توتەنشە جاعداي مينيسترلىگى 15 تامىزدان بەرى رەسپۋبليكا بويىنشا ءورت قاۋىپسىزدىگى ايلىعىن ۇيىمداستىرۋدا. وسىلايشا, جىلىتۋ ماۋسىمى جاقىنداعان تۇستا تۇرعىنداردىڭ نازارىن ادەتتەگىدەي قاۋىپسىزدىك شارالارىنا اۋدارىپ وتىر.
– جىلداعى ءداستۇر بويىنشا جەكە سەكتوردا تۇراتىن ادامدار اراسىندا رەيد وتكىزۋدەمىز. ماقسات – ءورت قاۋىپسىزدىگىنىڭ نەگىزگى ەرەجەلەرىن ءتۇسىندىرۋ. ءبىرىنشى كەزەكتە تۇرمىسى تومەن جانە كوپبالالى وتباسىلاردىڭ ءۇي-جايىن تەكسەرۋگە باسىمدىق بەرىلەدى, – دەدى مينيسترلىكتىڭ باسقارما باستىعى ورال ءابدىراحمانوۆ.
توتەنشە جاعداي ماماندارى جىلۋ پەشتەرى مەن قوندىرعىلارىنىڭ دايىندىعىنا ءمان بەرەدى. سونداي-اق تۇرعىنداردى پەش مۇرجالارىن ىستان تازارتۋعا شاقىرادى.
دەرەكتەرگە سۇيەنسەك, بىلتىرعى جىلىتۋ ماۋسىمىندا رەسپۋبليكا بويىنشا 5 مىڭنان استام ءورت شىققان. سالدارىنان 222 ادام كوز جۇمدى. بۇعان نەگىزىنەن پەش جاققاندا قاۋىپسىزدىك ەرەجەلەرىن ساقتاماۋ سەبەپ. سونىمەن قاتار ەلەكتر جەلىلەرىن مونتاجداعاندا, ىسكە قوسقاندا قاۋىپسىزدىك ەرەجەلەرىنىڭ بۇزىلۋى دا توتەنشە جاعدايعا تۇرتكى بولادى.
وكىنىشكە قاراي حالىقتىڭ ءورت قاۋىپسىزدىگىنە قارسى مادەنيەتى ءالى اقساپ تۇر. ۆەدومستۆو ماماندارى تاراپىنان ارنايى رەيدتەردىڭ ءجيى جۇرگىزىلەتىنى دە سوندىقتان. ءتۇسىندىرۋ جۇمىستارى توتەنشە جاعدايدىڭ الدىن الۋعا سەپتىگىن تيگىزەدى.
– جىلۋ پەشتەرىنىڭ مۇرجاسى ءۇش ايدا ءبىر رەت تازالانۋى كەرەك. ال ۇزدىكسىز جۇمىس ىستەيتىن پەشتەرگە ەكى ايدا ءبىر رەت نازار اۋدارعان ابزال. پەشتى قاراۋسىز قالدىرماۋ كەرەك. اسىرەسە بالاسى بار ۇيلەر مۇقيات بولعان ءجون. بۇدان بولەك قىزىپ تۇرعان پەشتىڭ ۇستىنە اياق كيىم مەن سۋ اعاشتى كەپتىرۋگە بولمايدى, – دەيدى توتەنشە جاعدايلار مينيسترلىگىنىڭ وكىلدەرى.
