مىنە, ەندى وسى جۇمىس مارەسىنە جەتتى. مينيسترلىك وسىعان بايلانىستى جاقىندا تاراتقان اقپاراتىندا:
«ستۋدەنتتەرگە قۇجاتتاردى راسىمدەۋ بارىسىندا جوو-نىڭ ۆيرتۋالدى قابىلداۋ كوميسسيالارى ارقىلى جەڭىلدەتىلگەن فورمات ۇسىنىلدى. شەتەلدىك جوعارى وقۋ ورىندارىنىڭ باسىم بولىگى قازاقستاندىق جوو سياقتى وقۋ جىلىن قاشىقتان ءبىلىم بەرۋ تەحنولوگيالارىن پايدالانا وتىرىپ باستادى. الايدا كەيبىر شەتەلدىك جوو ءوز ستۋدەنتتەرىنە قاشىقتان وقىتۋدى جالعاستىرۋ ءۇشىن پلاتفورمالار ۇسىنا المادى. تامىز ايىنىڭ باسىندا ءبىلىم جانە عىلىم مينيسترلىگى وقۋىن جالعاستىرۋ ءۇشىن وزىنە بايلانىستى ەمەس سەبەپتەر بويىنشا ەلدەن شىعا الماعان ستۋدەنتتەرگە كومەك كورسەتە باستادى. الدىن الا قابىلدان شەشىمدەر ارقىلى 2 مىڭنان اسا قازاقستاندىق ستۋدەنت وتاندىق جوعارى وقۋ ورىندارىنا اۋىسۋعا نيەت ءبىلدىردى. وسى ساناتتاعى ازاماتتاردى قولداۋ ماقساتىندا ارنايى جەدەل جەلى ىسكە قوسىلىپ, قۇجاتتاردى قابىلداۋ رەسىمى جەڭىلدەتىلدى», دەپ حابارلادى.
ءلايلا ابداكيموۆا – قاراعاندى وبلىسىنىڭ تۋماسى. مەكتەپتى بىتىرگەن سوڭ چەحيا رەسپۋبليكاسىنىڭ استاناسى پراگاعا ءبىلىم الۋعا كەتكەن. ونداعى وقۋىن ەكىنشى جىل جالعاستىرىپ جاتقاندا ەلگە اۋىسۋعا شەشىم قابىلدادى.
«بۇل شەشىمدى قابىلداۋىما پاندەميا اسەر ەتتى. نەگىزى, ۆيرۋس ەۋروپا ەلدەرىندە ءورشىپ تۇرعانىن بىلەسىزدەر. البەتتە, بۇل ۆيرۋس ءبىزدىڭ ەلگە دە تارالىپ ۇلگەردى. بىراق مەن وتانىمدا ءوزىمدى قاۋىپسىز سەزىنەمىن. چەحيادا ۆيرۋس ورشىگەن ساتتە ءبىزدى قىسىقتاۋ كوزىمىزگە قاراپ قىتايلىقتارعا ۇقساتاتىن ەۋروپالىقتار كوشەدە كادىمگىدەي قولدارىن شوشايتىپ «كوروناۆيرۋس» دەپ ايعايلايتىن. ولارعا ءوزىڭنىڭ قىتاي ۇلتىنا قاتىسىڭ جوق ەكەنىن تۇسىندىرە المايسىڭ. ماعان وسى جاعداي قاتتى اسەر ەتتى. الەمدىك پروبلەماعا ءوزىڭدى كىنالى سەزىنۋ – تىم قيىن. ونىڭ ۇستىنە وقۋشى كەزىمنەن ءوزىم قالاعان ۋنيۆەرسيتەتىمدە وقۋىما مۇمكىندىك تۋدى. سول مۇمكىندىكتى قولدان جىبەرمەۋدى ءجون كوردىم. ال قۇجات قابىلداۋ جۇمىسى جىلدام ءبىتتى», دەيدى ل.ابداكيموۆا.
شەتەلدەن ەلگە وقۋىن اۋىستىرعان ستۋدەنت ەندى ەۋرازيا ۇلتتىق ۋنيۆەرسيتەتىندە ءوزىنىڭ ءىت ماماندىعى بويىنشا وقۋىن جالعاستىرادى. شەتەلدەگى وقۋىندا اعىلشىن تىلىندە ماتەريالداردى تاۋىپ, چەح تىلىنە اۋدارىپ جۇرگەن ول قازاقستانداعى وقۋىندا قينالمايتىنىن ايتادى.
