قۇراما كوماندانىڭ جاتتىقتىرۋشىسى, ماتەماتيكا ءپانى بويىنشا حالىقارالىق وليمپيادالاردىڭ بىرنەشە دۇركىن جەڭىمپازى قانات ساتىلحانوۆ شاكىرتتەرىنىڭ جەتىستىكتەرىنە كوڭىلى تولاتىنىن اتاپ ءوتتى. بيىل بالالار IMO 2020 حالىقارالىق سايىستىڭ بارلىق قاتىسۋشىلارى سياقتى قاشىقتان دايىندالدى.
«وليمپيادا پروكتورينگ جۇيەسى ارقىلى ءوتتى. قازاقستاننىڭ كوماندالىق ناتيجەلەرى وتكەن جىلمەن سالىستىرعاندا ايتارلىقتاي جاقساردى. التىن مەدال جەڭىپ الۋعا ءبىر عانا ۇپاي جەتپەدى. نەگىزىنەن ءبىزدىڭ بالالارىمىز وتە مىقتى. ءار بالا ءوز الدىنا قويعان ماقساتىنا جەتە الادى. وسى رەتتە بالالارعا قولداۋ كورسەتۋ ماڭىزدى. اتا-انالار مەن پەداگوگتەرگە بىرلەسكەن ەڭبەگى ءۇشىن العىس ايتامىن», دەدى ق.ساتىلحانوۆ.
ەل نامىسىن قورعاعان كوماندا قۇرامىنا الماتىلىق تاير ساتۋبالدين, تاميرلان بەكتەمىسوۆ, نۇرتاس شىنتاس, يۋري تەن جانە نۇر-سۇلتاندىق دانات دۇيسەنبەكوۆ پەن فەتۋللاح سام كىردى.
حالىقارالىق ماتەماتيكا وليمپياداسىنىڭ ەرەجەلەرىنە سايكەس جوعارى سىنىپ وقۋشىلارى ەكى كۇننىڭ ىشىندە 6 ەسەپتى شەشۋى ءتيىس. تاپسىرمالار ماتەماتيكانىڭ ءارتۇرلى بولىمدەرى بويىنشا, نەگىزىنەن گەومەتريا, الگەبرا, ساندار تەورياسى جانە كومبيناتوريكادان بەرىلەدى.
