ءبىلىم • 22 قىركۇيەك، 2020

جوو وقىتۋشىلارى قاعاز ەسەپتىلىكتەن بوساتىلۋى ءتيىس

17 رەت كورسەتىلدى

جاڭا وقۋ جىلىنان باستاپ جوعارى وقۋ ورىندارىنداعى قاتاڭ ەسەپتەگى قۇجاتتاردىڭ 11 نىسانى الىنىپ تاستالدى. ول oقىتۋشىلارعا ساباققا دايىندالۋعا جانە كاسىبي دامۋعا كوبىرەك ۋاقىت بولۋگە مۇمكىندىك بەرەدى. بۇل تۋرالى ۆەدومستۆونىڭ Facebook-تەگى رەسمي پاراقشاسىندا تىكەلەي ەفيردە كورسەتىلگەن ءبىلىم جانە عىلىم مينيسترلىگىنىڭ اپپاراتتىق كەڭەسىندە ايتىلدى، دەپ حابارلايدى Egemen.kz

ءبىلىم جانە عىلىم ءمينيسترىنىڭ تاپسىرماسىنا سايكەس نورماتيۆتىك قۇجاتتاردى جۇرگىزۋ بويىنشا تالاپتار جوعارى وقۋ ورىندارى وقىتۋشىلارىنىڭ "قاعاز" جۇكتەمەسىن ازايتۋ ماقساتىندا تولىعىمەن قايتا قارالدى.

"كەيبىر جوعارى وقۋ ورىندارىندا نەشە ءتۇرلى ەسەپ تالاپ ەتىلەدى: كاسىپتىك باعدار تۋرالى جۋرنالدار، تۇلەكتەردىڭ جۇمىسقا ورنالاسۋى تۋرالى انىقتامالار جانە ت.ب. نە ءۇشىن؟ ءبىلىم جانە عىلىم مينيسترلىگىنە ول قاجەت ەمەس. جۇمىسقا ورنالاسقان تۇلەكتەردىڭ پايىزىن زەينەتاقى تولەۋ جونىندەگى مەملەكەتتىك ورتالىقتىڭ  ەلەكتروندىق بازاسى ارقىلى قارايمىز. بىرقاتار جوعارى وقۋ ورنى ساباق جوسپارىن قاعاز تۇرىندە سۇراتادى. كەيبىر جوعارى وقۋ ورىندارىندا وقىتۋشىلاردىڭ جۇكتەمەسى ونىڭ قانشا ستۋدەنت اكەلگەنىنە بايلانىستى. مۇندايعا جول بەرىلمەۋى كەرەك. بۇل ءبىلىم جانە عىلىم مينيسترلىگىنىڭ تالاپتارى دەيدى ەكەن. سونىمەن قاتار بيىلدان باستاپ قوسىمشا بىرنەشە باعىت بويىنشا ەسەپتىلىكتى جويدىق. وقىتۋشىلار وزدەرىنىڭ تىكەلەي مىندەتتەرىن ورىنداۋمەن عانا اينالىسۋى ءتيىس. بۇل ماسەلەنىڭ بارلىعىن جوعارى وقۋ ورىندارى وزدەرى شەشەدى"، دەدى بعم باسشىسى اسحات ايماعامبەتوۆ كەڭەس بارىسىندا.

ەسەپتەردى بارىنشا ازايتۋ جانە جوعارى وقۋ ورىندارى وقىتۋشىلارىن قاعاز جۇكتەمەدەن بوساتۋ ءۇشىن ءبىلىم جانە عىلىم ءمينيسترىنىڭ مىندەتىن اتقارۋشى ء"بىلىم بەرۋ ۇيىمدارى ءبىلىم بەرۋ قىزمەتىندە پايدالاناتىن قاتاڭ ەسەپتىلىكتەگى قۇجاتتاردىڭ نىسانىن بەكىتۋ تۋرالى" 2007 جىلعى 23 قازانداعى №502 بۇيرىعىنا وزگەرىستەر ەنگىزىلدى. بۇل شارالار جوعارى وقۋ ورىندارىنىڭ وقىتۋشىلارىن وزىنە ءتان ەمەس فۋنكتسيالاردان بوساتۋعا جانە جوو-لاردىڭ اكادەميالىق دەربەستىگىن كەڭەيتۋگە باعىتتالعان.

"بۇل 11 قۇجاتتىڭ نىسانى بۇدان بىلاي قاتاڭ ەسەپتىلىك قۇجاتتارى بولىپ ەسەپتەلمەيدى. ەندى ءار ۋنيۆەرسيتەتتىڭ باسشىلىعى وسى قۇجاتتاردى تولتىرۋ جانە ساقتاۋ نىساندارى قانداي ەكەنىن وزدەرى انىقتايدى. جۇمىس جوعارى وقۋ ورىندارىنىڭ اقپاراتتىق جۇيەسىندە جۇرگىزىلۋى ءتيىس. بۇل جوو-لاردىڭ باسقارۋشىلىق ەركىندىگى بولعانىمەن، جوعارى وقۋ ورىندارىنا ەسەپتىلىكتى بارىنشا ازايتۋدى ۇسىنامىز"، دەپ اتاپ ءوتتى ۆيتسە-مينيستر ميراس داۋلەنوۆ.

بعم بۇيرىعىنا سايكەس دەرەكتەردىڭ قايتالانۋىن بولدىرماۋ ماقساتىندا قاعاز تۇرىندەگى سىناق كىتاپشالارى الىنىپ تاستالعان بولاتىن. قازىرگى ۋاقىتتا ەلىمىزدىڭ جوعارى وقۋ ورىندارىنىڭ اقپاراتتىق جۇيەسىندە ستۋدەنتتەردىڭ، ماگيسترانتتار مەن دوكتورانتتاردىڭ بۇكىل وقۋ كەزەڭى ىشىندەگى وقۋ جەتىستىكتەرىنىڭ تاريحى جۇرگىزىلەدى، ول ترانسكريپتە كورسەتىلەدى. ترانسكريپت ستۋدەنتتىڭ سۇراۋى بويىنشا ونىڭ كەز كەلگەن وقۋ كەزەڭى ءۇشىن بەرىلەدى. 2021 جىلى وزىندىك ۇلگىدەگى ديپلومداردى ەنگىزۋ جوعارى وقۋ ورىندارىنىڭ ەسەپتىلىگىن قىسقارتۋعا مۇمكىندىك بەرەدى.

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار