ايماقتار • 17 قىركۇيەك، 2020

ماڭعىستاۋدا ءمامس اياسىندا ەمحانالارعا تىركەلۋ باستالدى

18 رەت كورسەتىلدى

تۇرعىندار 15 قىركۇيەكتەن 15 قاراشا ارالىعىندا تىركەلە الادى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىسىنىڭ مىندەتتى الەۋمەتتىك مەديتسينالىق ساقتاندىرۋ قورىنىڭ باسشىسى رۋسلان بەكتۋباەۆ مالىمدەدى، دەپ حابارلايدى Egemen.kz.

ونىڭ ايتۋىنشا، تىركەلگەن ازاماتتار 2021 جىلدىڭ 1 قاڭتارىنان باستاپ مەديتسينالىق كومەكتى الا باستايدى. بۇل رەتتە مەديتسينالىق ۇيىم قورمەن كەلەر جىلعا ارنالعان تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جانە ءمامس جۇيەسىندە العاشقى مەديتسينالىق-الەۋمەتتىك كومەك قىزمەتتەرىن كورسەتۋگە شارت جاساسۋى ءتيىس.

ەمحاناعا تىركەلۋ ەلەكتروندىق ۇكىمەتتىڭ www.e.gov.kz ۆەب پورتالى ارقىلى ەلەكتروندىق تسيفرلىق قولتاڭبا بولعان كەزدە عانا جۇرگىزىلەدى. پورتالعا تىركەلگەننەن سوڭ دەنساۋلىق ساقتاۋ بولىمىندە ورنالاسقان "مەديتسينالىق-سانيتارلىق العاشقى كومەك كورسەتەتىن ۇيىمعا تىركەلۋ" قىزمەتىن تاڭداۋ قاجەت.

"ەمحانا پاتسيەنت تۋرالى اقپاراتتى مەملەكەتتىك اقپاراتتىق جۇيەلەردەن اۆتوماتتى تۇردە الادى. وپەراتسيا ءساتتى بولعان جاعدايدا ازاماتقا مەديتسينالىق ۇيىمنىڭ "ەلەكتروندىق تسيفرلىق قولتاڭبا" قويىلعان ەلەكتروندى قۇجات تۇرىندە تىركەۋ تۋرالى حابارلاما بەرىلەدى. تىركەلۋ ءۇشىن ەمحانالاردىڭ تىزىمىمەن قوردىڭ www.fms.kz سايتىندا تانىسۋعا بولادى. تىركەلۋ ناۋقانىنىڭ قورىتىندىسى بويىنشا مەديتسينالىق ۇيىمدار بولىنىسىندە حالىقتىڭ تىركەلگەن سانىنا بايلانىستى 2021 جىلعا قارجىلاندىرۋ جوسپارلانادى. ءاربىر تىركەلگەن تۇرعىن ءۇشىن مەديتسينالىق ۇيىمدارعا اي سايىن جان باسىنا شاققانداعى قارجىلاندىرۋ تولەنەدى"، دەدى وبلىستىق مىندەتتى الەۋمەتتىك مەديتسينالىق ساقتاندىرۋ قورىنىڭ باسشىسى رۋسلان بەكتۋباەۆ.

حالىقتىڭ جەكەلەگەن ساناتتارى تىكەلەي ەمحاناعا تىركەلە الادى. ول ءۇشىن ءوتىنىش پەن جەكە باسىن كۋالاندىراتىن قۇجات قاجەت. بۇل ساناتقا زەينەتكەرلەر، مۇگەدەكتەر، زاڭ بويىنشا بالا كەزىنەن مۇگەدەككە تاعايىندالعان قامقورشىلار، پاترونات تاربيەشىلەر، كولونيالاردا جازاسىن وتەپ جاتقاندار، ستۋدەنتتەر، مەرزىمدى قىزمەتتەگى اسكەري قىزمەتشىلەر، شەت مەملەكەتتە تۋىلعان بالالار، سەنىمحات بويىنشا تىركەۋدى رەسىمدەيتىن ادامدار جاتادى.

ساقتاندىرۋ مارتەبەسىنە قاراماستان، بارلىق ازاماتتار تەگىن مەديتسينالىق كومەكتىڭ كەپىلدىك بەرىلگەن كولەمىن الۋعا قۇقىلى. جوسپارلى ەمدەۋگە جاتقىزۋ، بەيىندى مامانداردىڭ قابىلداۋى، قىمبات تۇراتىن تەكسەرۋلەردەن ءوتۋ جانە جوعارى تەحنولوگيالىق ەم الۋ ءۇشىن ءمامس جۇيەسىندە ساقتاندىرىلعان بولۋى قاجەت. ساقتاندىرۋ مارتەبەسىن ەلەكتروندىق ۇكىمەت پورتالىندا، قور سايتىندا جانە Telegram-داعى SaqtandyryBot ارقىلى بىلۋگە بولادى.

 

 

ماڭعىستاۋ وبلىسى

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار