى قارسى بولىپ وتىر.
وسىنداي قىسىلتاياڭ شاقتا يراننىڭ يزرايلدىكتەردىڭ قۇتىن قاشىرۋ ماقساتىندا فيلم ءتۇسىرۋى قارسىلاس جاقتىڭ قىتىعىنا تيمەي قويمايتىنى بەلگىلى.
