– ءبىزدىڭ «ىستىق قازان» مەيرامحانالار جۇيەسى قازاقستان نارىعىندا پايدا بولعانىنا 2 جىلداي ۋاقىت ءوتتى. الماتى مەن اقتاۋ قالالارىندا جۇمىس ىستەپ جاتىرمىز. جاقىندا اقتوبە قالاسىندا دا ءبىر مەيرامحانامىز اشىلماق. ال اقساي قالاسىندا جۇمىسىمىزدى باستاعانىمىزعا جارتى جىلداي ۋاقىت بولدى, – دەيدى وسى جوبانىڭ جەتەكشىسى جاندوس رساليەۆ.
اقسايدا اتپەن جەتكىزىلگەن العاشقى تاعامنىڭ يەسى – 9 جاسار الديار ەكەن. اتا-اناسى ۇلىنىڭ تۋعان كۇنىن دوستارىمەن, تۋعان-تۋىسقانىمەن اتاپ ءوتۋ ءۇشىن سۇيىكتى تاعامىنا كوپ مولشەردە تاپسىرىس بەرگەن. ال ونى ەرەكشە جەتكىزۋ يدەياسى – جاندوستىكى. «ۇلتتىق كيىممەن, سالت اتپەن اۋلاعا كىرىپ كەلگەنىمىزدە الديار قاتتى تاڭعالىپ, ەرەكشە قۋاندى. ءتىپتى سول ماڭداعى بالا-شاعا تۇگەل جينالدى دەسە دە بولادى. بۇل اقساي قالاسىنداعى ەرەكشە وقيعاعا اينالدى. الەۋمەتتىك جەلىدە جاريالانعان وسى وقيعانى از كۇندە 3 ميلليوننان اسا ادام قاراعان ەكەن», دەيدى جاندوس.
ايتا كەتەيىك, ونلاين-مەيرامحانانىڭ ەرەكشەلىگى – اس, قۋىرداق, پالاۋ ت.ب. ۇلتتىق تاعامدى تاپسىرىس بەرۋشىگە ىپ-ىستىق كۇيىندە, ارنايى قوراپپەن جەتكىزەدى ەكەن.
– ىستىق تاعامدى, استى ارنايى قوراپپەن ۇسىنۋ – الەمنىڭ كوپتەگەن ەلىندە قولدانىلىپ جۇرگەن زاماناۋي سەرۆيس. ونىڭ ۇتىمدى جاعى – تاپسىرىس بەرۋشى كەز كەلگەن جەردە اۋقاتتانىپ كەتە بەرەدى, باسقا ىدىستىڭ كەرەگى جوق. سوندىقتان ءبىزدىڭ باستاما – زاماناۋي ءۇردىس پەن ۇلتتىق ءمازىردىڭ ءساتتى سيمبيوزى بولدى, – دەيدى جاندوس.
باتىس قازاقستان وبلىسى
