رۋحانيات • 21 قىركۇيەك، 2020

"استانا وپەرا" تەاترى VIII ماۋسىمىن اشتى

21 رەت كورسەتىلدى

مازمۇندى باعدارلامانى قر باس سانيتارلىق دارىگەرىنىڭ قاۋلىسىنا سايكەس ازىرگە تەك 50 ادام تاماشالاپ، باعالاي الدى. كونتسەرتتى سونداي-اق مادەنيەت جانە سپورت ءمينيسترى اقتوتى رايىمقۇلوۆا تاماشالادى، دەپ حابارلايدى Egemen.kz.

ديريجەرلىك تۇعىردا – الەمنىڭ كوپتەگەن ەلگە ايگىلى ماەسترو، تەاتردىڭ باس ديريجەرى، قازاقستاننىڭ ەڭبەك سىڭىرگەن قايراتكەرى، قر مەملەكەتتىك سىيلىعىنىڭ لاۋرەاتى الان بورىباەۆ. 

كونتسەرت الدىندا ول تەاتردىڭ تارتىمدى دا قىزىقتى باعدارلاما ازىرلەگەنىن جانە وعان نەگىزگى رەپەرتۋارداعى "اباي"، "دون كارلوس"، "توسكا"، "مادام باتتەرفلياي"، "سەۆيلدىك شاشتاراز" سىندى وپەرالاردان كورىنىستەر مەن اريالار ەنگىزىلگەنىن ايتقان بولاتىن. ەكى كۇن وتكەن كونتسەرتكە تەاتردىڭ تۇگەل دەرلىك سوليستەرى، حور ارتىستەرى، وركەستر مۋزىكانتتارى مەن ميمانس قاتىستى. 

"بارلىعى اسقان قۇلشىنىسپەن، زور قۋانىشپەن جۇمىسقا كىرىسە كەتتى، ءبارى دە جۇمىسىن ساعىنعان. ونەرىمىزدى كورەرمەن قاۋىمعا سىيلاعىمىز كەلەدى. ۇلى ابايدىڭ 175 جىلدىعىندا باعدارلاماعا ا.جۇبانوۆ، ل.ءحاميديدىڭ "اباي" وپەراسىنان كورىنىستەردى ەنگىزدىك"، دەپ اتاپ ءوتتى ماەسترو. 

فويەنىڭ بارلىق جەرىندە سانيتايزەرلەر ورناتىلعان، زالداعى كرەسلولار شاحمات تارتىبىندە ورنالاسقان. 

وزگەرىستەر وركەستر مۋزىكانتتارىنىڭ وتىرۋ رەتىنە دە اسەر ەتكەن، سانيتارلىق نورمالارعا سايكەس اسپاپشىلار ءبىر-بىرىنەن ءبىر جارىم مەتر قاشىقتىقتا جايعاسقان. مۇنداي اراقاشىقتىقتا مۋزىكانتتاردىڭ ءمىنسىز ءانسامبلىن جاساۋ قيىن، دەگەنمەن ارتىستەر بۇل تاپسىرمانى كەرەمەت ورىنداپ شىقتى. 

18-19 قىركۇيەك كۇندەرى ساحنا تورىندە جارقىراعان تەاتردىڭ وپەرا سوليستەرى – مايرا مۇحامەدقىزى، جۇپار عابدۋللينا، دينا حامزينا، ايگۇل نيازوۆا، الفيا كاريموۆا، ايزادا قاپونوۆا، ازامات جىلتىركوزوۆ، مەدەت چوتاباەۆ، جان تاپين، تالعات مۇساباەۆ، جانات شىبىقباەۆ، مەير باينەش، ەرجان سايپوۆ، ەلەنا گانجا، تاتيانا ۆيتسينسكايا، جاميليا دجاركيمباەۆا، گۇلجانات ساپاقوۆا، بيبىگۇل جانۇزاق، ءمادينا يسلاموۆا، سالتانات مۇراتبەكوۆا، نازىم ساعىنتاي، ەرۇلان كامەل، بەيىمبەت تاڭارىقوۆ جانە ت.ب. باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ. كونتسەرت رەجيسسەرى – ەرەنباق تويكەنوۆ. 

كورەرمەندەر ورىندارىنان تىك تۇرىپ، قوشەمەت كورسەتتى، ورىنداۋشىلاردىڭ اسقان شەبەرلىگى ءۇشىن "براۆو" دەپ ىستىق ىقىلاستارىن ءبىلدىردى. گالا-كونتسەرت اياقتالعان سوڭ قر مادەنيەت جانە سپورت ءمينيسترى اقتوتى رايىمقۇلوۆا ساحنا سىرتىنا كەلىپ، ارتىستەردى كەرەمەت ونەر كورسەتۋلەرىمەن قۇتتىقتادى. ال فويەدەگى كورەرمەندەر العان اسەرلەرىمەن ءبولىستى. 

"تەاترلارعا شەكتەۋلى كورەرمەن سانىمەن ءوز قىزمەتىن جالعاستىرۋعا رۇقسات بەرگەنىن ەستىگەن كەزدە، بىردەن بيلەت ساتىپ الۋعا كەلدىك. كلاسسيكالىق ونەردى، تەاتردى، ونىڭ ارتىستەرىن ساعىندىق. بولىپ جاتقان جايتتىڭ احۋالىن جەتكىزۋ قيىن، بىراق ەڭ باستى ەموتسيا، بالكىم، قۋانىش شىعار. ءومىرىمىزدىڭ قايتادان ءوز قالپىنا كەلىپ جاتقانىنان، اسقاق ونەرمەن قايتا قاۋىشۋعا مۇمكىندىكتىڭ پايدا بولعانىنان تۋىنداعان قۋانىش دەپ بىلەمىن. جۇمىستاعى وسىنشاما كوپ ۇزىلىسكە قاراماستان، بارلىق سوليستەر، حور ارتىستەرى كەرەمەت ۆوكالدىق قالىپتارىن ساقتاعان. بۇگىن وركەستر تاماشا ونەر كورسەتتى، وپەرا جاۋھارلارىنىڭ تۋىندىلارىن مىڭ قۇبىلتقان الان بورىباەۆتىڭ عاجايىپ ينتەرپرەتاتسياسىن تىڭداۋدىڭ ءوزى ءبىر عانيبەت"، دەپ پىكىرىمەن ءبولىستى تەاتردىڭ تۇراقتى كورەرمەنى ايدا ماحپيروۆا.

سوڭعى جاڭالىقتار

ۇقساس جاڭالىقتار