ساياسات • 10 قىركۇيەك، 2020

مينيستر قىرعىزستان جانە ءۇندىستان ءسىم باسشىلارىمەن كەزدەستى

12 رەت كورسەتىلدى

شانحاي ىنتىماقتاستىق ۇيىمىنىڭ سىرتقى ىستەر مينيسترلەرى كەڭەسىنىڭ الاڭىندا قازاقستان رەسپۋبليكاسىنىڭ سىرتقى ىستەر ءمينيسترى مۇحتار تىلەۋبەردى قىرعىز رەسپۋبليكاسى مەن ءۇندىستان رەسپۋبليكاسىنىڭ سىرتقى ىستەر مينيسترلەرىمەن كەزدەستى، دەپ حابارلايدى Egemen.kz.

چينگيز ايداربەكوۆپەن قازاقستان-قىرعىز كوپجوسپارلى ىنتىماقتاستىعىنىڭ وزەكتى ماسەلەلەرى، سونداي-اق اسا جوعارى جانە جوعارى دەڭگەيدەگى ەكىجاقتى ساپارلاردىڭ قورىتىندىلارى بويىنشا قول جەتكىزىلگەن ۋاعدالاستىقتاردى ىسكە اسىرۋ ماسەلەلەرى تالقىلاندى.

مەملەكەتتەر اراسىنداعى كولىك قاتىناسىن قالپىنا كەلتىرۋ جانە ەكى رەسپۋبليكا ازاماتتارىنىڭ شەكارادان ءوتۋ ءتارتىبى ەگجەي-تەگجەيلى قاراستىرىلدى. قىرعىز تاراپى قازاقستانعا كوروناۆيرۋسپەن كۇرەستە جانە قىرعىز ازاماتتارىن وتانىنا قايتارۋ بويىنشا بىرلەسكەن جۇمىستا كورسەتكەن قولداۋى ءۇشىن ەرەكشە ريزاشىلىعىن ءبىلدىردى.

ەكى ەلدىڭ ءسىم باسشىلارى حالىقارالىق جانە وڭىرلىك ۇيىمدار اياسىنداعى ءوزارا ءىس-قيمىل ماسەلەلەرىن دە قاراستىردى.

سۋبرامانيان دجايشانكار قازاقستان مەن ءۇندىستان اراسىنداعى ساياسي ىنتىماقتاستىق پەن جوعارى دەڭگەيدەگى ساپارلارمەن الماسۋدىڭ جوعارى سەرپىنىن اتاپ ءوتتى.

7

تاراپتار ەلدەر اراسىنداعى 2020 جىلعى قاڭتار-مامىر ايلارىنداعى تاۋار اينالىمى 1،57 ملرد. اقش دوللارىن قۇراپ، 2019 جىلدىڭ وسى كەزەڭىمەن سالىستىرعاندا ەكى ەسە وسكەنىن ريزاشىلىقپەن قابىلدادى.

س.دجايشانكار ەنەرگەتيكا، ينۆەستيتسيا، فارماتسەۆتيكا جانە لوگيستيكا سالاسىنداعى قازاقستان-ءۇندىستان ىنتىماقتاستىعىن ودان ءارى كەڭەيتۋدىڭ ماڭىزدىلىعىنا نازار اۋداردى.

كەزدەسۋ قورىتىندىسى بويىنشا تاراپتار بۇرىن قول جەتكىزىلگەن ۋاعدالاستىقتاردى ىسكە اسىرۋ ماقساتىندا ءوزارا تىعىز ءىس-قيمىلدى جالعاستىرۋعا، سونداي-اق نۇر-سۇلتان مەن نيۋ-دەلي اراسىنداعى ستراتەگيالىق ارىپتەستىكتى ودان ءارى تەرەڭدەتۋگە باعىتتالعان بىرقاتار ءىس-شارالاردى بىرلەسىپ جۇرگىزۋگە كەلىستى.

ءۇندىستان مەن قىرعىزستان قازاقستاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە الداعى توراعالىعىن قۇپتادى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار