دەنساۋلىق ساقتاۋ ءمينيسترىنىڭ ايتۋىنشا, شامامەن 5 مىڭ وكپەنى جاساندى جەلدەتۋ اپپاراتىن ساتىپ الۋدى جوسپارلاپ وتىر. قازىرگى ۋاقىتتا جەتكىزىلىپ تە جاتىر. قازاقستان اۋرۋحانالارىندا بۇگىندە 3 مىڭنان استام اپپارات ورناتىلعان ەكەن. 1,5 مىڭ اپپاراتتى وتاندىق وندىرۋشىلەر شىعارعان. سونىمەن بىرگە الداعى بىرنەشە اپتادا بارلىق اپپارات جەتكىزىلەتىنىن مالىمدەدى.
بۇگىندە ەلىمىزدىڭ اۋرۋحانالارىندا كوروناۆيرۋسپەن جانە وكپە قابىنۋىمەن 4 800-دەن اسا ناۋقاس ەم-دوم قابىلداپ جاتىر.
"قازىر احۋال تۇراقتى. كورشىلەس ەلدەردە, اسىرەسە, ەۋروپا پەن تمد ەلدەرىندە اۋرۋ ءوسىمى بايقالادى. سوندىقتان ءبىز ءۇشىن وسى احۋالدى ۇستاپ قالۋ وتە ماڭىزدى. كورسەتكىشتەر جاقسى بولعانىنا قاراماستان, توسەك-ورىن قورىن ۇلعايتىپ, ءدارى-دارمەك ساتىپ الىپ جاتىرمىز. جەكە قورعانىس قۇرالدارىمەن, مەديتسينالىق بەتپەردەمەن قامتاماسىز ەتەمىز. ءبىز ىندەتتىڭ كەلەسى تولقىنىنا دايىندالۋدامىز. ارينە, ءبىز ءۇشىن ونىڭ بولماعانى وتە ماڭىزدى. ەڭ ماڭىزدى فاكتى – الەۋمەتتىك اراقاشىقتىق پەن بەتپەردە. اۋرۋدىڭ 30 پايىزى بەتپەردە تاعۋعا جانە 40 پايىزى الەۋمەتتىك اراقاشىقتىقتى ساقتاۋعا بايلانىستى ەكەندىگىن بىرنەشە مارتە ايتتىق. وسىنى ۇستانۋعا شاقىرامىز. ىندەت تولقىنىنىڭ بولۋىنا نە بولماۋىنا ءبىز ءوزىمىز ىقپال ەتەمىز. ءبىزدىڭ ارقايسىمىز وسىناۋ احۋالعا ىقپال ەتە الامىز. قازىر دەنساۋلىق ساقتاۋ جۇيەسىنە كەلەسى تولقىنعا دايىندىق پەن الدىن الۋ-ءتۇسىندىرۋ جۇمىستارى عانا بايلانىستى. ال قالعانى ءبىزدىڭ ارقايسىمىزعا, ءجيى قارىم-قاتىناستا بولۋىمىزعا, بەتپەردە تاعۋىمىزعا بايلانىستى ەكەندىگى انىق", دەدى الەكسەي تسوي.
