سەناتورلار دەنساۋلىق ساقتاۋ سالاسىنداعى وزەكتى ماسەلەلەردى تالقىلادى. ونىڭ ىشىندە اۋرۋحانالاردىڭ اپاتتىق جاعدايى, مەديتسينالىق پۋنكتتەردىڭ جەتىسپەۋشىلىگى جانە ءدارى-دارمەكتەردى جەتكىزۋدەگى كىدىرىستەر تۋرالى دا ايتىلدى.
وتىرىستا سەنات توراعاسىنىڭ ورىنباسارى نۇرلان ءابدىروۆ: «ايماقتارعا بارعان كەزدە جەرگىلىكتى تۇرعىندار ءۇش اۋىلدا ءبىر-بىردەن امبۋلاتوريا بار ەكەنىن, ەمدەلۋ ءۇشىن 400 شاقىرىمعا بارماۋ ءۇشىن ءبىر اۋرۋحانا سالىپ بەرۋدى سۇرايدى. دەگەنمەن, بىزدەگى ستاندارتتار بويىنشا 4-5 مىڭ حالقى بار ەلدى مەكەندە عانا اۋرۋحانا بولۋى مۇمكىن. سونىمەن قاتار پرەزيدەنت دارىگەرلىك قىزمەتتەردىڭ قولجەتىمدى بولۋى تۋرالى مىندەت قويدى. ارينە سالالىق ماماندار قاجەت بولعان جاعدايدا وبلىس ورتالىعىنا اپارۋ قاجەت. ال نەگىزگى مەديتسينالىق قىزمەتتەر قادام باسار جەردە بولۋى ءتيىس», – دەدى.
سەناتور اقمارال ءالنازاروۆا العاشقى مەديتسينالىق-سانيتارلىق كومەك قىزمەتىنىڭ تاريفتەرىنە نازار اۋداردى, ولار ۇيىمداردىڭ ناقتى شىعىندارىن جابۋعا مۇمكىندىك بەرمەيدى, ال جەكە سەكتوردى قىزىقتىرىپ وتىرعان جوق. سەناتورلاردىڭ قورىتىندىسى بويىنشا مساك دەنساۋلىق ساقتاۋ سالاسىنىڭ باسقا باعىتتارىمەن سالىستىرعاندا تولىق قارجىلاندىرىلماي كەلەدى.
دەپۋتاتتار دەنساۋلىق ساقتاۋ جۇيەسىن تسيفرلاندىرۋداعى وزەكتى ماسەلەلەردى دە ايتتى. «بۇگىنگى كۇنگە دەيىن تسيفرلاندىرۋدىڭ بىرىڭعاي پلاتفورماسى جوق, ياعني مەديتسينا قىزمەتكەرى ناۋقاس ادام تۋرالى بىردەي دەرەكتەردى ءارتۇرلى باعدارلامالارعا بىرنەشە رەت ەنگىزۋگە ءماجبۇر. بۇل كۇيبەڭى كوپ جۇمىس دارىگەرگە ءوز بەتىنشە ءبىلىم الۋعا كوبىرەك ۋاقىت بولۋگە نەمەسە سول ناۋقاسقا ۋاقىت بولۋگە مۇمكىندىك بەرمەيدى», – دەدى اقمارال ءالنازاروۆا.
وتىرىس قورىتىندىسى بويىنشا دەپۋتاتتار دارىگەرلەردىڭ مارتەبەسىن ارتتىرۋ ماقساتىندا «مەديتسينا قىزمەتكەرىنىڭ مارتەبەسى تۋرالى» زاڭ جوباسىن ازىرلەۋ قاجەتتىگىن قاراستىرۋدى, پسيحوەموتسيونالدىق جۇكتەمەلەر مەن زياندى ەڭبەك جاعدايلارى ءۇشىن قوسىمشا اقىنىڭ مولشەرىن قايتا قاراۋ, ومىرلىك ماڭىزى بار دارىلىك پرەپاراتتاردى ساتىپ الۋعا ارنالعان كوپجىلعى شارتتاردىڭ قولدانىلۋىن وزگەرتۋدى ۇسىندى.
سەناتتىڭ الەۋمەتتىك-مادەني دامۋ جانە عىلىم كوميتەتىنىڭ وتىرىسىنا دەنساۋلىق ساقتاۋ ءمينيسترى الەكسەي تسوي, ءمينيستردىڭ ورىنباسارى – باس سانيتارلىق دارىگەر ەرلان قياسوۆ, مەديتسينالىق ساقتاندىرۋ قورىنىڭ باسقارما توراعاسى بولات توكەجانوۆ جانە كوپسالالى مەديتسينالىق ورتالىقتىڭ باسشىسى شىنار مالىك قاتىستى.
