ابايدى تانۋ ويداعىداي ما؟

استاناداعى س.سەيفۋللين مۇراجايىندا ۇلى حاكىم ابايدىڭ 165 جىلدىعىنا ورايلاس ادەبي-مۋزى­كا­لىق شارا بولىپ ءوتتى. ەلباسى ابايدىڭ 150 جىلدىق مەرەيتويىندا سويلەگەن سوزىندە: الەمگە قازاقتى تانىتۋ ءۇشىن ابايدى تانۋ كەرەك دەگەن ەدى. وسى تاپسىرمانى ىسكە اسىرۋدا سالعىرتتىق باسىم سياقتى. دەگەنمەن اباي مۇراسىمەن جۇيەلى تۇردە جۇمىس جاساپ كەلە جاتقان ۇيىمدار دا بار ەكەندىگىن جوققا شىعارۋعا بولمايدى. ماسەلەن, حالىق­ارالىق “اباي” قورى. ايتسە دە مۇنداي قوعامدىق ۇيىم­دار­دىڭ قارىمى قىسقا. دەمەۋشىلەردىڭ بولگەن قارجىسى­مەن كۇن كورەتىندىگىن العا تارتقان “اباي” قورىنىڭ پرەزيدەنتى, قر ەڭبەك سىڭىرگەن قىزمەتكەرى بالتابەك قاجى ءبازىل ۇلى قوردىڭ قالىپتى جۇمىس ىستەۋى ءۇشىن جىلىنا 5 ملن.تەڭگەدەي اقشا قاجەتتىگىن جەتكىزە وتىرىپ, مۇنى رەسپۋبليكالىق بيۋدجەتكە ەنگىزۋ دۇرىس بولار ەدى دەگەن تىلەگىن دە ءبىلدىردى. سونداي-اق ول ابايدىڭ 165 جىلدىق تويى 4 اي بۇرىن, ەڭ باستىسى ەل ورتالىعى استانا قالاسىندا باستالۋىندا دا ۇلكەن ءمان جاتقاندىعىن ايتتى. 1990 جىلى قۇرىلعان قورعا بۇگىندە 20 جىل تولىپ وتىر ەكەن. كەشتە اباي اندەرى شىرقالۋمەن قاتار, بىرقاتار قوردالانىپ قالعان ماسەلەلەر دە ايتىلدى. مىسالى, ابايدىڭ قارا سوزدەرىنىڭ ورىندارىنىڭ اۋىسۋى, دانىشپاننىڭ مۇراسىنىڭ جيناقتالۋى جايىندا ءسوز قوزعالدى. بالتابەك قاجى ەرسالىموۆ بىزبەن كوكەيىندە جۇرگەن كەيبىر ويلارىمەن دە ءبولىستى. اتاپ ايتساق, تۇركى حالىق­تارى اراسىندا اباي اتىنداعى حالىقارالىق سىيلىق بولسا ونىڭ دۇنيەجۇزىنە تانىلا تۇسۋىنە قىزمەت ەتپەس پە ەدى؟ ستۋدەنتتەرگە اباي اتىنداعى سىيلىق تاعايىنداسا دا ارتىقتىق ەتپەيدى. مىنە, وسى سەكىلدى كوپتەگەن ماسەلەلەردى كوتەرگەن ادەبي-مۋزىكالىق كەشتى ابايتانۋشى عالىم اسان وماروۆ جۇرگىزدى. ۆەنەرا تۇگەلباي.