"مەملەكەت باسشىسى قاسىم-جومارت كەمەل ۇلى توقاەۆ ءوزىنىڭ قازاقستان حالقىنا جولداۋىندا بۇقارالىق سپورتتى دامىتۋعا ەرەكشە كوڭىل ءبولدى. پاندەميا كەزىندە دەنساۋلىقتى نىعايتۋ ءۇشىن ءدال وسى باعىتتى دامىتۋ ماڭىزدى", دەدى ەرالى توعجانوۆ.
بۇگىنگى تاڭدا ەل تۇرعىندارىنىڭ 30,6%-ى سپورتپەن جانە دەنە شىنىقتىرۋمەن اينالىسادى. بۇل رەتتە, ەل بويىنشا ەڭ تومەنگى كورسەتكىشتەر شىمكەنت قالاسىندا (28,5%), نۇر-سۇلتان قالاسىندا (29,2%) جانە اقمولا وبلىسىندا (29,8%) بايقالىپ وتىرعانى ايتىلدى.
سونداي-اق, جيىن بارىسىندا بۇقارالىق سپورت تۇرلەرىن قارجىلاي قولداۋ, حالىق اراسىندا سپورتتى دارىپتەۋدىڭ ناقتى قادامدارىن ازىرلەۋ, بىلىكتى نۇسقاۋشىلار جانە سپورت زالدارىمەن قامتاماسىز ەتۋ ماسەلەلەرى تالقىلاندى. بالالار مەن جاستاردى سپورت سەكتسيالارىنا تارتۋ, جالپى ءبىلىم بەرەتىن مەكتەپتەردەگى سپورت زالدارى مەن جابدىقتارىنىڭ تاپشىلىعى ماسەلەسىنە ەرەكشە نازار اۋدارىلادى.
كەڭەس قورىتىندىسى بويىنشا ەرالى توعجانوۆ مەملەكەتتىك ورگاندارعا, ونىڭ ىشىندە مادەنيەت جانە سپورت مينيسترلىگىنىڭ ۇيلەستىرۋشى ءرولىن زاڭنامالىق تۇرعىدان كۇشەيتۋ, سپورتپەن اينالىساتىن ازاماتتاردىڭ ۇلەسىن ارتتىرۋ, بۇقارالىق سپورتتى قارجىلاندىرۋدى كاسىبي كلۋبتارعا جۇمسالاتىن شىعىنداردى قىسقارتۋ ەسەبىنەن ارتتىرۋ, سپورت زالدارى مەن مەكتەپتەردەگى جابدىقتار تاپشىلىعىن شەشۋ تۋرالى ناقتى تاپسىرمالار بەردى. سونداي-اق, وڭىرلەردىڭ اكىمدىكتەرىنە دەنە شىنىقتىرۋ-ساۋىقتىرۋ كەشەندەرىنىڭ قۇرىلىسىن ەرەكشە باقىلاۋعا الىپ, ولاردى 2020 جىلدىڭ سوڭىنا دەيىن اياقتاۋ تاپسىرىلدى.
