فۋتبول • 01 قازان، 2020

«استانا» – «قايرات»: بيىل قاي كلۋب توپ جارادى؟

49 رەت كورسەتىلدى

فۋتبولدان قازاقستان چەمپيوناتى بيىل پاندەمياعا بايلانىستى ەرەكشە جاعدايدا ءوتىپ جاتىر. ياعني ىشكى بىرىنشىلىككە قاتىساتىن بارلىق كوماندا ويىنداردى ءوز قالاسىندا ەمەس، ءبارى الماتىعا جينالىپ، ءبىر ايماقتا وتكىزىپ جاتىر. بۇل دا فۋتبول تاريحىنىڭ جىلناماسىندا بۇرىن-سوڭدى بولماعان جاعداي.

 

تاعى ءبىر اتاپ وتەرلىگى، چەمپيو­ناتتىڭ العاشقى تۋرلارىنا قاتىس­قان، ەل فۋتبو­لىنىڭ تاري­حىن­دا وزىندىك ورنى بار پاۆلو­داردىڭ «ەرتىس» كلۋبى قارجىلىق قيىن­دىققا بايلانىستى جارىستان شىعىپ قالدى. سونىمەن قاتار قازاقستاننىڭ كاسىپقوي فۋتبول ليگاسى بىرىنشىلىكتەگى كوماندا سانىنىڭ جانە كارانتينگە بايلانىستى ۇزاق ۋاقىت ءۇزىلىس بولعانىن ەسكەرىپ، چەمپيوناتتى جىلداعىداي ءۇش اينالىم ەمەس، ەكى اينالىمعا دەيىن قىسقارتۋعا ءماجبۇر بولدى.

وسىنداي توسىن جاعدايدا جانە ەرەكشە تارتىپتە ءوتىپ جاتقان دوپ دوداسىندا قازاقستاندىق فۋتبول جانكۇيەرلەرىن ءبىر عانا سۇراق ما­زالاپ جۇرگەنى جاسىرىن ەمەس. ياعني ءتۇرلى وزگەرىسپەن ءوتىپ جاتقان ەل چەمپيوناتىندا سۇرەڭسىز ويىن كورسەتىپ جاتقان «استانانىڭ» ءالسىز جاعدايىنان كەيىن جانكۇيەر قاۋىمىن «بيىل قاي كلۋب توپ جا­رادى؟» دەگەن سۇراق ويلاندىرىپ قويعانى راس. جالپى، بۇل 2014 جىلى «استانا» چەمپيون بول­عاننان باستاپ جىل سايىن جان­كۇيەر­لەردى مازالايتىن سۇراق بولسا دا، چەمپيونات سوڭىندا «اس­تانا» جەڭىسكە جەتىپ جاتادى. ال راسىمەن بيىل چەمپيون كوماندا وزگەرە مە، الدە تاعى دا «استانا» چەمپيون بولا ما؟ ءدال قازىرگى جاع­دايدا قاي كلۋبتىڭ باس جۇلدەنى ەنشىلەۋگە ءباسى بيىك بولىپ تۇر؟ بۇگىن وسى سۇراق توڭىرەگىندە اگىمە ءوربىتىپ كورمەكپىز.

قازاق فۋتبولىنىڭ ارداگەرى ءارى ساراپشىسى يۋسۋپ شاديەۆ بيىل ءتورت كوماندانىڭ چەمپيون اتانۋعا مۇمكىندىگى زور ەكەنىن ايتادى. ««قايرات»، «استانا»، «تو­بىل» جانە «ورداباسى» العاش­قى ۇشتىككە تالاساتىن كومان­دالار. ولاردىڭ قاتارىنا «قايسار» مەن «جەتىسۋدى» دا قوسۋعا بولادى. وتكەن تۋرلاردا «شاح­تەر­دىڭ» «جەتىسۋعا» قارسى وتكىزگەن ويى­نى ماعان قاتتى ۇنادى. اسىرەسە ءبىرىن­شى تايمدا قارسىلاسىنا مۇل­دە مۇمكىندىك بەرگەن جوق. اري­نە، كوشباسشى كلۋب فۋت­بولشى­لارىنىڭ ويىن دەڭگەيى جوعارى ەكەندىگى باي­قالادى، بىراق الدا ءالى تولىق ءبىر اينالىم بار. سوندىقتان قىزىقتى، تارتىستى ماتچتاردىڭ ءبارى الدا دەپ وي­لايمىن. قازىر الدىن الا تون ءپىشۋ ەرتە­رەك، ءتىپتى چەم­پيونات سوڭىنا دەيىن سەنساتسيا بو­لىپ قالۋى مۇمكىن»، دەيدى يۋسۋپ شا­ديەۆ.

ال قازاقستاندىق تانىمال باپكەر ۆاحيد ماسۋدوۆ «قايراتتىڭ» قارقىنىنا باسقا كو­ماندالار شىداس بەرە المايدى دەيدى. دەسە دە ول «استانا» بۇرىنعى ويى­نىنا قايتا ورالىپ كەلە جاتقانىن، سون­دىقتان چەمپيون كوماندانىڭ اتى سوڭعى تۋردا دا شەشىلۋى مۇمكىن ەكەنىن ايتادى.

– جالپى، چەمپيوناتتاعى وزگە كومان­دالارعا قاراعاندا «قاي­راتتىڭ» چەمپيون اتانۋعا مۇم­كىندىگى جوعارى. ويتكەنى ولار قازىر بارلىق كەزدەسۋىن الماتىدا وتكىزىپ جاتىر. ءبىرىنشى اينالىمنان كەيىنگى تۋرنير كەستەسىنە قا­رايتىن بولساق، «قايرات» چەمپيون اتانۋى مۇمكىن كوماندالاردىڭ ىشىندە فاۆوريت بولىپ قالا بەرەدى. بىراق «استانا» ءار تۋر سايىن العا قاراي ىلگە­رىلەپ، پسيحولوگيالىق توقىراۋدان شى­عىپ كەلەدى. ەندى ولار قارقىنىن جوعارى­لاتپاسا، تومەندەتپەيدى دەپ ويلايمىن»، – دەپ اتاپ ءوتتى ماسۋدوۆ.

قازىرگى تاڭدا چەمپيونات بەل ورتاسىنان اۋىپ، كوماندالار مارەگە قاراي جاقىنداپ كەلەدى. العاشقى اينالىمنىڭ قورىتىندىسى بو­يىن­شا، الماتىنىڭ «قايرات» كومانداسى ءبىرىنشى ورىندا كەلە جاتىر. ەكىنشى ورىنعا «قايراتتان» ءتورت ۇپاي كەم جيناعان «استانا» جايعاسقان. ۇزدىك ۇشتىكتى شىم­كەنتتىڭ «ورداباسى» كلۋبى تۇيىن­دەپ تۇر.

ءبىرىنشى اينالىمداعى 10 تۋردا «قاي­رات» سەگىز رەت قارسى­لاس­­تارىنان باسىم تۇسكەن. ال ءبىر ويىندا تەڭ ويناسا، تاعى ءبىر كەز­دەسۋىندە جەڭىلىپ قالعان. بۇل چەم­پيو­ناتتاعى وزگە كومان­دا­لار­­دىڭ ناتيجە­لەرىمەن سالىس­تىر­عاندا جاقسى كورسەتكىش. «اس­تانا» 10 ويىننىڭ التاۋىندا جەڭىسكە جەتىپ، ءۇش ماتچتا تەڭ تۇس­كەن. ەلوردا كومانداسى دا «قاي­رات» سياقتى ازىرگە ءبىر ويىن­دا ەسە جىبەرگەن. قازاقستان چەمپيو­ناتىن ۇزبەي تاماشالايتىن كو­رەرمەن مۇنداي جاعداي جىل سايىن قايتالاتىنىن جاقسى بىلەدى. ياعني جىل سايىن چەمپيونات بارىسىندا «قايرات» توپ باستاپ كەلەدى دە، بىرىنشىلىك سوڭىندا كۇتپەگەن جەردە قارسىلاستارىنان جەڭىلىپ، قولدا تۇرعان چەمپيوندىقتى «استاناعا» بەرىپ قويادى.

الىسقا بارماي-اق، چەمپيو­نات­تىڭ بىل­تىرعى ناتيجەسىنە كوز جۇگىرتىپ كو­رەيىك. 2019 جىلى بىرىنشىلىكتە «قاي­رات» چەمپيونات سوڭىنا قاراي تۋرنير كەس­تەسىندە توپ باستاپ كەلە جاتىپ، سوڭعى ەكى-ءۇش تۋردا قاتارىنان جەڭىلىسكە ۇشى­راپ، باس جۇلدەدەن قاعىلعان ەدى. ال چەم­پيو­ناتتىڭ ەكىنشى جارتىسىنان باستاپ «استانا» ەكىنشى-ءۇشىنشى ورىندا ءجۇرىپ-اق، بى­رىنشىلىك سوڭىنا قاراي چەمپيون اتانىپ كەتتى.

تۋرنير كەستەسىندەگى قازىرگى جاعداي دا تاپ بىلتىرعى ستسەنا­ريمەن ءوربىپ كە­لە­دى. ازىرگە «قاي­رات» كوش باسىندا. «استانا» ادەتتەگىدەي ەكىنشى ساتىدا كەلە­دى. بۇدان كەيىنگى ويىنداردا دا ەكى كوماندا قارسىلاستارىنا ەسە جىبەرە قويۋى ەكىتالاي. ويتكەنى ەكى كلۋب تا باس جۇلدەدەن جانە كەلەسى جىلى چەمپيوندار ليگاسىنىڭ ىرىكتەۋ كەزەڭىندە ونەر كورسەتۋدەن ءۇمىتتى. ەگەر ەكى كوماندا وسى قار­قىنمەن ويناي بەرسە، جەڭىمپاز كوماندانىڭ ەسىمى «قاي­رات» پەن «استانا» اراسىنداعى ءوزارا كەز­دەسۋدىڭ قورىتىندىسى بويىنشا انىقتالۋى عاجاپ ەمەس.

سوڭعى جاڭالىقتار

تارازدان كەلگەن ۇرى ۇستالدى

ايماقتار • بۇگىن، 20:35

زاڭسىز اڭ اۋلاۋ تيىلماي تۇر

ايماقتار • بۇگىن، 17:22

باستاما باياندىلىعىمەن قۇندى

ايماقتار • بۇگىن، 13:56

ۇقساس جاڭالىقتار