ايماقتار • 28 قىركۇيەك، 2020

جەمقورلىقتى اشكەرەلەۋگە جاردەمدەسكەن 9 ازاماتقا اقشالاي سىياقى بەرىلدى

18 رەت كورسەتىلدى

قوعامدا پاراقورلىققا كوپ جاعدايدا تۇرعىنداردىڭ قۇقىقتىق ساۋاتتىلىعى مەن  ازاماتتىق بەلسەندىلىكتىڭ تومەندىگى سەبەپ بولىپ جاتادى. تىرلىگىن تەڭگەمەن شەشۋگە تىرىسىپ، قىزمەت كورسەتۋشىگە قاراجات ۇسىنۋعا قۇمار ازاماتتاردىڭ ارەكەتتەرى "پارا بەرۋ، پارا ۇسىنۋ" قىلمىسىنىڭ تۋىنداۋىنا تىكەلەي ىقپال ەتۋدە. سوندىقتان دا، پارا بەرۋشى بولماسا، پارا الۋشى دا بولمايتىنىن ەسكەرسەك،  كوپشىلىك قاۋىم ەلدىڭ ەرتەڭگى بولاشاعى ءۇشىن  ءوزىنىڭ ازاماتتىق بەلسەندىلىگىن تانىتۋى قاجەت-اق، دەپ جازادى Egemen.kz.

سونىڭ ىشىندە، ادال قوعامدى قالىپتاستىرۋدا ەلىمىزدىڭ ءاربىر ازاماتى ار تازالىعىن ساقتاپ قانا قويماي، ۇشىراسقان سىبايلاس  جەمقورلىق دەرەكتەرىنە بەيجاي قاراماۋى ءتيىس.  بۇگىنگى كۇنى اگەنتتىكتىڭ  تاۋلىك بويى تەگىن قىزمەت كورسەتەتىن 1424 Cاll ورتالىعىنا قوڭىراۋ شالۋ ارقىلى تۇرعىندار ءوز اقپاراتتارىمەن بولىسۋىنە تولىقتاي مۇمكىنشىلىگى بار. جانە مەكەمەگە ارىز-شاعىم قالدىرۋ ارقىلى وزىندە بار بارلىق مالىمەتىن تولىقتاي سىبايلاس جەمقورلىققا قارسى قىزمەت وكىلدەرىنە ۇسىنا الادى. وسى ورايدا، تۇركىستان وڭىرىندە سوڭعى 8 اي ىشىندە  جەمقورلىق قىلمىسىن اشكەرەلەۋگە جاردەمدەسكەن 9 ازاماتقا اقشالاي سىياقى بەرىلىپ، وبلىس تۇرعىندارىنىڭ تاراپىنان شالىنعان قوڭىراۋلار ارقىلى 7 تۇلعانىڭ ۇستىنەن قىلمىستىق ءىس قوزعالعانىن ايتا كەتكەن ءجون.

مەملەكەت ەكونوميكاسىن تۇرالاتۋعا جانە ۇلتتىق قاۋىپسىزدىككە قاتەر توندىرۋگە قاۋقارلى سىبايلاس جەمقورلىق ماسەلەلەرى - ءالى دە كۇن تارتىبىنەن تۇسپەي كەلەدى. مەملەكەت باسشىسى قاسىم جومارت توقاەۆ حالىققا ارناعان  جولداۋىندا  جەمقورلىقپەن ۇستالعانداردىڭ مەملەكەتتىك قىزمەتتە جانە كۆازي مەملەكەتتىك سەكتوردا جۇمىس ىستەۋىنە ءومىر بويى تىيىم سالاتىن قاعيدا قاتاڭ ساقتالۋى كەرەكتىگىن ايتتى. سونداي-اق پرەزيدەنت سىبايلاس جەمقورلىق دەرەكتەرى تۋرالى حابارلاعان ادامداردى زاڭ جۇزىندە قورعايتىن جۇيە قالىپتاستىرۋ قاجەتتىگىن اتاپ كورسەتتى.

ەل پرەزيدەنتى اتاپ وتكەندەي، جىل وتكەن سايىن كولەڭكەلى قىلمىسقا جول بەرگەندەرگە كورىلەتىن جازا ءتۇرى قاتاڭداپ كەلەدى. دەگەنمەن، جەڭ ۇشىنان جالعاسقان جەمقورلىق تاۋەكەلدەرىنىڭ تۋىنداۋى تەك ءبىر عانا تاراپتان بولمايتىندىعىن ەسكەرگەن ءجون. وسى ورايدا، ەل دامۋىن باسەڭدەتىپ، حالىق پەن بيلىك اراسىنداعى بەرىك سەنىمدى سەتىنەتەتىن سىبايلاس جەمقورلىققا جول بەرمەۋ جانە ونىڭ دەڭگەيىن تومەندەتۋ تەك اگەنتتىك قىزمەتكەرلەرىنە جۇكتەلگەن مىندەت ەمەس، ول ءاربىر قازاقستاندىققا ورتاق مىندەت ەكەندىگى بارشاعا بەلگىلى. سەبەبى،  بارماق باستى، كوز قىستى ارەكەتتەرگە جول بەرمەۋ -  كوپشىلىكتىڭ كوكەيىندەگى جالپىلاما ۇران بولعانمەن، ىسكە كەلگەندە ءار ءبىر ازاماتتىڭ، اردىڭ ءىسى ەكەنى انىق. سىبايلاس جەمقورلىق دەڭگەيىنىڭ تومەندەتۋدىڭ توتە جولى - ازاماتتىق بەلسەندىلىكتى ارتتىرا وتىرىپ،  حالقىمىزعا  ادال قىزمەت ەتۋ دەپ ەسەپتەيمىن.

 

مارات قاتتاۋباەۆ،

سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ورىنباسارى

سوڭعى جاڭالىقتار

ۇقساس جاڭالىقتار