ەكونوميكا سالاسىندا ءوز دەڭگەيىندە ايتىلماي جۇرگەن ماسەلەلەردىڭ ءبىرى – كورپوراتيۆتىك باسقارۋ. ق.توقاەۆ اتاپ وتكەندەي, ەلىمىزدە ونداعان ۇلتتىق حولدينگ, مەملەكەتكە تيەسىلى مىڭداعان كاسىپورىن, كۆازيمەملەكەتتىك ۇيىم جۇمىس ىستەيدى. الايدا ولاردىڭ جۇمىس ناتيجەسى مەن ساپاسى تۋرالى ماسەلە بار جانە ءبىر-ەكىسىندە عانا كورپوراتيۆتىك باسقارۋ جۇيەسى ءوز دەڭگەيىندە. بۇل قالعان ۇيىمداردا كورپوراتيۆتىك باسقارۋ جۇيەسىن دامىتۋ كەرەكتىگىن كورسەتەدى. ونىڭ ەكونوميكاداعى ورنى ماڭىزدى, سەبەبى حالىقارالىق ءتيىستى دەڭگەيدەگى كورپوراتيۆتىك باسقارۋ جۇيەسىنىڭ بولماۋىنان كاسىپورىندار مەن ۇيىمدار قور بيرجاسى ارقىلى قارجى تارتا المايدى.
مەملەكەت ءۇشىن ماڭىزدى ماسەلەلەردىڭ ءبىرى – قارجى ساۋاتتىلىعىنىڭ دەڭگەيى. مۇنى مەملەكەت باسشىسى جولداۋدا اتاپ ءوتتى. حالىقتىڭ قارجى ساۋاتتىلىعىن ارتتىرۋ باعدارلاماسىن ودان ءارى جەتىلدىرۋ, ونى كەڭىنەن وقىتۋ شارالارى جۇزەگە اسىرىلۋى كەرەك. ۇلتتىق بانك, قور بيرجاسى, قارجى نارىعىن رەتتەۋ جانە دامىتۋ اگەنتتىگى بۇگىندە بۇل جۇمىستاردى اتقارىپ جاتىر, الايدا وبلىستاردا, ايماقتاردا قارجى ساۋاتتىلىعى ماسەلەسى ءالى دە تومەن. سول سەبەپتەن حالىقتىڭ كەيبىر بولىگى ءتۇرلى جاۋاپكەرشىلىگى جوق ميكروقارجى, لومباردتارعا الدانىپ, سان سوعىپ قالادى. بۇل سالانى كولەڭكەدەن شىعارۋ – ۇلكەن ءىس.
سوڭعى جىلدارى مونوپولياعا قارسى جۇمىس كورىنبەي كەتتى, بۇل ۇلتتىق ەكونوميكا مينيسترلىگىنىڭ قۇرامىنداعى ءبىر كوميتەت بولىپ جۇمىس اتقارىپ جاتىر. سوندىقتان قۇزىرى مەن ۋاكىلەتتىلىگى كەيبىر ماسەلەلەردى شەشۋگە جەتپەي جاتادى. ق.توقاەۆتىڭ مونوپولياعا قارسى اگەنتتىكتى قايتا قۇرۋ كەرەكتىگى تۋرالى باستاماسى جانە ونى تىكەلەي پرەزيدەنتتىڭ وزىنە باعىنىشتى ەتۋى – قۇپتارلىق باستاما. بۇل رەتتە, پرەزيدەنتتىڭ كۆازيمەملەكەتتىك سەكتوردى قىسقارتۋ, مەملەكەتتىك قىزمەتكەرلەر سانىن بيىل 10%-عا, ال كەلەسى جىلى 15%-عا قىسقارتۋ جونىندەگى ۇسىنىسى دا ورىندى. وسى ۇدەرىستەردەن ۇنەمدەلگەن قارجى مەملەكەتتىك قىزمەتكەرلەردىڭ جۇمىس ساپاسىن ارتتىرۋعا باعىتتالۋى ءتيىس.
پرەزيدەنتتىڭ اۋىلشارۋاشىلىق, قارجى-ەكونوميكالىق سەكتورداعى ماسەلەلەردى, ءوندىرىس سالاسىنداعى پروبلەمالاردى جانە باسقا دا ماسەلەلەردى تالداپ, قانداي جەتىسپەۋشىلىكتەر بار ەكەنىن, ونى تۇزەتۋ ءۇشىن قانداي قادامدار جاسالۋ كەرەك ەكەنىن ۇسىنۋى, تاپسىرمالار بەرۋى جولداۋعا تياناقتى دايىندالعانىن كورسەتىپ وتىر.
عادىلبەك اكىم,
الەۋمەتتانۋشى
الماتى
