مۇنداي شەشىمدى جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا ارنالعان مەملەكەتتىك تاپسىرىستى ورنالاستىرۋ جونىندەگى رەسپۋبليكالىق كونكۋرستىق كوميسسيا شىعارعان. اتالعان كوميسسيانىڭ قۇرامىنا پارلامەنت دەپۋتاتتارى مەن مۇددەلى مەملەكەتتىك ورگان وكىلدەرى كىردى. سونداي-اق كوميسسيا قۇرامىنا «اتامەكەن» ۇلتتىق كاسىپكەرلەر پالاتاسى مەن جوعارى وقۋ ورىندارى قاۋىمداستىعىنىڭ وكىلدەرى جانە قوعام قايراتكەرلەرى, سونىڭ ىشىندە پرەزيدەنت جانىنداعى ۇلتتىق قوعامدىق سەنىم كەڭەسىنىڭ مۇشەلەرى دە بار.
جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ كوميسسيانىڭ شەشىمىنە قاتىستى:
«مەملەكەتتىك تاپسىرىستى ورنالاستىرۋ كەزىندە قوعام بارىنشا ادىلدىكتى تالاپ ەتتى. بيىل ءبىز مۇنى جۇزەگە اسىردىق. دەگەنمەن بۇل شەشىم بەلگىلى ءبىر جوعارى وقۋ ورىندارى تاراپىنان نارازىلىق تۋدىراتىنىن بىلدىك. رەسپۋبليكالىق كوميسسيانىڭ شەشىمى بويىنشا كونكۋرس تالاپتارىنا سايكەس كەلمەيتىن 30-دان اسا جوو 2020-2021 وقۋ جىلىنا ارنالعان مەملەكەتتىك ءبىلىم بەرۋ تاپسىرىسى ورنالاستىرىلاتىن جوعارى وقۋ ورىندارىنىڭ تىزىمىنەن شىعارىلدى. بايقاۋعا بارلىعى 108 جوعارى وقۋ ورنى قاتىستى. مەملەكەتتىك تاپسىرىس ورنالاستىرىلعان جوعارى وقۋ ورىندارىنىڭ سانى ايتارلىقتاي قىسقاردى. ماسەلەن, «قۇقىق» ءبىلىم بەرۋ باعدارلامالارىنىڭ توبى بويىنشا تەك 10 جوعارى وقۋ ورنىندا مەملەكەتتىك گرانت بويىنشا وقىتۋعا مۇمكىندىك بەرىلدى, باسقا باعدارلامالار بويىنشا دا ەلەۋلى وزگەرىستەر بار», دەدى.
مينيسترلىكتىڭ مالىمدەۋىنشە, مەملەكەتتىك تاپسىرىستى ورنالاستىرۋدا جوعارى وقۋ ورىندارىن ءبىلىم بەرۋ باعدارلامالارى بويىنشا اككرەديتتەۋ, تۇلەكتەردىڭ جۇمىسقا ورنالاسۋ پايىزى, ءبىلىم بەرۋ باعدارلامالارىنىڭ ساپاسى جانە جوعارى وقۋ ورنىنىڭ «اتامەكەن» ۇلتتىق كاسىپكەرلەر پالاتاسى رەيتينگىندەگى پوزيتسياسى ەسكەرىلگەن.
ايتا كەتەيىك, «اتامەكەن» ۇلتتىق كاسىپكەرلەر پالاتاسىنىڭ رەيتينگى ەلىمىزدەگى جوعارى وقۋ ورىندار سانىن قىسقارتۋدا دا ەسەپكە الىنىپ ءجۇر. بۇعان دەيىن اتالعان رەيتينگتە تومەن كورسەتكىشتەردى يەلەنگەن ەكى بىردەي وتاندىق ۋنيۆەرسيتەت ليتسەنزياسىنان ايىرىلىپ, جابىلدى. قازىر ءبىلىم جانە عىلىم مينيسترلىگى «استانا» ۋنيۆەرسيتەتىنە جوسپاردان تىس تەكسەرىس جۇرگىزىپ جاتىر.
