ايماقتار • 24 قىركۇيەك، 2020

شىمكەنتتە كوپقاباتتى 18  تۇرعىن ءۇي كۇردەلى جوندەۋدەن ءوتتى

30 رەت كورسەتىلدى

تۇرعىن ءۇي-كوممۋنالدىق دامۋدىڭ 2020 – 2025 جىلدارعا ارنالعان «نۇرلى جەر» مەملەكەتتىك باعدارلاماسى بويىنشا شىمكەنت قالاسىندا 70 كوپ قاباتتى ۇيدە كۇردەلى جوندەۋ جۇمىستارى جۇرگىزىلەدى، دەپ حابارلايدى Egemen.kz.

بۇگىنگى تاڭدا 18 ۇيدە جوندەۋ جۇمىستارى اياقتالدى. ال 37 تۇرعىن ۇيدە جۇمىستار جالعاسۋ ۇستىندە. 1 ۇيدە جۇمىستار ەندى باستالاتىن بولسا، قالعان 14 ءۇيدىڭ تۇرعىندارى جوندەۋ جۇمىستارىن وزدەرى جاساعاندىقتان باستارتقان. 

اياقتالعان جۇمىستاردىڭ ساپاسىن تەكسەرۋ ماقساتىندا قالا اكىمى مۇرات ايتەنوۆ سايرام شاعىن اۋدانىندا ورنالاسقان كوپقاباتتى ۇيلەرگە باردى. 

ەرىمبەتوۆ كوشەسىندەگى №34ا، 30، 33، 9 تۇرعىن ۇيلەردىڭ شاتىرلارى اۋىستىرىلىپ، كىرەبەرىسكە جوندەۋ جۇمىستارى جۇرگىزىلگەن. كەيبىرىنىڭ قاسبەتى جاڭا كەيىپكە ەنسە، ەندى ءبىرىنىڭ ليفتتەرى جوندەلگەن. ودان وزگە جەرتولە، كارىز جۇيەسى، ەلەكتروتەحنيكالىق جانە مونتاج جۇمىستارى اتقارىلعان. 

مودەرنيزاتسيالاۋ جۇمىستارىنا جاۋاپتى - «تۇرعىن ءۇي- شىمكەنت» جشس-ءى مەردىگەر مەكەمەسى.   

مۇرات ايتەنوۆ تۇرعىن ءۇي تورايىمدارىمەن كەزدەسىپ، اتقارىلعان جۇمىستاردى كوردى. سونداي-اق، سالا باسشىسىنا جۇمىسى اياقتالماعان نىسانداردى مەرزىمىندە ساپالى اياقتاۋدى جۇكتەدى. 

سوڭعى جاڭالىقتار

ۇقساس جاڭالىقتار