تىكەلەي ەفير بارىسىندا باسقارما باسشىسى اۋداندىق جانە قالالىق ءبىلىم بولىمدەرىنىڭ قارجىلاندىرۋى ارقىلى 2 572 بىرلىك كومپيۋتەرلىك تەحنيكا ساتىپ الىنعانىن اتاپ ءوتتى. سونداي-اق ۇكىمەت قورىنان بولىنگەن قاراجات ەسەبىنەن 26 509 كومپيۋتەر الىندى. وعان 4,1 ملرد تەڭگە ءبولىندى.
"مەملەكەتتىك ساتىپ الۋدى ءادىل ۇيىمداستىرۋ جانە كومپيۋتەرلىك تەحنيكالاردى ءبولۋ ماقساتىندا "Adaldyq alańy" جوبالىق كەڭسەسى توراعاسىنىڭ جەتەكشىلىگىمەن, "نۇر وتان" پارتياسىنىڭ وكىلدەرى, وبلىستىق ماسليحاتتىڭ حاتشىسى, قوعام وكىلدەرى, جۇمىسپەن قامتۋ جانە الەۋمەتتىك قورعاۋ باسقارمالارىنىڭ, بالالاردىڭ قۇقىقتارىن قورعاۋ جونىندەگى جەرگىلىكتى قوعامدىق ۇيىمداردىڭ, سونداي-اق قامقورشىلىق كەڭەسىنىڭ, اتا-انالار قوعامداستىعىنىڭ, جاستار ۇيىمدارىنىڭ جەتەكشىلەرىنەن جۇمىس توبى قۇرىلىپ, جەتكىزۋشى انىقتالدى. قازىرگى تاڭدا كومپيۋتەرلىك تەحنيكالاردى جەتكىزۋ جۇمىستارى باستالىپ كەتتى. وسى باعىتتاعى جۇمىس 15 قىركۇيەككە دەيىن اياقتالاتىن بولادى", - دەدى سايرانگۇل جۋماديلوۆا.
سونىمەن قاتار جۇمىس توبى كومپيۋتەرلىك تەحنيكانى ءبولۋ مونيتورينگىن جۇزەگە اسىرادى. ءبىرىنشى كەزەكتە حالىقتىڭ الەۋمەتتىك ءالسىز توپتارىن: از قامتىلعان, كوپ بالالى, ەرەكشە ءبىلىم بەرىلۋىنە قاجەتتىلىكتەرى بار بالالاردى, سونداي-اق وقۋ وزاتتارىن قامتاماسىز ەتىلەدى.
