وبلىس ورتالىعىنداعى شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ تۇلەگى مارگاريتا پاپۋشاعا ءدام وسى اۋداننان بۇيىرعان. سەبەبى وسى وڭىرگە تۇرمىسقا شىقتى. العاشقىدا جوعارى ءبىلىمى بولعانىمەن, تاجىريبەسى جوقتىعى جولىن كەسىپ, جۇمىسقا ورنالاسۋدا قيىندىق تۋدى. ءبىلىم وشاقتارىنىڭ بىرىندە ورىن قاشان بوسار دەپ قول قۋسىرىپ وتىرۋعا تاعى بولمايدى. وسىلاي جۇرگەندە اۋدان ورتالىعىنداعى كوللەدجگە جۇمىسقا ورنالاستى. وندا دا ءوز قۇربىلارى ءتارىزدى ماماندارعا جاقسىلىعى مول جاستار تاجىريبەسى باعدارلاماسى بويىنشا. كوللەدج ديرەكتورى لاريسا شەۆتسوۆانىڭ ايتۋىنا قاراعاندا, جاس مامان جۇمىسقا دەگەن ىنتاسىمەن تانىلعان. ادامنىڭ العا ۇمتىلۋى قاشاندا كوزگە كورىنىپ تۇرماي ما؟ تاپسىرىلعان جۇمىستى ۇرشىقشا ۇيىرەتىن ىسكەر جاس جاۋاپكەرشىلىگىمەن ەرەكشەلەنگەن. از ۋاقىتتىڭ ىشىندە قۇقىقتىق بازانى تولايىم مەڭگەرىپ الدى.
قازىر جاستار تاجىريبەسى بويىنشا اتالعان وقۋ ورنىندا التى ادام جۇمىس ىستەيدى. ولاردىڭ ارقايسىسى ءوز ماماندىقتارى بويىنشا ەڭبەك ەتۋگە قۇشتار.
– العاشقىدا جۇمىس تابا الماي ابدىراپ قالعانىم راس, – دەيدى جاس مامان مارگاريتا پاپۋشا, – جۇمىسپەن قامتۋ ورتالىعى وسى كوللەدجگە جىبەرگەن بولاتىن. مۇمكىندىكتى قالت جىبەرمەي, بويىمداعى بار كۇش-جىگەرىمدى, جوعارى وقۋ ورنىندا العان ءبىلىمىمدى سارقا جۇمساۋعا تىرىسىپ كەلەمىن.
جاس ماماندارعا شاراپاتى ءتيىپ وتىرعان جاستار تاجىريبەسىنىڭ يگىلىگى ايتا قالارلىقتاي. قازىر 16 ادام وسى يگىلىكتى كورىپ وتىر. ولاردىڭ ىشىندە قولىنان ءىس كەلەتىندىگىن دالەلدەگەن 10 مامان تۇراقتى جۇمىسقا ورنالاسقان. «ەڭبەك» باعدارلاماسىنىڭ ءبىرىنشى باعىتى بويىنشا قىسقا مەرزىمدى كاسىپتىك وقۋعا 11 ادام باعىتتالىپ وتىر. تاياۋ كۇندەرى ولار دا سەرتيفيكات الىپ, ءوز جۇمىستارىن باستايدى. بەس ادام قايتارىمسىز گرانتقا يە بولعان. اتالعان باعدارلامانىڭ ەكىنشى باعىتى بويىنشا 4 ادام 11 ملن 500 مىڭ تەڭگە كولەمىندە نەسيە الىپ, ءوز كاسىپتەرىن دوڭگەلەتىپ وتىر. ولاردىڭ كوبى مال شارۋاشىلىعىمەن اينالىسۋدا.
– 2020 جىلى اۋداندا «ەڭبەك» باعدارلاماسىنىڭ بارلىق باعىتتارى تىڭعىلىقتى جۇرگىزىلۋدە. الەۋمەتتىك جۇمىس ورىندارىنا 7 ادام جىبەرىلدى, قوعامدىق جۇمىس ورىندارىنا 62 ادام ورنالاستىرىلدى. «جۇمىسپەن قامتۋ جول كارتاسى 2020» باعدارلاماسى بويىنشا 13 جوبا جۇزەگە اسۋدا. ءبىر ايتا كەتەرلىگى, ورتالىققا وتىنىشپەن كەلگەن 225 ادامنىڭ 77 پايىزى تۇراقتى جۇمىسقا ورنالاستىرىلدى, – دەيدى اۋداندىق جۇمىسپەن قامتۋ ورتالىعىنىڭ باسشىسى بەرىك حاميتوۆ.
ءبىر ايتا كەتەرلىگى, جاستار تاجىريبەسىنە كەلگەن ماماندار ءۇشىن باسپانا دا قاراستىرىلعان. ديپلومى بار كەز كەلگەن جاس جۇمىسسىز قالمايدى.
اقمولا وبلىسى,
ەگىندىكول اۋدانى
