اقمولا وبلىسى ارشالى اۋدانىنا قاراستى كونستانتينوۆكا اۋىلى اگروتۋريزم باعىتى بويىنشا تۋريست قابىلدايتىن ەلدى مەكەننىڭ ءبىرى. مۇندا اۋىل شارۋاشىلىعىمەن اينالىساتىن ازاماتتار كوپ. ءبىرى ومارتا شارۋاشىلىعىمەن اينالىسسا, ەندى ءبىرى ەت, ءسۇت, ۇن تاعامدارى سىندى باسقا دا اۋىلشارۋاشىلىق ونىمدەرىن وندىرەدى.
ۋاقىت وتكەن سايىن جەرگىلىكتى تۇرعىندار ءۇشىن اۋىلداعى ەڭبەكتىڭ شىعىنى ارتىپ, تابىسى تومەندەپ بارادى. وعان اسەر ەتەتىن فاكتور جەتەرلىك. وسى تۇستا اگروتۋريزم از دا بولسىن اۋىل احۋالىنا دەمەۋ بولا الادى. بۇل پىكىردى اگروتۋريزمدى دامىتۋ ماقساتىندا تاباندى ەڭبەك ەتىپ جۇرگەن ازاماتتاردىڭ ءبىرى الماس سەتەرباەۆ تا قۋاتتايدى.
– جيىرما جىلدىڭ ىشىندە بەلارۋس ەلى ەۋروپا كولەمىندە اۋىلدىق ءتۋريزمدى دامىتىپ, پايدا تابۋدا كوش باستادى. وسىنداي مۇمكىندىكتى ءبىزدىڭ ەل دە پايدالانا الادى. بۇل – قالا مەن اۋىل حالقىنىڭ اراسىن جاقىنداتا تۇسەتىن باعىت. سول ارقىلى اۋىلدىڭ ەكونوميكالىق احۋالىن كوتەرۋگە بولادى. حالىقتىڭ مادەني تانىمى دا جەتىلە تۇسەدى. سىرتتان كەلگەن ادامدارمەن ءتىل تابىسقان اۋىل بالاسىنىڭ جاڭا ءبىر قىزىعۋشىلىعى پايدا بولۋى دا مۇمكىن. اگروتۋريزمنىڭ كوزگە كورىنە قويمايتىن نەمەسە بىردەن بايقالا بەرمەيتىن پايدالى جاقتارى وسىنداي. بۇدان بولەك, اۋىل ادامدارى قولىنداعى ءونىمىن كەلگەن تۋريستكە ۇسىنا الادى, – دەيدى قازاقستان اگرو جانە اۋىلدىق تۋريزم قاۋىمداستىعىنىڭ كەڭەسشىسى الماس سەتەرباەۆ.
ءيا, بۇل باعىتتا ىزدەنىپ, ۇيىمداستىرا بىلگەن ادامعا تابىس تابۋعا دا بولادى. ءتۇرلى تۋرلاردى ۇيىمداستىرىپ جۇرگەن ازاماتتار مۇنداي ساياحاتتىڭ پايداسى مول ەكەنىن ايتادى. بىراق بۇل ءۇشىن كەشەندى جوسپار قۇرىپ, ءتيىمدى شەشىم قابىلداعان ابزال. سەبەبى ءبىزدىڭ ەلدە اگروتۋريزم ەندى-ەندى قالىپتاسىپ كەلەدى. ماسەلەن, جوعارىداعى بەلارۋس ەلىندە تۋريستەردى قابىلداۋعا ماشىقتانعان 2000-نان استام اگروقوجالىق بار. ال بىزدە شارۋا قوجالىقتارى كوپ بولعانىمەن, ولاردىڭ باسىم بولىگى تۋريستەرگە قىزمەت كورسەتۋگە داعدىلانا قويعان جوق. الىس ايماقتاعى ءوندىرىسى ىلگەرى اۋىلدارعا اپاراتىن جولدىڭ جايى دا ءوز الدىنا ءبىر ماسەلە. مىنە, وسىنداي كەدەرگىلەردىڭ قولبايلاۋ بولارى انىق.
ءبىز بارعان كونستانتينوۆكا اۋىلىنا جاقىنداي بەرگەندە جولدىڭ وي-شۇقىرعا اينالىپ, توزا باستاعانىن بايقادىق. نۇر-سۇلتان قالاسىنان اسا الىس بولماسا دا جول جايى كوڭىل كونشىتپەدى. ەسەسىنە مۇنداعى ەرەكشە كاسىپپەن اينالىساتىن تۇرعىنداردىڭ جۇمىسىن كورگەندە ءتانتى بولماسقا امالىڭ جوق. اۋدانعا جەتكەن بەتتە-اق تەمىر ۇستاسى الەكساندر كنيازەۆتىڭ ۇيىنە تۇستىك. تەمىردىڭ ءيىن قاندىرىپ, تۇرلەندىرگەن تۋىندىلارى كوزدىڭ جاۋىن الادى. ءۇيىنىڭ قاقپاسىنان باستاپ, شارباقتارىنا دەيىن يىلگەن تەمىردەن سالعان. ءتىپتى شاعىن ءبىر بولمەگە ايگىلى «تاقتار تالاسى» سەريالىندا قولدانىلعان تاققا ورىندىق قويىپتى. ۇستا 4-5 ورىندىق پەن ۇستەلدى ىستەپ شىعۋعا بوس ۋاقىتىنىڭ ءبىرازى كەتەتىنىن ايتادى. ەلىمىزدىڭ تۇكپىر-تۇكپىرىنەن ارنايى تاپسىرىس بەرۋشىلەر كەلىپ تۇراتىن كورىنەدى. 30-دان ەندى اسقان ازامات ۇستالىقتان بولەك, ساياحاتشى دا ەكەن. الەمنىڭ ءبىراز ەلىن شارلاپ شىعىپتى.
قىزىقتار مۇنىمەن تاۋسىلعان جوق. ۇيىمداستىرۋشىلار ءبىر توپ باق وكىلىن بال اراسىنىڭ ورداسىنا اكەلىپ توپ ەتكىزدى. اۋىلدان قاشىقتاۋ جەردە ورنالاسقان ومارتاشىنىڭ جۇمىسىن باقىلاپ, ءتاتتى بالدىڭ ءدامىن تاتتىق. ومارتاشى سەرگەي ەروفەەۆ ارالاردىڭ ۇياسىن اشىپ كورسەتىپ, بال جيناۋ پروتسەسىن ءتۇسىندىردى.
تاعى ءبىر كاسىپپەن اينالىسىپ وتىرعان ازاماتتىڭ ەسىمى – بەرىك كۋلديباەۆ. ول اۋىلدا اتا كاسىپتى جالعاستىرىپ وتىر. ۇزاق جىلدار بويى شەكارا قىزمەتىندە بولعان ونىڭ اۋىل شارۋاشىلىعىمەن اينالىسۋدى قولعا العانىنا 10 جىل بولىپتى. بۇگىندە ءتورت ت ۇلىگىن كوبەيتىپ, بەرەكەلى شارۋانىڭ شىرايىن كىرگىزىپ وتىر. بۇل ازاماتتىڭ دا شارۋاشىلىعىنىڭ جاي-كۇيىنە كوزىمىز تويىپ, كوڭىلىمىز تولدى.
قازاقستان اگرو جانە اۋىلدىق تۋريزم قاۋىمداستىعىنىڭ پرەزيدەنتى حاليدا تولەگەنوۆا مەن الماس تاڭعىت ۇلى كونستانتينوۆكا اۋىلىنان تۋريستەرگە ارناپ قوناقۇي دە اشقان. ءبىر قىزىعى مۇندا تۇراقتاۋ تەگىن.
دەمالىس ورنىندا ارنايى اۋىل بالالارىنىڭ قولونەر بۇيىمدارى قويىلعان زال بار. ۇيىمداستىرۋشىلار كەز كەلگەن ءىستى اۋىل تۇرعىندارىمەن بايلانىستىرا بىلگەن. ايتپاقشى, قاۋىمداستىق وكىلدەرىنىڭ مۇنداي باستامالارىن Kazakh Tourism ۇك اق قولداپ وتىر. سوندىقتان دا مۇنداي ساياحاتتاردىڭ دا اۋقىمى كەڭەيە تۇسپەك.
– اگروتۋريزم سالاسى بويىنشا اقمولا وبلىسىنداعى ارشالى, ەرەيمەنتاۋ, اقكول اۋداندارىن تاڭداپ الدىق. ءۇش اۋداننان ءبىر-ءبىر اۋىلدى تۋريستەرىمىزدى اكەلەتىن ورىن رەتىندە بەلگىلەدىك. بۇل جۇمىستى باستاعانىمىزعا كوپ بولا قويعان جوق. سوعان قاراماستان 200-دەن استام ءتۋريستى ساياحاتقا اكەلدىك. اگروتۋريزمگە ارنالعان 5 جىلدىق جوسپارىمىز بار. بۇدان باسقا قوسىمشا 4 وبلىستى قامتىعىمىز كەلەدى. ازىرگە دايىندىق جۇمىستارىن پىسىقتاپ جاتىرمىز, – دەيدى الماس تاڭعىت ۇلى.
ساپار سوڭىندا اۋىل اجەلەرىنەن قۇرالعان «تەچەت رۋچەي» توبى ءان سالىپ, «مولودتسى-ۋدالتسى» بالالار توبى اعاش قاسىقتى مۋزىكالىق اسپاپ رەتىندە قولدانىپ ونەر كورسەتتى. ودان سوڭ قوناق ءۇيدىڭ اۋلاسىنا جۋرناليستەر قاۋىمى اعاش وتىرعىزىپ, «بال» باعىن اشتىق. باسىلىمنىڭ وكىلى رەتىندە اۋىلداعى ساياباققا «Egemen Qazaqstan» گازەتىنىڭ اتاۋى جازىلعان كوشەت وتىرعىزدىق.
