مەديتسينا • 30 قىركۇيەك، 2020

ورفاندىق اۋرۋعا شالدىققان بالالار ەمى باقىلاۋدا

11 رەت كورسەتىلدى

دەنساۋلىق ساقتاۋ ءمينيسترى الەكسەي تسوي ازاماتتىق قوعام جانە وڭىرلىك دەنساۋلىق ساقتاۋ باسقارمالارىنىڭ وكىلدەرىمەن ورفاندىق اۋرۋعا شالدىققان بالالاردى ءدارى-دارمەكپەن قامتاماسىز ەتۋدەگى ماسەلەلەردى تالقىلادى.

ء«بىز بۇگىن وتە ماڭىزدى ماسەلەنى قاراۋ­دامىز. بۇل كوپتەگەن فاكتورعا بايلانىس­تى جىلدار بويى ىسكە اسىرىلماي كەلگەن پروب­لەما. وسى ماسەلەگە ەرەكشە كوڭىل اۋدارعىمىز كەلدى، ونى جۇيەلى شەشۋ ءۇشىن كەمشىلىكتەردى نەمەسە نورماتيۆتىك پروب­لەمالاردى قاراۋىمىز ءتيىس»، دەدى ا.تسوي.

ورفاندىق اۋرۋلاردىڭ تىزىمىنە 59 نوزولوگيا كىرەدى. بىرىڭعاي ديستريبيۋتوردىڭ 2020 جىلعا ارنالعان تىزىمىندە سيرەك كەزدەسەتىن اۋرۋلاردى ەمدەۋگە ارنالعان دارىلىك زاتتار مەن مەديتسينالىق بۇيىم­داردىڭ 1 415 اتاۋى بار. ونىڭ ىشىندە ستاتسيونارلىق كومەككە – 1 177 اتاۋ، امبۋ­لاتوريالىق ءدارى-دارمەكپەن قامتاماسىز ەتۋ­گە 649 اتاۋ ارنالعان.

قازاقستاندا ديسپانسەرلىك ناۋقاستىڭ ەلەكتروندى تىركەلىمىنىڭ دەرەكتەرى بويىنشا 2020 جىلعى 25 قىركۇيەكتە ورفاندىق اۋرۋلارى بار 13 863 بالا ەسەپتە تۇر.

ەلىمىزدە ورفاندىق اۋرۋعا شالدىققان بالالارعا ارنالعان ءدارى-دارمەككە قاتىستى بىرقاتار پروبلەما بار. كەيبىر پرەپارات تىركەۋدەن وتپەگەن، دارىلىك زاتتاردى ساتىپ الۋ ءۇشىن شەكتى باعا بەلگىلەنبەگەن، ءدارىنى جەتكىزۋ جولىنداعى كەدەرگىلەر، دەنساۋلىق ساقتاۋ باسقارمالارىنىڭ سالعىرتتىعى تاعى بار.

ماسەلەن، مۋكوۆيستسيدوزبەن اۋىراتىن 121 بالا ديناميكالىق باقىلاۋدا. بۇل دياگ­نوز، اسىرەسە شىعىس قازاقستان، تۇر­كىستان جانە الماتى وبلىستارىندا، الماتى، نۇر-سۇلتان جانە شىمكەنت قالا­لارىندا كوپ تىركەلگەن. مۇنداي بالالار رەسپۋبليكالىق بيۋدجەت ەسەبىنەن دورنازا – الفا (پۋلموزيم)، كرەون، ۋرزودەزوكسيحول قىشقىلىمەن قامتاماسىز ەتىلۋى ءتيىس.

«كرەون پرەپاراتى ۋاقتىلى جەتكىزىل­مەگەن. جىل باسىنان بەرى بارلىق وڭىردە بالالار كوليستيمەتات ناتري (كوليس­تين) جانە توبراميتسين پرەپاراتتارىمەن قامتاماسىز ەتىلمەگەن. توبراميتسين ەرىتىندىسى جوق»، دەدى دەنساۋلىق ساقتاۋ مينيسترلىگىنىڭ انا مەن بالا دەنساۋلىعىن قورعاۋ دەپارتامەنتىنىڭ ديرەكتورى م.ەمبەر­گەنوۆا.

ەپيلەپسيامەن اۋىراتىن 26 036 بالا ديسپانسەرلىك ەسەپتە تۇر. دەنساۋلىق ساقتاۋ ءمينيسترىنىڭ 2017 جىلعى 29 تامىزداعى №666 بۇيرىعىنا سايكەس امبۋلاتوريالىق ءدارى-دارمەكپەن قامتاماسىز ەتۋگە 6 پرەپارات كىرەدى: كاربامازەپين، ۆالپروي قىشقىلى، وكسكاربازەپين، لاموتريدجين، توپيرامات، لەۆەتيراتسەتام.

مەديتسينالىق ۇيىمدار 1،7 ملرد تەڭگەگە ەپيلەپسيا نوزولوگياسى بو­يىن­شا رەتسەپتەرمەن قامتاماسىز ەتىلدى. بى­رىڭعاي ديستريبيۋتور ستاتسيونارلارعا 59 ملن تەڭگەگە دارىلىك زاتتار جونەلتتى. مۋكوۆيستسيدوز نوزولوگياسى بويىنشا مەديتسينالىق ۇيىمدارعا 0،7 ملرد تەڭگەگە 7 اتاۋ ساتىپ الىندى (28 مگ كاپسۋلاداعى ينگالياتسياعا ارنالعان توبراميتسين ۇنتاعى ۇسىنىس بولماعاندىقتان ساتىپ الىنعان جوق). ستاتسيونارلارعا 185،4 ملن تەڭگە سوماسىنا دارىلىك زاتتار جونەلتىلدى.

بۇگىنگى تاڭدا ورىن الىپ وتىرعان تاعى ءبىر پروبلەما – سيرەك كەزدەسەتىن اۋرۋلارى بار پاتسيەنتتەرگە قاجەتتى كوپتەگەن پرەپارات قازاقستاندا تىركەلمەگەن.

«بۇل ماسەلەنى ءبىز جىلدار بويى شەشە الماي كەلەمىز. اكىمدەرگە تالاي رەت حات تا جازدىق. ەندى دەنساۋلىق ساقتاۋ مينيسترلىگى جەرگىلىكتى اكىمدىكتەرگە ناقتى ۇسىنىس بەرسە، ويتكەنى اۋرۋ بالالاردى ءدارى-دارمەكپەن قامتاماسىز ەتۋگە جاۋاپتىلار جۇمىسىنا سالعىرت قاراعانى ءۇشىن جازالانۋى ءتيىس. اتا-انالاردان، قوعامدىق قورلاردان كەلگەن شاعىم، وتىنىشكە نەمقۇرايدى قاراۋعا بول­مايدى. سونىمەن قاتار ساياسي شەشىم قابىل­داۋدى جانە بۇل ءدارى-دارمەكتى ءماج­بۇرلى تۇردە تىركەۋدى سۇرايمىن»، دەدى بالا قۇقىقتارى جونىندەگى ۋاكىل ارۋجان ساين.

دەنساۋلىق ساقتاۋ ءمينيسترى بۇل ماسەلەنى، اسىرەسە وڭىرلەردە ەرەكشە با­قىلاۋعا الۋ قاجەت ەكەنىن ەسكەردى.

ء«بىر رەتتىك تاسىمال، تىركەۋگە قا­تىستى پروبلەمالار بار – بۇل تازا بيۋ­روكراتيالىق راسىمدەر. سونداي-اق لوگيستيكا ماسەلەسى دە بار. سوندىقتان ءبىزدىڭ مىندەتىمىز – دۇرىس جوسپارلاۋ جانە الدىن الا بولجام جاساۋ. ءبىرىنشى كەزەكتە ءدارى-دارمەكتى جەتكىزۋ، ءبىر رەتتىك تاسىمال بويىنشا ماسەلەنى شەشۋ كەرەك. ءبىز بۇل پرەپاراتتاردى ەرەكشە باقىلاۋعا الامىز. قازاقستانعا كەلگەن ءدارى-دارمەكتىڭ مۇمكىندىگىنشە تىركەۋدەن تەز ءوتۋىن قاداعالايمىز»، دەدى مينيستر.

سونداي-اق ا.تسوي بالالاردى ءدارى-دارمەكپەن قامتۋ ماسەلەسىنە قاتىستى وسىنداي كەزدەسۋلەر الداعى ۋاقىتتا دا تۇراقتى وتكىزىلەتىنىن ايتتى.

 

سوڭعى جاڭالىقتار

اراق ساتىلمايتىن اۋدان

ايماقتار • بۇگىن، 21:11

ەرلىككە تولى سۋرەتتەر

رۋحانيات • بۇگىن، 13:05

كيىكتەردىڭ تولدەۋ كەزەڭى باستالدى

فوتوگالەرەيا • بۇگىن، 12:07

ۇقساس جاڭالىقتار