كونفەرەنتسيادا مەملەكەتتىك حاتشى قىرىمبەك كوشەرباەۆ پەن پرەمەر-ءمينيستردىڭ ورىنباسارى ەرالى توعجانوۆتىڭ كونفەرەنتسيا قاتىسۋشىلارىنا قۇتتىقتاۋ حاتتارى وقىلدى. ق.كوشەرباەۆتىڭ پىكىرىنشە, وزىق IT-تەحنولوگيالاردى جەدەل ەنگىزە وتىرىپ زاماناۋي ءبىلىم بەرۋدى ودان ءارى دامىتۋ, ءبىلىم بەرۋ مەكەمەلەرىنىڭ قىزمەتىن تولىق تسيفرلاندىرۋ ماسەلەلەرى, ءبىلىم بەرۋدى جاڭعىرتۋ پەرسپەكتيۆالارى اسا ماڭىزدى قۇزىرەتكە اينالۋى ءتيىس.
ء«بىزدىڭ ەڭ باستى مىندەتىمىز – قازىرگى زاماننىڭ جاھاندىق سىن-قاتەرلەرىن جەدەل تۇردە شەشۋ. سوڭعى وقيعالاردى ەسكەرە وتىرىپ ءبىلىم بەرۋ ساياساتى جۇيەسىن جاڭارتۋ ءبىلىم بەرۋ پروتسەسىن ساپالى جاقسارتۋعا مۇمكىندىك بەرەدى. وسىعان دەيىنگى تاجىريبە كورسەتكەندەي, قاشىقتان ءبىلىم بەرۋ تەحنولوگيالارى ماڭىزدى ءرول اتقارادى», دەلىنگەن مەملەكەتتىك حاتشىنىڭ حاتىندا.
پرەمەر-ءمينيستردىڭ ورىنباسارى ەرالى توعجانوۆتىڭ حالىقارالىق جيىنعا قاتىسۋشىلارعا جولداعان حاتىندا جوعارى ساپالى ءبىلىم بەرۋ, وقىتۋدىڭ فورماتى مەن مازمۇنىن جاڭارتۋ – كەزەك كۇتتىرمەس ماسەلە ەكەنى ايتىلعان.
حالىقارالىق ونلاين-كونفەرەنتسيانى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ اشىپ, وقىتۋدىڭ نەعۇرلىم قولايلى قۇرالدارى مەن تاسىلدەرىن, تەحنولوگيالارىن ىزدەۋدە الەمدىك پەداگوگيكالىق پراكتيكانىڭ بارلىق قالىپتاسقان قاعيدالارىن قايتا قاراپ, جاڭارتۋ جۇمىستارىن جۇرگىزۋ كەرەگىن اتاپ ءوتتى. قاشىقتان وقىتۋ تەحنولوگيالارى ءبىلىم بەرۋ جۇيەسى ءۇشىن ەڭ ۇلكەن سۇرانىسقا يە ەكەنىن جەتكىزدى. بۇل ءوز كەزەگىندە جاھاندىق پروتسەستەردىڭ, اتاپ ايتقاندا, تسيفرلاندىرۋ مەن اقپاراتتاندىرۋدىڭ ىقپالىنا بايلانىستى كەڭ اۋقىمدى جاڭعىرتۋدى تالاپ ەتەدى.
كونفەرەنتسيانىڭ ءبىرىنشى كۇنىندە ءبىلىم جانە عىلىم ۆيتسە-ءمينيسترى رۇستەم بيعاري, تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى دارىن تۇياقوۆ, تومسك مەملەكەتتىك ۋنيۆەرسيتەتىنىڭ رەكتورى ەدۋارد گالاجينسكي, UNINETTUNO حالىقارالىق تەلەماتيكالىق ۋنيۆەرسيتەتىنىڭ زەرتتەۋلەر جانە يننوۆاتسيالار ءبولىمىنىڭ باسشىسى الەكساندرو كافوريو, Modern Education & Research Institute ديرەكتورى ەكاتەرينا تسارانوك, «ميسيس» عىلىمي-زەرتتەۋ تەحنيكالىق ۋنيۆەرسيتەتىنىڭ ونلاين وقىتۋ ورتالىعىنىڭ ديرەكتورى نۇرلان قياسوۆ جانە باسقا دا ساراپشىلاردىڭ باياندامالارى تىڭدالدى.
حالىقارالىق كونفەرەنتسيانىڭ جۇمىسى بۇگىن دە جالعاسىپ جاتىر. شارا باعدارلاماسىندا ساندىق قاشىقتان وقىتۋ قاۋىمداستىعىنداعى ۇزدىك تاجىريبەلەردى كورسەتەتىن ۆوركشوپتار, ۆيرتۋالدى سەسسيالار جوسپارلانعان.
