سايىپ كەلگەندە, الماتى قالاسىنىڭ ەكولوگياسىن جاقسارتۋ ىسىندە ماڭىزدى قادام جاسالۋدا. ويتكەنى اتموسفەرالىق اۋانىڭ ساپاسىنا جۇمىسى كەرى اسەر ەتەتىن نىساندار قالادا بارشىلىق (اۆتوكولىك, قوعامدىق كولىك جانە جەكە سەكتوردىڭ اۋاعا زياندى شىعارۋلارى, جىلۋ مەن ەنەرگيانى كومىر جاعۋ ارقىلى وندىرەتىن وزگە دە كاسىپورىندار). ونىڭ ۇستىنە, قالانىڭ الدىندا كوگالداندىرۋعا, جەل رەجىمىن ەسكەرە وتىرىپ قۇرىلىس جۇرگىزۋگە, وتىننىڭ ساپاسىنا جانە ت.ب. بايلانىستى ماسەلەلەردى شەشۋ تۇر.
جەو-2-ءنى جاڭعىرتۋدىڭ كوپتەگەن نۇسقاسى قاراستىرىلدى. «الەس» اق-تىڭ تاپسىرىسى بويىنشا بۇل جۇمىستى ەنەرگەتيكا سالاسىندا قۇرىلىس جۇرگىزۋدىڭ 60 جىلدىق تاريحى بار, جىلۋ ەنەرگەتيكاسى سالاسىنداعى جوباعا دايىندىق جانە جوبالاۋ جۇمىستارىنىڭ كەڭ اۋقىمىن اتقاراتىن «قازەنەرگوونەركاسىپتىكعزجى» جوبالاۋ ينستيتۋتى جۇرگىزدى.
جەو-2-ءنى تابيعي گاز جاعۋعا كوشىرۋ اتموسفەراعا زياندى زاتتار شىعارۋدى ازايتۋدىڭ جانە ستانسا اسەرىن تيگىزەتىن اۋماقتا اۋانىڭ ساپاسىن جاقسارتۋدىڭ ەڭ ءتيىمدى جولى ەكەنى كۇمانسىز. سول ارقىلى اتموسفەراعا لاستاۋشى زاتتار شىعارۋدىڭ جىلدىق سانى 80%-دان استامعا قىسقارادى.
قازىرگى ۋاقىتتا «سامۇرىق-ەنەرگو» اق تاريفتىك سالماقتىڭ مەيلىنشە تومەندەۋى مىندەتتى تۇردە قامتاماسىز ەتىلۋىن جانە جوبانىڭ تولىق اقتالۋىن ەسكەرە وتىرىپ, ونى قارجىلاندىرۋدىڭ ءتيىمدى كوزدەرى مەن قارجىلاندىرۋ تاسىلدەرىن تارتۋ بويىنشا جۇمىستى جالعاستىرۋدا. وسىلايشا كومپانيا جىلۋ جانە ەلەكتر ەنەرگياسىنىڭ نەگىزگى تۇتىنۋشىلارى بولىپ تابىلاتىن قالا تۇرعىندارىنىڭ بارلىق مۇددەلەرىن ەسكەرەدى.
ايتا كەتەلىك, الماتى جەو-2 – قازاقستانداعى ەلەكتر جانە جىلۋ ەنەرگياسىن قاتار وندىرەتىن اسا ءىرى جىلۋ ستانساسى. ستانسا الماتى قالاسىن جىلۋ جانە ەلەكتر ەنەرگياسىمەن قامتاماسىز ەتەدى. جەو-2-ءنىڭ بەلگىلەنگەن ەلەكترلىك قۋاتى 510 مۆت-تى, جىلۋلىق قۋاتى 1411 گكال/ساعاتتى قۇرايدى.
