ءىس-شارادا ءبىرىنشى بولىپ ءسوز العان دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعىنىڭ ديرەكتورى ابزال تۇڭعاتار ۇلى ەلىمىزدەگى سپورت نۇسقاۋشىلارىنىڭ ءبارىن بىلىكتىلىك كۋرسىنان وتكىزۋ جوسپارلانىپ وتىرعانىن جەتكىزدى.
ء«بىز قازاقستاندىق اۋىلداردى سپورت نۇسقاۋشىلارمەن قامتاماسىز ەتۋدى جوسپارلاپ وتىرمىز. وسى ماقساتتا قازىر ورتالىعىمىزدا سپورت نۇسقاۋشىلارىنا ارنالعان ادىستەمەلىك نۇسقاۋلىق ازىرلەنىپ جاتىر. ونىڭ جوباسى دايىن, بۇل ءاربىر سپورت نۇسقاۋشىسى ءۇشىن كەڭەس كىتاپشاسى بولادى. كەلەسى جىلدان باستاپ وقۋ-ورتالىعىمىزدىڭ ماماندارىنان جاساقتالعان ارنايى توپ بارلىق ءوڭىردى ارالاپ, سپورت نۇسقاۋشىلارىن وقىتادى. ەلىمىزدەگى ءاربىر سپورت نۇسقاۋشىسىن تەوريالىق جانە پراكتيكالىق تۇرعىدا بىلىكتىلىك كۋرسىنان وتكىزۋدى كوزدەپ وتىرمىز», دەدى ا.تۇڭعاتار ۇلى.
ونىڭ ايتۋىنشا, دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعى قوعامدا, الەۋمەتتىك جەلىلەردە, بۇقارالىق اقپارات قۇرالدارىندا جانە ادام كوپ شوعىرلاناتىن ورىنداردا بۇقارالىق سپورتتى ناسيحاتتاۋمەن اينالىسادى. بۇل ءۇشىن ورتالىق ءتۇرلى تانىمدىق ۆيدەو روليكتەر مەن بيلبوردتار, سونداي-اق قىزىقتى جوبالار ازىرلەيدى. سونىڭ ءبىرى – «بەلسەندى ەل» جوباسى. بۇقارالىق سپورتتى حالىق اراسىندا دارىپتەيتىن جانە سپورتپەن شۇعىلدانۋعا شاقىراتىن «بەلسەندى ەل» جوباسى اياسىندا ارنايى سايت ىسكە قوسىلعان. وقىرماندار وندا جاريالانعان ماتەريالدار مەن ماقالالاردان قانداي سپورت تۇرلەرىنىڭ ناقتى قاي جاعىنان ءتيىمدى, قايسى اۋرۋدىڭ الدىن الۋعا باعىتتالعانىن بىلە الادى. سودان سوڭ سايتتا كورسەتىلگەن سپورت كلۋبتارىنىڭ كارتاسىمەن وزىنە قاجەتتى ورىندى تابا الادى.
بريفينگ بارىسىندا دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعى ازىرلەگەن تانىمدىق ۆيدەوروليك كورسەتىلدى. ونداعى اقپاراتقا سۇيەنسەك, قازاقستاندا جۇقپالى ەمەس اۋرۋعا ۇشىراعان ناۋقاستاردىڭ 84 پايىزى قايتىس بولادى. ەلىمىزدە جىل سايىن 30 مىڭ ادام جۇرەك-قان تامىرلارى اۋرۋلارىمەن, 15 600 ادام تىنىس الۋ اۋرۋلارىمەن, 37 800 ادام قانت ديابەتىمەن اۋىرادى. ۇنەمى دەنە شىنىقتىرۋمەن شۇعىلدانۋ ادامدى جوعارىدا اتالعان اۋرۋ تۇرلەرىمەن سىرقاتتانۋدان ساقتايدى.
«مەكتەپ سپورت فەدەراتسياسى» زاڭدى تۇلعالاردىڭ قاۋىمداستىق نىسانىنداعى بىرلەستىگىنىڭ رەسمي وكىلى ءاليا مايدانقىزى بالالار سپورتىنىڭ مەكتەپتەگى دەنە شىنىقتىرۋ پانىمەن عانا شەكتەلىپ قالعانىنا توقتالدى.
«قازىرگى تاڭدا بۇقارالىق سپورتقا كوپ كوڭىل ءبولىنىپ جاتىر. وعان قۋانامىز. بىراق بالالار سپورتى مەكتەپتەگى دەنە شىنىقتىرۋ پانىمەن عانا شەكتەلىپ قالدى. ايتالىق, اۋلاداعى سپورت الاڭدارى جونىنەن دامىعان ەلدەردەن كوپ ارتتا قالدىق. بۇل نەگە اكەلدى؟ سپورتپەن شۇعىلداناتىن بالالاردىڭ سانى ەلىمىزدە 30 پايىزدان اسپايدى. اسكەر قاتارىنا شاقىرىلاتىن جاستاردىڭ 40 پايىزى دىمكاس, تالاپتارعا سايكەس كەلمەيدى. مۇگەدەك بالالار كوبەيدى, وقۋشىلار اراسىندا كوزى ناشار كورەتىندەردىڭ قاتارى كۇن سايىن ارتىپ كەلەدى. قازاقستاندا 1970 مەكتەپتە دەنە شىنىقتىرۋ زالى جوق. مەكتەپتەگى سپورتتى دامىتۋ جۇمىسىن الدىمەن وسى ماسەلەنى شەشۋدەن باستاۋ كەرەك», دەدى ءا.مايدانقىزى.
ال « ۇلى دالا سكاۋتتارى» قوعامدىق بىرلەستىگىنىڭ باس حاتشىسى يلدار كاتەنوۆ بالالاردى سپورتپەن تۇراقتى شۇعىلدانۋعا باۋلۋدىڭ وتە وڭاي ەكەنىن
ايتادى.
«بالانى ۇيرەتۋدىڭ ەڭ ءتيىمدى جولى بار. بۇل – ايتۋمەن ەمەس, ىسپەن كورسەتۋ. اتالعان ماسەلەدە الدىمەن اتا-انا بالاعا ۇلگى بولۋى كەرەك, ەرەسەكتەر سپورتپەن اينالىسۋى قاجەت. بالالار ۇلكەندەرگە ەلىكتەيدى. سوندىقتان ءدال وسى ماسەلەدە الدىڭعى تولقىن بالالاردىڭ بۇقارالىق سپورتپەن اينالىسۋى ءۇشىن نە قاجەت ەكەنىنە ءمان بەرۋى ءتيىس», دەدى ي.كاتەنوۆ.
