باسقارما باسشىسى بۇقارالىق سپورتتى دامىتۋدىڭ مەملەكەت الدىندا تۇرعان باسىم باعىتتاعى مىندەتتەرىنىڭ ءبىرى ەكەنىن اتاپ ءوتتى.
ء"بىزدىڭ مىندەتىمىز – ءار قالادا, ءار اۋىلدا جاستار, بالالار مەن ۇلكەندەردىڭ بەلسەندى ءومىر سالتىن ۇستانۋىنا, جاتتىعۋىنا جاعداي جاساۋ, مۇمكىندىك تۋدىرۋ. وبلىستا دەنە شىنىقتىرۋمەن اينالىسۋعا تۇرعىنداردى تارتۋ بويىنشا جۇمىستاردى ۇيىمداستىرۋ ماقساتىندا 262 سپورت نۇسقاۋشىسى, ونىڭ ىشىندە اۋىلدىق جەرلەردە 76 مامان جۇمىس ىستەيدى", دەپ اتاپ ءوتتى تەمىرحان ابىلاەۆ.
قاراعاندى وبلىسىندا تۇرعىنداردى سالاماتتى ءومىر سالتىنا بارىنشا كوپ تارتۋ ءۇشىن دەنە شىنىقتىرۋ-ساۋىقتىرۋ كەشەندەرى, سپورت زالدارى جانە اشىق سپورت الاڭدارى سالىنۋدا.
"وڭىردە الداعى ەكى جىلدا 15 ءىرى سپورت نىسانى اشىلادى. ولاردىڭ قاتارىندا تەمىرتاۋداعى دەنە شىنىقتىرۋ-ساۋىقتىرۋ كەشەنى (دسك), قاراعاندىداعى ۇلكەن جانە ۇستەل تەننيسى ورتالىقتارى, جەزقازعان, شاحتينسك قالالارىنداعى جانە باسقا دا ەلدى مەكەندەردەگى سپورت كەشەندەرى بار. سونداي-اق, اۋىلداردا "اۋىل – ەل بەسىگى" باعدارلاماسى بويىنشا سپورت نىساندارىنىڭ قۇرىلىسى جۇرگىزىلۋدە. اتاسۋ كەنتىندە باسسەين, اقتاس پەن بوتاقاردا دسك اشۋ جوسپاردا بار", دەدى تەمىرحان ابىلاەۆ.
جاڭا نىساندار سالۋمەن قاتار, وڭىردە بۇرىننان بار نىسانداردى اۋقىمدى جوندەۋ جۇمىستارى جۇرگىزىلۋدە. مىسالى, اقسۋ-ايۋلى كەنتىندە سپورت مەكتەبى رەتكە كەلتىرىلدى, كەنشىلەر استاناسىندا "قاراعاندى-ارەنا" مۇز سارايى جوندەۋدەن وتكەن. مۇندا شاتىر, جۇگىرۋ جولدارى اۋىستىرىلىپ, شەشىنەتىن بولمەلەر مەن باسقا دا ورىندار رەتكە كەلتىرىلدى. جول كارتاسى بويىنشا جوندەۋ جۇمىستارى 11 نىساندى قامتىعان. ولاردىڭ قاتارىندا نۇركەن ءابدىروۆ اتىنداعى سپورت سارايى, جەڭىل اتلەتيكادان وليمپيالىق رەزەرۆتىڭ مامانداندىرىلعان بالالار مەن جاسوسپىرىمدەر مەكتەبى جانە باسقالارى بار. بيىل وڭىردەگى 10 سپورت مەكتەبىندە جالپى سوماسى 210,9 ملن تەڭگە بولاتىن جوندەۋ جۇمىستارى جۇرگىزىلۋدە. جالپى, وبلىستا "جۇمىسپەن قامتۋدىڭ جول كارتاسى" باعدارلاماسى اياسىندا سپورت سالاسىنداعى 14 جوباعا 1 ميلليارد تەڭگەگە جۋىق قوماقتى قاراجات بولىنگەن.
تەمىرحان ابىلاەۆ كارانتينگە قاراماستان, قاراعاندىلىق سپورتشىلاردىڭ ءوز جاتتىعۋلارىن جالعاستىرعانىن, ال وبلىستىڭ كوپتەگەن تۇرعىندارىنىڭ ونلاين-جارىستاردىڭ جاڭا فورماتىن قولدانعانىن اتاپ ءوتتى. پاندەميا كەزىندە سپورت باسقارماسى سپورتتىڭ 24 ءتۇرى بويىنشا 142 ونلاين-جارىس وتكىزگەن. وبلىستىڭ جۇزگە تارتا تۇرعىندارى دوپپەن جونگلەرلىك ەتۋ, جەڭىل اتلەتيكالىق كروسس, كۇش گيمناستيكاسى جانە دويبىدان وتكەن ءتورت ونلاين-تۋرنيرگە جانە سپورت كۇنىنىڭ قۇرمەتىنە بارلىق ساناتتاعى تۇرعىندار ءۇشىن ۇيىمداستىرىلعان سۋرەت كونكۋرستارىنا قاتىستى. قاراعاندى سپورت مەكتەپتەرىنىڭ جاتتىقتىرۋشىلارى AulaFit رەسپۋبليكالىق چەللەندجدىڭ بەلسەندى قاتىسۋشىلارى بولدى. ولار قالانىڭ ءارتۇرلى اۋداندارىندا تۇرعىن ۇيلەر مەن مەكتەپتەردىڭ اۋلالارىندا بالالارعا ارنالعان ەكى مىڭعا جۋىق ادام قاتىسقان 70 جاتتىعۋ وتكىزدى. ءبىر سوزبەن ايتقاندا, باسقارما جاڭا جاعدايدا سپورتتى جانە سالاماتتى ءومىر سالتىن ناسيحاتتاۋ بويىنشا بەلسەندى جۇمىس اتقاردى جانە ونى الداعى ۋاقىتتا دا جالعاستىراتىن بولادى.
قازىرگى تاڭدا سپورتشىلاردىڭ جاتتىعۋىنا رۇقسات بەرىلدى: سپورت كەشەندەرى مەن باسسەيندەر جۇمىس ىستەي باستادى. "ارينە, مۇنىڭ ءبارى قاجەتتى سانيتارلىق نورمالاردى ساقتاي وتىرىپ ىسكە اسۋدا. جارىستاردى وتكىزۋگە ءالى رۇقسات بەرىلگەن جوق, دەگەنمەن ولار ونلاين رەجيمىندە مىندەتتى تۇردە جالعاسىن تابادى", دەيدى باسقارما باسشىسى.
سونىمەن قاتار بريفينگتە تەمىرحان ابىلاەۆ وبلىس باسشىلىعىنىڭ قاراعاندىلىق سپورتشىلاردى قولداۋ ماقساتىندا مۇمكىن بولعان بارلىق جاعدايدى جاساپ وتىرعانىن جەتكىزدى. مىسالى, تاياۋدا عانا ەل نامىسىن قورعاپ جۇرگەن جەتەكشى سپورتشىلاردىڭ شاكىرتاقىسىن كوبەيتۋ جونىندە شەشىم قابىلدانىپتى. بۇعان قوسا, شاكىرتاقى الۋشىلاردىڭ سانى ءوسىپ, ول 104-تەن 165 سپورتشىعا جەتكەن.
بريفينگتىڭ سوڭىندا تەمىرحان ابىلاەۆ وبلىس تۇرعىندارىن سالاماتتى ءومىر سالتىن ۇستانىپ, سپورتپەن جانە دەنە شىنىقتىرۋمەن تۇراقتى تۇردە اينالىسۋعا شاقىردى.
قاراعاندى وبلىسى
