پرەزيدەنت ءوز جولداۋىندا ەلىمىزگە زامانعا ساي, ۋاقىت تالابىنا سايكەس وزگەرىستەر قاجەت ەكەندىگىن, ونىڭ قاي سالادا قانداي باعىتتا, قالاي جۇزەگە اساتىنىن تاپتىشتەپ ايتتى. اسىرەسە بۇگىنگى پاندەميا مەن داعدارىس جاعدايىندا مەملەكەتتىك باسقارۋ جۇيەسىنىڭ جاڭا مودەل قاجەتتىگى بايقالدى. سوعان سايكەس پرەزيدەنت مەملەكەتتىك باسقارۋ, كادر ساياساتى سالالارىندا جاڭادان رەفورمالاردى جۇيەلى تۇردە ىسكە اسىرۋ كەرەك ەكەنىن ايتتى. بۇل ەلىمىزدەگى ەڭكەيگەن كارىدەن ەڭبەكتەگەن بالاعا دەيىن قامتيتىن رەفورما بولماق. سوندىقتان دا پرەزيدەنتكە تىكەلەي باعىناتىن ستراتەگيالىق جوسپارلاۋ جانە رەفورمالار اگەنتتىگى قۇرىلاتىن بولدى.
ءوز باسىم مەملەكەتتىك قىزمەشىلەردىڭ سانىن الداعى 2021 جىلى 25 پايىزعا ازايتىپ, ساپاسىن ارتتىرۋدى تولىق قولدايمىن. سەبەبى ەلدى جايلاعان پاندەميا ەلگە ناقتى قاجەتتى مامانداردى ءوزى-اق ايقىندادى.
قاراپايىم حالىقتى قۋانتقان ماڭىزدى وزگەرىستىڭ ءبىرى – زەينەتاقىعا قاتىستى. قاسىم-جومارت كەمەل ۇلىنىڭ تىكەلەي تاپسىرماسى بويىنشا كەلەر جىلدان باستاپ بىرىڭعاي جيناقتاۋشى زەينەتاقى قورىنىڭ 700 مىڭ سالىمشىسى ءوز جيناعىنىڭ بەلگىلى ءبىر بولىگىن ءۇي الۋ, ەمدەلۋ ءۇشىن پايدالانۋعا نەمەسە قارجى ۇيىمدارىنىڭ باسقارۋىنا بەرۋگە مۇمكىندىك الدى. بۇل دا بۇعان دەيىن حالىق تاراپىنان ۇسىنىس بولىپ كوتەرىلگەن ماسەلە بولاتىن.
سونىمەن قاتار جولداۋدا ۇلتتىق قۇندىلىقتار ماسەلەسى دە كوتەرىلدى. مەملەكەت باسشىسى كەلەشەك ادال, ءبىلىمدى, كاسىپكە بەيىم ۇرپاق تاربيەلەۋ ىسىنە ارالاسۋدى بارلىق قوعامدىق ينستيتۋتتارعا جۇكتەدى. اسىرەسە ءبىلىمى مەن بىلىگى, مادەنيەتى جوعارى, ىسكەرلىككە قابىلەتتى ەلدىڭ ازاماتتارى وركەنيەت كوشىن ورگە باستايدى. بۇل ورايدا جاس ۇرپاققا ءبىلىم-تاربيە بەرىپ, وسى داعدىنى بالا بويىنا دارىتۋعا مۇعالىمدەر قاۋىمىنىڭ قوسار ۇلەسى مول. سونداي-اق پاندەميا كەزىندە «مايداننىڭ» العى شەبىنە شىعىپ, ءار ناۋقاس ءۇشىن كۇرەسكەن مەديتسينا قىزمەتكەرلەرىنىڭ دە ەڭبەگى ولشەۋسىز. پرەزيدەنتتىڭ جاڭا جولداۋى الەۋمەتتىڭ قوس قاناتى – مۇعالىمدەردىڭ جالاقىسى وسەتىنىن, مەديتسينا قىزمەتكەرلەرىنە ەكىنشى جارتىجىلدىققا تولەماقى رەتىندە 150 ملرد تەڭگە كولەمىندە قاراجات بولىنەتىنىن حابارلادى. بۇل وتە قۋانىشتى حابار.
«بالالى ءۇي – بازار, بالاسىز ءۇي – قۋ مازار» دەگەن قازاق حالقى بالانى ەرەكشە جاقسى كورىپ, بالا دەسە بارىن بەرەتىن باۋىرمال حالىق سانالعان. «بالا – ادامنىڭ باۋىر ەتى, كوز نۇرى» دەگەن ماقال وسىنىڭ ايعاعى ىسپەتتەس. بالا – ءومىردىڭ جالعاسى, اتا-انانىڭ پەرزەنتى, وتباسىنىڭ قىزىعى مەن شىجىعى. بالالى بولىپ, پەرزەنت ءسۇيۋ – ەڭ ۇلكەن باقىت. سوندىقتان كوپ جىلدان بەرى بالا سۇيە الماي جۇرگەن وتباسىلارعا 2021 جىلدان باستاپ «اڭساعان ءسابي» ارنايى باعدارلاماسى قولعا الىناتىنى ايتىلىپ جاتىر. ياعني پرەزيدەنتتىڭ تاپسىرماسىمەن ەكۇ باعدارلامالارى ارقىلى كۆوتا سانىن جەتى مىڭعا دەيىن, ياعني جەتى ەسە كوبەيتىلەتىنى كوڭىلىمىزگە مايداي جاقتى. سونداي-اق 2025 جىلعا دەيىن بالالاردى 100 پايىز بالاباقشامەن قامتۋ ماسەلەسى مەجەلەندى.
مىنە, وسى ايتىلعان يگىلىكتىڭ ءبارى قوعامنىڭ بارلىق سالاسى سياقتى بىزگە, اسكەري قىزمەتشىلەرگە دە تىكەلەي قاتىستى. ويتكەنى وقالى كيىم كيىپ, تىنىشتىق كۇزەتىندە جۇرگەن ءبىز دە ەلىمىزدىڭ قاراپايىم ازاماتىمىز. قوعامدا زاڭ ۇستەمدىگى ورنىقپاسا, ازاماتتاردىڭ قاۋىپسىزدىگىنە كەپىلدىك بەرىلمەسە, الەۋمەتتىك-ەكونوميكالىق دامۋدىڭ بىردە-ءبىر مىندەتى جۇزەگە اسپايدى. سوندىقتان قۇقىق قورعاۋ جانە سوت جۇيەلەرىن ينستيتۋتسيونالدى تۇرعىدان وزگەرتۋ ماسەلەسى دە وزەكتى. ءبىر سوزبەن ايتقاندا, ازاماتتاردىڭ كونستيتۋتسيالىق قۇقىقتارىنا كەپىلدىكتى نىعايتۋ, زاڭنىڭ ۇستەمدىگىن قامتاماسىز ەتۋ, قۇقىق قورعاۋ قىزمەتىن ىزگىلەندىرۋ جۇمىستارى الداعى ۋاقىتتا جالعاستىرىلا بەرەدى.
ىندەتپەن كۇرەس ۋاقىتىندا قۇقىق قورعاۋ ورگاندارىنىڭ قىزمەتكەرلەرىنە, اسكەري قىزمەتشىلەرگە پرەزيدەنتىمىز ەرەكشە العىسىن ءبىلدىردى. وتانىنا ادال, كاسىبي تۇرعىدان دايىندالعان وفيتسەرلەر مەن اسكەري قىزمەتشىلەر جاڭا گەوساياسي جاعدايدا ەل قاۋىپسىزدىگىنە قاۋىپ توندىرەتىن قاتەرلەرگە تويتارىس بەرۋگە دايىن ەكەندىگىن دالەلدەپ كەلەدى. وسىنداي سىن ساعاتتا اسكەرىمىز ىنتىماعى جاراسقان حالقىمىزبەن بىرگە جۇدىرىقتاي جۇمىلدى. سونىڭ ىشىندە قازاقستان رەسپۋبليكاسى ۇلتتىق ۇلان اسكەرلەرى ساياسي تۇراقتىلىقتى قامتاماسىز ەتىپ, ازاماتتاردىڭ قۇقىقتارىن ساقتاۋ بويىنشا زاڭدىلىق پەن قۇقىقتىق ءتارتىپتى كۇزەتۋدە جۇكتەگەن تالاپتار مەن مىندەتتەردى مۇلتىكسىز ابىرويمەن ورىنداپ ءجۇر.
مەملەكەت باسشىسىنىڭ جولداۋىندا اتالعان مىندەتتەر جۇزەگە اسۋى ءۇشىن بارلىق قازاقستاندىقتارمەن بىرگە قازاقستان رەسپۋبليكاسىنىڭ ۇلتتىق ۇلان اسكەرلەرى «باتىس» وڭىرلىك قولباسشىلىعىنىڭ جەكە قۇرامى دا ايانباي ۇلەس قوسادى دەپ سەندىرەمىن.
الىبەك سەراليەۆ,
گەنەرال-مايور, قازاقستان رەسپۋبليكاسى ۇلتتىق ۇلان «باتىس» وڭىرلىك قولباسشىلىعىنىڭ قولباسشىسى
ورال
